MATIUS 10
10
Mopor am ruo ngaulun rasul
(Mrk. 3:13-19; Luk. 6:12-16)
1Piawo' ri Jisus mopor am ruo ngaulun maamaya' Nano, am anii' No boo ilo ra kuasa' mampagiru' ra riwato am mamabas ra nansalinut maruol. 2Gitio noyo inggalan ru mopor am ruo ngaulun rasul Nano: Kasaa'; i Simon (ondo' poyo sabiton ri Pitrus) am pinongkotob nano i Andrias; i Jakubus am pinongkotob nano i Juanis, ilo ti anak ri Jibidius; 3i Pilipus am i Bartolomius; i Tomas, am i Matius mampalulur ra cukai no; i Jakubus anak ri Alpius, am i Tadius; 4i Simon ulun Patriot no, am i Judas Iskariot ondo' nampataak ri Jisus ra pantula' Nano.
Kandoi ru rasul-rasul
(Mrk. 6:7-13; Luk. 9:1-6)
5Susubo' ri Jisus mopor am ruo ngaulun rasul no am pambilin Io risilo koson ragitio: “Pai' kano ongoi ra libung ru ulun sala' ka Jaudi kapoam pekan ru ulun ru Samaria. 6Kaa' ongoi kau ayuk ra ulun ru Israil, domba ondo' timinanggau. 7#Luk. 10:4-12Ongoi kau am pambala', ‘Mamaar noyo i Aki Kapuuno' mamarinta.’ 8Babaso' min noyo ulun ondo' marualan; paluato' min noyo ulun ondo' minatoi, babaso' min noyo ulun ondo' makamaruol ra kungkung maaja', am pagiruo' min noyo riwato-riwato. Inanian kau ra kalo kinilagaan am panaak kau pai' min kilagai'! 9Pai' pagibit ra ruit mas, pirok, kapoam tambaga' ralalom ru pakit mino. 10#1 Kor. 9:14; 1 Tim. 5:18Pai' pagibit ra katia' pakitaakan, kapoam konoon ralinan paat ra akau mugar, kapoam kasut am susukur, sabap ra sangulun mangngandoi musiti' makaalap ra ampos nano.
11“Paat ra akau makasuku' ra rondo' pekan kapoam rondo' pamagunan subol am paguyum no ra sangulun ondo' masaga' mangapu ramuyun. Ayan no riso saboi akau mangiruan ra intok raginio. 12Paat ra akau sumubol ra rondo' baloi, indagu no, ‘Kaansayan ramuyun.’ 13Amon ru ulun ru baloi no mangapu ramuyun, polosoo' noyo ragu kaansayan no magulayun ayan risilo. Kaa' amon ru kalo, polosoo' noyo kaansayan no sumaguli' ramuyun. 14#Rin. 13:51Amon ru mokoondo' baloi kapoam bandar ondo' kalo mangapu am mangkirongog ra ragu mino, iruani' min noyo intok raginio am kabuli' min noyo kaau ru kasut mino.#kabuli' min noyo kaau ru kasut mino: Koson mansawai ra ulun bokon. 15#Mat. 11:24; Kas. 19:24-28Karaa' min! Paat ra Orou Pupus, i Aki Kapuuno' makaasi' ra ulun ru Sodom am Gomora, ka ulun ru pekan raginio!”
Kaimbalaan ra matong no
(Mrk. 13:9-13; Luk. 21:12-17)
16 #
Luk. 10:3
“Karaa' min! Susubon takamin koson ra domba giu' ra tatanga' ru taani. Akau musiti' no mapintar koson ra kukuo am moonsoi guang koson ra susuit asang. 17#Mrk. 13:9-11; Luk. 12:11-12; 21:12-15Ilalai' min, sabap ra mokoondo' ulun mamparakop am magibit ramuyun giu' ra makama, am loposon kau giu' ra baloi sambayangan nilo. 18Akimin kau ra saang ru tingganai-tingganai ru ulun am niayuk raja'-raja' sabap ra akau mangintopot Raki', am mampatanou kau boo ra Tanou Moonsoi no risilo am poyo ra ulun sala' ka Jaudi. 19Paat ra akau akimin, pai' kano kalaa' ra ati kulaan akau mindagu. Paat ra masuku' paat no, balain kau ra atan ondo' musiti' raguon mino. 20Sabap ra ragu ondo' raguon mino sala' ka intor ra guang mino galama', kaa' io no matong intor ra Ambiluo ri Aki Kapuuno', ondo' sabiton ra Ama' min. Io noyo mangindangan ramuyun.
21 #
Mrk. 13:12; Luk. 21:16 “Mokoondo' ulun mampataak ra pinongkotob nano galama' koson ra potoyon, am ama' pana mambaal niayuk koson raginio ra anak nano. Mokoondo' anak manggal ra matuo nano saboi pataakon nilo ra potoyon. 22#Mat. 24:9, 13; Mrk. 13:13; Luk. 21:17Ginio ra moonong ulun masisang ramuyun sabap ra akau mangintopot Raki'. Kaa' osoi mokoorot saboi ra tauli no io ti bayagon. 23Paat ra akau imboloon ra rondo' pekan, pagiru' no ra pekan ra bokon. Mindagu Aku ramuyun: Ra kalo poyo masuku' min ngaangai' pekan ru Israil, Anak ru Ulun rumatong noyo.
