ESTER 3
3
Nangatang i Gaman koson mamuso ra ulun ru Jaudi
1Kopongo kukula' buoi, nampalantik Raja' Agaswiros ra sangulun ondo' ininggalanan ri Gaman nasauk ra menteri masawat kaga'. I Gaman iono anak ri Gamidata intor ra papag ri Agag.#Agag: Sangulun raja' ru Amalik; bansa' nano iono pantula' ulun ru Israil intor poyo bulintok ru kinamatuaan nilo. 2Nanusub raja' maa' raginio ngaangai' pagawai ondo' nangandoi ra raja' mangurumat ri Gaman am migulatur riso. Ngaangai' ulun giminagaya' ra susuban no ondo' ak am i Mordikai. 3Pagawai-pagawai ra bokon ondo' nangandoi ra raja' nangkuot ri Mordikai ra sabap nano minanggal ra susuban ru raja'. 4Moonong orou mampajajal ilo riso maa' raginio maya' ayuk, kaa' marara' i Mordikai manugut ra bilin nilo. Kono, “Aku ti ulun ru Jaudi, ginio ra aku kalo migulatur samba ra ulun.” Binalaan nilo i Gaman ra baal raginio sabap ra moogot ilo makapandai ra atan pamakuan no ri Mordikai. 5Siminangit kaga' i Gaman paat ra io nakapandai ra i Mordikai marara' migulatur samba riso. 6Pakapandai i Gaman ra i Mordikai ulun ru Jaudi, namatas io ra sala' ka ayuk koson mangukum ri Mordikai kaa' niayuk mamuso ra ulun-ulun ru Jaudi giu' ra titikop ru pamarintaan ru Pirsia.
7Paat ra bilor koopor am ruo ra pamarintaan ru Raja' Agaswiros, paat ra sila' kasaa', iono sila' Nisan, nanusub i Gaman maa' raginio ulun magugundi' (ondo' sabiton ra “purim”) koson mangaru' ra orou am sila' ondo' maaya' koson manugut ra inatangan malaat no. Pupus no, ondo' inaru' iono orou koopor am talu ra sila' koopor am ruo, iono sila' Adar.
8I Gaman pana nambala' boo ra raja', kono, “Raja' kuno, mokoondo' rondo' bansa' ondo' nokosoroi ra moonong wilayah giu' ra titikop ru pamarintaan mutu. Mokoondo' ilo ra kaulayan ondo' suai toojo ra kaulayan ru bansa' ra bokon. Ra mulu' poyo ra kalo gumagaya' ilo ra undang-undang ru pamarintaan. Ginio ra, moonsoi pai' mu polosoo' ilo mambaal ra kasagaan nilo. 9Amon ru mangiou kou, moonsoi ingkualon surat susuban koson mamuso risilo. Amon apuon mu inatangan ragitio, mangintopot aku ra makasubol masailan intor ra 340,000 ngakilogram pirok ra ralalom ru intok pambulian ra rapu' ru raja' ra tayar ru pentadbiran ru pamarintaan.”
10Pokorongog ra baal raginio, paguso' ru raja' sinsing intor ra bubua' ru kalindu' nano; sinsing raginio noyo ondo' pinakai no koson ra saap ru papatanawan rasmi. Pinataak ru raja' sinsing no ra pantula' maayo ru ulun ru Jaudi, iono i Gaman anak ri Gamidata, papag ri Agag. 11Indagu raja' riso, “Pataakon ku rirun bansa' raginio am ruit nilo. Baalo' noyo atan ondo' ilain mu ra moonsoi risilo.”
12Ginio ra paat ra orou koopor am talu ru sila' kasaa', nampiau i Gaman ra ngaangai' mamamatik ru raja'. Nanusub i Gaman risilo manulis ra surat sumugut ra ngaangai' ondo' sinusub nano. Surat no pana pinaalig boo ra ralalom ru ngaangai' ragu, am pinaralin ra ralalom ru ngaangai' tulisan ondo' pinakai ra ralalom ru pamarintaan. Surat no tinulisan ralalom inggalan ru Raja' Agaswiros am sinaapan ra saap nano. Kopongo raginio surat no inataran ra ngaangai' panguasa', gabenor am pagawai. 13Susuban no mataki' inataran ru ulun-ulun sinusub ra moonong wilayah ru pamarintaan. Suang ru susuban no nambala' ra ralalom songorou, iono paat ra orou koopor am talu ru sila' Adar, ngaangai' ulun ru Jaudi, matutuo am mamulok, ruandu' am lalaing, musiti' potoyon ra kalo makaasi', am rapu' nilo gaawon. 14Susuban no musiti' potonowon giu' ra moonong wilayah maa' raginio ngaangai' ulun tumampos ra paat nano masaboi.
15Ulun-ulun sinusub mataki' minintor koson mangator ra surat-surat no ra ngaangai' wilayah. Mabaya' ra susuban ru raja', ragu no pinatanou niayuk giu' ra pusor bandar Susan. Raja' am i Gaman nantuturung liliwa' manginum ra wain, kaa' bandar Susan najajou sabap ra tanou raginio.
Hakcipta © Bible Society of Malaysia, 2013.