MATIUS 24
24
Ragu ri Jisus intor ra kalunsayan ru Baloi Tuhan
(Mrk. 13:1-2; Luk. 21:5-6)
1Ugar i Jisus intor ra Baloi Tuhan. Tatanga' Io mingkual ra intok no, maamaya'-maamaya' Nano ratong uma' Riso am panulu' Riso ra baloi-baloi ru Baloi Tuhan ondo' maginggaar. 2“Iou,” ragu ri Jisus, “Ilai' noyo ngaangai' ti! Balain takamin: Kolondo' rondo' batu pana intor ragitio soroi ra intok nano; ngaangai' ti lunsayon.”
Kapaganan am kaimbalaan
(Mrk. 13:3-13; Luk. 21:7-19)
3Paat ri Jisus nanturung giu' ra bulur Jaitun, maamaya'-maamaya' Nano simininok pangkuot Riso, “Balai' akai, sanggilan ngaangai' baal ti masauk? Baal ra atan kia masauk no koson manulu' ra nasuku' noyo ratangan Muno am pamupusan ru tana' ti?”
4Taam i Jisus, “Ilalai', am pai' min polosoo' osoi ayuk pana mamparuung ramuyun. 5Sabap ra masuang ulun matong sumalu Raki' am mindagu, ‘Aku noyo Mamamayag ondo' sinusub ri Aki Kapuuno'!’ Mamparuung ilo ra masuang ulun. 6Mokorongog kau bolos ru pampatayan ra mamaar kaga', am tanou pangayawan giu' ra intok mangaalur. Kaa' rongogo' min, pai' kau kalaa'! Baal ragitio musiti' masauk, kaa' pai' ru nasuku' noyo orou pamupusan. 7Pagun mangayou ra pagun ra bokon am parinta mantula' ra parinta ra bokon. Ati ayuk intok mokoondo' bitilan makalalaa' am tana' mogonggon. 8Ngaangai' ragitio matong koson ra maruol ra maganak.
9 #
Mat. 10:22
“Akau pana rokopon boo am imboloon am potoyon. Ngaangai' ru ulun masisang ramuyun sabap ra akau maya' Raki'. 10Paat raginio masuang ulun kalo boo mangintopot Raki'. Ilo ti mampataak ra rondo' am bokon ra pantula' am mansisang rondo' am bokon. 11Masuang migiangku ra nabi matong am mamparuung ra ulun masuang. 12Kalaatan lumanja' suang saboi ulun kalo motogom ra rondo' am bokon. 13#Mat. 10:22Kaa' osoi ayuk tumaan saboi ra pupus no bayagon. 14Tanou Moonsoi ra i Aki Kapuuno' mamarinta posoboyon ra ngaangai' ulun ru tana' ti koson ra sasi' mampaintutun risilo. Mopongo ginio bagu no matong pamupusan ru tana' ti.”
Karaat makalalaa'
(Mrk. 13:14-23; Luk. 21:20-24)
15 #
Dan. 9:27; 11:31; 12:11 “Makakito kau ra Karaat Makalalaa', ondo' rinagu ri nabi Danil, migor ra Baloi Tuhan. (Pangkaraan ra mambabasa': Aratio' min atan pambalaan ragitio!) 16Osoi ayuk pana soroi ra Judia musiti' magiru' ra kabuluran. 17#Luk. 17:31Ulun ondo' soroi giu' rasawat ru baloi nano kalo pana tumuun mongoi pangalap ra kuliamos intor ragana' ru baloi nano. 18Ulun ondo' soroi ra umo kalo pana rumuli' mangalap ra sukub nano. 19Mumpara' boo lalaat orou raginio ra ruandu' mangaapang am ina' ondo' mampatiti' ra lalagang nilai. 20Pakiasi' kano ri Aki Kapuuno' maa' raginio pagiruan min ti kalo masauk ra bulintok masimu' kapoam paat ra orou Sabat. 21#Dan. 12:1; Pin. 7:14Sabap ra kalaatan ru paat raginio kalo igondo' nasauk intor ra tana' ti biningkal saboi raino am kalo boo masauk saguli'. 22Kaa' kinariwa' ri Aki Kapuuno' orou raginio; amon ru kalo, kolondo' sangulun pana ra ulun ti maayag. Kaa' sabap ra ulun-ulun pinili' no, kinariwa' ri Aki Kapuuno' orou raginio.
23“Osoi ayuk mindagu ramuyun, ‘Ilai', gitio Mamamayag ondo' sinusub ri Aki Kapuuno'!’ kapoam, ‘Ginio Io, giu' no!’ Pai' kau pangintopot ra ulun no. 24Sabap ra ulun migiangku ra mamamayag am nabi rumatong. Ilo ti mambaal ra baal kaimuagan ra mampalayau ra ulun ri Aki Kapuuno' amon ru maalap nilo. 25Rongogo' min! Nakaindagu Aku noyo ramuyun paat ra kalo poyo nasuku' baal ti.
26 #
Luk. 17:23-24
“Kaa' amon ru ulun mindagu ramuyun, ‘Ilai' soroi Io giu' ra tana' kaagisan!’, pai' kano ongoi ra giu'. Kapoam, amon ru mindagu ilo ramuyun, ‘Ilai', nansibuni Io ragiti!’, pai' kano pangintopot. 27Sabap ra Anak ru Ulun rumatong koson ra ganit suminda ra ngaangai' limbowon intor ra sirangon suku' ra kalasaan.