24 #
Luk. 6:40; Jua. 13:16; 15:20 “Amon ru sangulun mangingila' kasisangin, migigila'-migigila' nano pana kasisangin. Amon ru sangulun tuan kasisangin, ulipon-ulipon nano pana kasisangin. 25#Mat. 9:34; 12:24; Mrk. 3:22; Luk. 11:15Atan baalon nilo ra mangingila', baalon nilo niayuk ra migigila', am atan baalon nilo ra tuan, baalon nilo niayuk ra ulipon. Amon ru puun ru baloi no sabiton ra Biiljibul,#Biiljibul: Ilai' ra Kamus. mapara' piboo laat ru ulun ru baloi raginio sabiton ru ulun.”
Kalaa' kano ri Aki Kapuuno'
(Luk. 12:2-7)
26 #
Mrk. 4:22; Luk. 8:17 “Pai' no kalaa' ra ulun raginilo sabap ra atan ondo' nolopot bungkalaron am moonong ondo' inopot pasalulaan. 27Atan ondo' rinagu Kuno ramuyun ra molondom, musiti' no raguon min poyo sagulio' ra orou matawang. Atan ondo' norongog min ra kinonos ayuk, pabalaa' min noyo ra ati-ati ayuk. 28Pai' kano kalaa' risilo ondo' makapamatoi ramuyun, kaa' ondo' kolondo' kuasa' mampasubol ramuyun ra naraka. Kaa' kalaa' kano ri Aki Kapuuno' ondo' makapamatoi ramuyun am makakuasa' mampasubol ramuyun ra naraka. 29Mambali kau ra ruo ngainan susuit pilit ra sausin ayuk, kaa' kolondo' sanginan pana maratu' ra tana' no amon ru kalo kasagaan ru Ama' mino. 30Suang ru abuk ra ulu mino pana nauntob noyo. 31Ginio ra pai' kano kalaa'. Maatang kau toojo intor ra nasuangan susuit pilit!”
Mangiou kapoam magali' ri Kristus
(Luk. 12:8-9)
32“Osoi ayuk mangiou ra saang ru ulun ra io maamaya' Raki', Aku pana mangiou niayuk riso ra saang ru Ama' Kuno giu' ra suruga'. 33#2 Tim. 2:12Kaa' osoi ayuk magali' ra saang ru ulun ra io maamaya' Raki', Aku pana magali' riso ra saang ru Ama' Kuno giu' ra suruga'.”
Sala' ka pababansayan, kaa' pantutulaan
(Luk. 12:51-53; 14:26-27)
34“Pai' no pangkara' ra Aku magibit ra pababansayan ra tana' ti. Kalo magibit Aku ra pababansayan, kaa' pantutulaan. 35#Mi. 7:6Ratangan Kuno mangkinibit ra anak ungkuyon mantula' ra ama' nano, anak ruandu' mantula' ra ina' nano, am anak mangiwan ra ruandu' mantula' ra iwan no ra ruandu'. 36Iou, pantula' maayo ru sasangulun no ioginio ulun ru baloi nano galama'.
37“Osoi ayuk motogom poyo ra ama' am ina' nano ka Aku kalo sama' io masauk ra maamaya' Kuno. Koson niayuk ra osoi ayuk motogom poyo ra anak ungkuyon kapoam anak ruandu' nano ka Aku kalo sama' io masauk ra maamaya' Kuno. 38#Mat. 16:24; Mrk. 8:34; Luk. 9:23Osoi ayuk kalo mansaan ra salip nano am mugar maya' Raki' kalo sama' io masauk ra maamaya' Kuno. 39#Mat. 16:25; Mrk. 8:35; Luk. 9:24; 17:33; Jua. 12:25Osoi ayuk kalo masaga' mampataak ra kaayagan nano, io no matatakan ra kaayagan motopot; kaa' osoi ayuk mampataak ra kaayagan nano sabap ra Aku, makaalap io ra kaayagan motopot.”
Ampos ru binaal moonsoi
(Mrk. 9:41)
40 #
Mrk. 9:37; Luk. 9:48; 10:16; Jua. 13:20 “Osoi ayuk ondo' mangapu ramuyun, Aku niayuk apuon no, am osoi ayuk ondo' mangapu Raki', Io ondo' nanusub Raki' ti noyo ondo' apuon nano. 41Osoi ayuk mangapu ra nabi sabap ra io sangulun nabi, ampos ondo' moowot no mogondo' ra ampos ru sangulun nabi. Osoi ayuk mangapu ra ulun sabap ra matanda' paliso nano, io pana mokoowot niayuk ra ampos ru sangulun matanda'. 42Balain takamin: Osoi ayuk mampainum ra santiib timug ayuk pana ra sangulun ondo' kalo umparaan ru ulun sabap ra maamaya' Ku io, totopot niayuk makaalap ulun no ra ampos nano.”
Hakcipta © Bible Society of Malaysia, 2013.