Mishingo 9
9
Kushanduka kwa Saulo
(Mishingo 22:6-16; 26:12-18)
1Mu tjibaka itjetji Saulo wakabe atjizhelilane eshaka bulaya badiyiwa ba She. Kayenda ku Ntungamili we bapirisiti ngono 2kankumbila hwalo dzinoyenda ku ng'umba dze mitembezelo ku Damasiko kuti ha angawana bamwe ikoko be Zila iyeyo bali balume kene bakadzi abatole abayise ku Jerusalema bali basungwa.
3Kati ali mu gwendo gugwe abe pejo ne Damasiko, tjinyolotjo tjedza tjinodwa kudzimu tjikapenya kumpoteleka. 4Kawila pasi, ngono kahwa hwi liti kunli, “Saulo, Saulo, apa unondidziyidzilani kene?”
5Iye kati, “Ndimwi ani She?” Hwi likati, “Ndimi Jesu, iye waunodziyidza. 6Ngwenu, milika ungine mu nzi, ngono unowobudziwa kuti uthameni.”
7Balume bakabe beyenda na Saulo bakama ipapo basingalebeleke; behwa hwi koga basina wabanobona. 8Saulo kamuka pasi, koga kati ezhula mesho awe, kasibone tjimwe. Ndizo bakankwebela mu Damasiko nge luboko. 9Wakabe bhofu mazhuba matatu, ngono kasije kene kuli kung'wa tjimwe.
10Mu Damasiko kwakabe kuna n'diyiwa unodang'wa kuyi Ananiyasi. She bakan'dana mu mbono beti, “Ananiyasi!” Iye kadabila eti, “Ndipano She.”
11She kambudza kati, “Milika uyende ku ng'umba ya Judasi mu zila inodang'wa kuyi, Yakatambunuka ubhuzwe ngekwe nlume unodwa ku Taso unoyi Saulo, ngobe unotembezela. 12Wabona mu mbono nlume unoyi Ananiyasi ezha embiga maboko kumpofunula.”
13Ananiyasi kadabila kati, “She, ndakahwa nge bathu banjinji ngekwe nlume iwoyu nenge kuti wakathama bubi gungapani ku bayengemali benyu mu Jerusalema. 14Wakazha muno nge simba linodwa ku bapirisiti bakulu kusunga bose banodana zina lenyu.”
15Koga She bakati kuna Ananiyasi, “Yenda! Nlume iwoyu tjija tjangu tjandakashalula kuyisa zina langu kuna Bezwitjaba na bomambo babo kose neku bana be Iziraela. 16Ndowonlakidza kuti wakafanila dziyila kungapani ngekwe zina langu.”
17Ipapo Ananiyasi kayenda ku ng'umba iyeyo, ngono kangina muili. Kati ebiga Saulo maboko etembezelela kati, “Ikamu tjangu Saulo, She Jesu iye wakaboneka ku kuli mu zila yawakazha ndiyo, wandituma kuti ubone kakale ne kuti uzhale Meya yakayengemala.” 18Tjinyolotjo zwithu zwinonga makwapa zwikawa mu mesho a Saulo ngono kabona kakale. Kamilika, ngono kadubikiwa, 19ngono kati aja, kazhigwa kakale nge matatabuko awe.
Saulo unosumikila mu Damasiko
Saulo wakagala mazhuba ne bagalimoyo mu Damasiko. 20Tjinyolotjo katangisa kusumikila ngekwa Jesu mu ng'umba ye mitembezelo eti, “Jesu Nkololo we Ndzimu.”
21Ngono bose bakanhwa bakatjenama, ngono bakabhuzwa beti, “Apa ate iye nlume wakabe ebulaya banodana zina la Jesu mu Jerusalema kene? Kakale aazozhila kuti abasunge abayise ku bapirisiti bakulu kene?”
22Koga Saulo kasimila mbeli, ngono kashanganya Bajuta banogala mu Damasiko misholo nge kubalakidza kuti Jesu ndiye Mesiya.