28 #
Luk. 17:37
“Ati mokoondo' ra baangkai, ginio timungan ru susuit mangakan ra baangkai no.”
Ratangan ru Anak ru Ulun
(Mrk. 13:24-27; Luk. 21:25-28)
29 #
Jis. 13:10; 34:4; Yeh. 32:7; Jl. 2:10, 31; 3:15; Pin. 6:12-13 “Kalo mabuoi malupus bulintok kapaganan raginio, mato ru orou lumondom, bulan kalo boo sumila' am butitin-butitin rumatu' intor ra limbowon, am ikang ru limbowon uyogon. 30#Dan. 7:13; Ja. 12:10-14; Pin. 1:7Bagu no tatandu' ra Anak ru Ulun no makito ra limbowon am bagu no ulun ra tana' ti mantatangi', am makito nilo Anak ru Ulun matong ra gaun mabaya' ra ikang am katulayan Nano ra maayo. 31Bujung maayo samputin kosongowon am manusub Io ra malaikat-malaikat Nano mongoi ra ngaangai' pamagunan ru tana' ti, am manimung ilo ra ulun pinili' intor ra titikop ru tana' ti.”
Pangilaan intor ra puun ru ara
(Mrk. 13:28-31; Luk. 21:29-33)
32“Igigila' noyo ra pangilaan intor ra puun ru ara. Paat ra raan nano masansam am malami' am tumalimpuun manangumbus, napandayan min mamaar noyo manampio. 33Koson niayuk paat ra makito min ngaangai' baal ragitio, napandayan min orou nano mamaar noyo kapoam tumalimpuun ra mataki'.#orou nano mamaar noyo kapoam tumalimpuun ra mataki'; kapoam: Io no mamaar noyo kapoam matong ra mataki'. 34Karaa' min! Ngaangai' baal raginio masauk ra kalo poyo matoi ngaangai' ulun ondo' maayag ra raino ti. 35Limbowon am tana' ti mapuso, kaa' ragu Kutu mantilayun.”
Kolondo' sangulun makapandai ra orou am paat nano
(Mrk. 13:32-37; Luk. 17:26-30, 34-36)
36“Kaa' koson pana raginio, kolondo' sangulun makapandai ra orou kapoam paat nano, malaikat-malaikat giu' ra suruga' pana kapoam Anak Nano.#Kukula' naskhah nakalair kolondo': kapoam Anak Nano. I Ama' ayuk makapandai. 37#Kas. 6:5-8Ratangan ru Anak ru Ulun masauk koson ra atan nasauk ri nabi Nuu. 38Koson niayuk paat ra kalo poyo rosob i, ulun mangakan am manginum, ungkuyon am ruandu' maguot saboi i Nuu siminubol ralalom ru kapal i. 39#Kas. 7:6-24Kalo nakapandai ilo atan ondo' nasauk saboi rosob i nangabas risilo. Koson niayuk raginio paat ra Anak ru Ulun rumatong. 40Paat ra orou raginio, ruo ngaulun ungkuyon tatanga' mangandoi ra umo. Sangulun ibiton, am sangulun patatangon. 41Mogondo' niayuk ra ruo ngaulun ruandu' tatanga' mangandoi ra panginsaran ra gandum. Sangulun ibiton am sangulun patatangon. 42Ilalai' min, sabap ra kalo napandayan orou ra atan Tuhan mino rumatong. 43#Luk. 12:39-40Karaa' min gitio! Amon ru ampu' ru baloi nakapandai sangulun mantatakou no matong, kalo mombolong io am kalo polosoon no mantatakou no sumubol ra baloi nano. 44Ginio ra akau pana musiti' tumampos, sabap ra Anak ru Ulun matong paat ra orou kalo guangon min.”
Ulipon ra gumagaya' am kalo gumagaya'
(Luk. 12:41-48)
45“Osoi kia ulipon ondo' gumagaya' am mapintar? Io noyo ulun ondo' paningganayon ru tuan nano am manusub mapaakan ra ulipon-ulipon ra bokon paat ra inaru' i. 46Mumpara' boo bonsoi ru ulipon no paat tuan nano sumaguli' am nakito ra ulipon nati giminagaya' ra nanusuban nali. 47Balain takamin: Mampalansan toojo tuan ti ra ngaangai' rapu' nano ra ulipon ragitio. 48Kaa' amon ru ulipon ti ulun malaat, mampaguang io, ‘Mabuoi tuan kuli sumaguli'.’ 49Io pana tumalimpuun boo mampalamba' ra ulipon-ulipon ra bokon no am mangakan am manginum io ra ulun gagaukon. 50Tuan ru ulipon ragitio pana muli' boo ra paat kalo kinara' am kalo natutunan nano. 51Tuan no pana monotok#monotok; kapoam: patirin. boo ra ulipon ti am poongoyon no intok ra ulun mangalaat. Giu' no mantangi' io am manguritot ripon nano.”
Hakcipta © Bible Society of Malaysia, 2013.