23 #
2 Bakorinta 11:32, 33 Kwakati shule kwe mazhuba manjinji Bajuta bakalangana kumbulaya, 24koga kaziba ngekwe nlangano wabo. Bakabe belinda nkoba we nzi siku ne sikati kuti bambulaye. 25Koga badiyiwa babe bakantola busiku bakan'delusila kuzhe bentjuludza guma ali mu itundu.
Saulo mu Jerusalema
26Wakati eswika mu Jerusalema kagwisa kuzwishanganya ne badiyiwa, koga bose bakabe bentja basingagalemoyo kuti n'diyiwa. 27Koga Bhanabhasi kantola, ngono kanzhisa ku batumwa. Kababudza sekwa Saulo akabona She mu gwendo gugwe, ngono She kalebeleka naye, kababudza sekwa Saulo akasumikila ana tjilopa mu Damasiko nge zina la Jesu. 28Ndizo Saulo kagala nabo kayenda akasununguka mu Jerusalema elebeleka akasimisamoyo nge zina la Jesu. 29Wakabe esumikila ana tjilopa enyanyayidzana ne Bajuta banoleba Tjigiriki, koga ibo bakagwisa kumbulaya. 30Kukati zwikamu zwaziba ngekwa ikoku zwikantolela ku Sizariya ngono zwikantumila ku Taso.
31Ipapo gubungano lose mu Judiya ne limu Galili ne limu Samariya likabe ne mbakiso, likasimisiwa, likanyaladziwa nge Meya yakayengemala, likakula litjilila mu kutja She.
Pita mu Lida ne Jopa
32Pita kati etendeleka nge shango kayenda kunokumbabo bayengemali ku Lida. 33Ikoko kawana nlume unoyi Aneasi wakabe atjibe nge makole ali zhanakadzi ali lele akalobgwa nge gulukadzi. 34Pita kati kunli, “Aneasi, Jesu Kirisiti unokupodza. Milika uwalule.” Tjinyolotjo Eneasi kamilika. 35Bose bagali be Lida ne Sharoni bakambona ndizo bakashandukila kuna She.
36Mu Jopa kwakabe kuna n'diyiwa unodang'wa Tabhita. Zina lile mu Tjigiriki loyi Dokasi. Iye wakabe misi yose ethama mishingo mibuya ebhatsha bashayi. 37Mazhuba iyawo kagwala ngono kafa, ngono bakati banngudza bakanladzika mu ng'umba ipezhugwi kwe imwe. 38Nzi we Lida wakabe uli pejo ne Jopa. Ndizo badiyiwa bakati behwa kuti Pita umu Lida bakatuma balume babili kunli ngono bakankumbila beti, “Izha ku tili ngwenu usinonoke.” 39Pita kamilika kayenda nabo, ngono kati eswika bakantathisila pezhugwi ku ng'umba iyeyo. Tjilikadzi dzose dzikama kumpoteleka dzilila dzinlakidza hazu ne zwiambalo zwimwe Dokasi zwaakabe athama atji nabo. 40Pita kabadusila bose kuzhe kwe ng'umba; ipapo kathigama ngono katembezela, ngono kati etendebukila ku itumbu kati, “Tabhita, milika.” Tabhita kazhula mesho awe, ngono kati ebona Pita kamuka, ngono kagala. 41Pita kambhata nge luboko, ngono kambatsha kuma nge makumbo. Ipapo kadana bayengemali ne tjilikadzi, ngono kabapa iye etjila. 42Oku kwakazibgwa mu Jopa yose, ngono bathu banjinji bakagalamoyo muna She. 43Pita kagala mu Jopa mazhuba manjinji, egala na Simoni nsuki we makukuta.
ప్రస్తుతం ఎంపిక చేయబడింది:
Mishingo 9: KBTP
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Kalanga Bible © Bible Society of Botswana, 2008, 2018.
