Mishingo 19
19
Paulo mu Efeso
1Apolosi kati atjimu Korinta, Paulo kayenda ali tje mukati kwe ntuthu, ngono kaswika mu Efeso. Ikoku kawana bamwe badiyiwa, 2ngono kababhuzwa kati, “Apa makaamutjila Meya yakayengemala pamakabe bagalimoyo kene?”
Bakadabila beti, “Aa, atithu tikahwa na iko kuti kuna Meya yakayengemala.”
3Paulo kabhuzwa kati, “Ngono makaamutjila kudubikwa kwakatini?”
Bakadabila beti, “Kudubikwa kwa Johani.”
4 #
Matewu 3:11; Mako 1:4, 7, 8; Luke 3:4, 16; Johani 1:26, 27 Paulo kati, “Kudubika kwa Johani kwakabe kuli kwe kushandukila matjinyo; ngono wakabudza bathu kugalamoyo muna iye wakabe ewozha shule kukwe, iye Jesu.”
5Bakati behwa ikoku, bakadubikwa nge zina la She Jesu. 6Paulo kabiga maboko awe pezhugwi kwabo, ngono Meya yakayengemala ikadelukila mubali; bakalebeleka nge ndimi kakale bakalebabo dama le Ndzimu. 7Bose bakabe bangabe balume bali gumi lina babili.
8Paulo kangina mu ng'umba ye mitembezelo, ngono mu mimwedzi ili mitatu kalebeleka ngosimamoyo ne bathu, elebeleka nabo egwisa kubagadzamoyo mu bushe gwe Ndzimu. 9Koga kwakabe kuti bamwe bakakukutala, bakasigalemoyo, bakaleba zwakabipa ngekwe Zila ya She mbeli kwe gubungano. Ndizo Paulo kabasiya, katola ibabo bakabe begalamoyo, ngono mazhuba wose elebeleka mu ng'umba ye zwidiyo ya Tirano kudwa mu lubaka gwe gumi lina ling'ompela. 10Ikoku kukadwilila makole mabili, ndizo bathu bose bakabe begala mu ntuthu we Ezhiya, Bajuta ne Bezwitjaba bakahwa dama la She.
Bakololo ba Sikeva
11Ndzimu wakabe ushinga ndi Paulo makaabadzo asakawolobegwa. 12Tukwana ne khiba dzaakashingisa dzakabe dziyisiwa ku bagwele, ngono magwele abo ebhuda mubali ne meya yakabipa ibhuda mubali. 13Bamwe Bajuta bakabe beyenda bedusa meya yakabipa bakagwisa kushingisa zina la She Jesu kuthama ikoku. Bakati ku meya yakabipa, “Ndokulaya nge zina la Jesu, iye Paulo waanosumikila.” 14Bakololo bali kutendeka ba Sikeva Ntungamili we bapirisiti we Tjijuta bakabe bethama ikoku. 15Koga meya mbi ikati ku bali, “Jesu ndonziba, na Paulo ndonziba koga imwi, muboani?”
16Nlume iwoyo wakabe ana meya mbi kabatjulukila kagwanabo kabakulila nge masimba. Bakatizha bakabhuda mu ng'umba iye basakasungila kakale bana mbonje. 17Ikoku kukazibgwa nge bagali bose be Efeso ne Bajuta kose ne Bezwitjaba bakazhala kutja, ngono zina la She Jesu likakudziwa. 18Bunji gwa ibabo bakabe batjibe bagalimoyo bakazha, bezwileba matjinyo abo kakale bedusila patjena mishingo yabo mibi yabakabe bethama. 19Bunji gwa ibabo bakabe beshingisa malipa bakakubunganya hwalo dzabo, ngono bakadzipisa mbeli kwe bathu. Bakashanganya themba ye hwalo idzedzo, ngono yose yakabe zwiwulu zwili makumi mashanu (50 000) e maloso e siliva. 20Dama la She likakula likawanda nge masimba.
Phipiti mu Efeso
21Shule kwe zwithu izwezwi zwashingikala, Paulo kakumbula kuyenda epalama Makedoniya ne Akaiya eyenda ku Jerusalema, eti, “Kudwa ikoko ndakafanila kuyenda ku Roma.” 22Ndizo katuma Timoti na Erasito, babili be babhatshi babe mu Makedoniya iye esala kwe tjibakana mu Ezhiya.
23Kwakabe kuna kudzongeka kukulu mu Efeso mu tjibaka itjetjo ngekwe Zila ya She. 24Mmwe nthuli we siliva wakabe eyi Demetiriyo wakabe ethama zwifano zwe siliva zwe ng'umba ye ndzimukadzi Aritemisi, ngono nshingo uwe wakabe ubuzila bashingi kwazo. 25Ndizo kabadana bose ne bamwe bakabe bana nshingo unoyendidzana ne wabo, kati ku bali, “Balume, moziba kuti fumwa yedu inodwa mu nshingo iwoyu. 26Ngwenu, mobona mukazwihwigwa tjinoshingwa nge nthu iwoyu Paulo. Kati midzimu yakabezhiwa nge bathu ate ili midzimu dumbu, ndizo wakatubula kugadzamoyo bathu banjinji kabatungamilila ntome kose muno mu Efeso ne mu ntuthu wose we Ezhiya. 27Ndizo kuna mbhatsha dze kuti nshingo wedu iwoyu ube ne zina lakabipa. Ate ikoku koga, kuna mbatshabo dze kuti ng'umba ye ndzimukadzi nkulu Aritemisi inowolengudzika nge kuti unowodelusiwa mu bukulu gwawo, ndzimukadzi unonamatiwa nge mmwe ne mmwe mu Ezhiya ne mu shango yose!”
28Bakati behwa matama iyawa, bakazhala bushongola bakatangisa kumimila beti, “Nkulu Aritemisi we Baefeso!” 29Zhoba ikayenda nge nzi wose. Mbunga wose ukalabuka ukangina mu ng'umba ye mizano ukazuzuta Gayo na Arisitako be Makedoniya ibo bakabe beyenda na Paulo mu njendo dzidze. 30Paulo nge kukwe wakabe eshaka kungina pakati kwe mbunga, koga badiyiwa bakasin'dumile. 31Bamwe be babusi be Ezhiya, bakabe bali bazwalani babe, bakayisa thumo kunli benkumbila kuti asitongo zwilakidza mu ng'umba ye mizano. 32Mu tjibaka itjetjo gubungano lose lakabe lili mu phipiti, bamwe bathu bakabe bemimila beleba tjabanoleba, bamwe bemimila beleba tjipoga, ngono bunji gwabo gwakabe gusingazibe kuti bakubunganilani. 33Bamwe be bathu ipapo bakatola kuti Alekizanda wakabe ali iye u nlandu, se Bajuta bakanthama kuti ayende mbeli. Ipapo Alekizanda kalakidza nge luboko kuti bathu banyalale, ngono kagwisa kulebeleka ezwimila. 34Koga bakati beziba kuti Njuta, bakamimila bose beleba tjithu tjing'ompela mu awara mbili beti, “Aritemisi we Efeso ndiye nkulu!”
35Ku bupelo nkwalili we nzi katubula kudzikamisa mbunga. Kati, “Bakanyi kwedu Baefeso! Mmwe ne mmwe unoziba kuti nzi we Efeso nlondolodzi we ng'umba ya Aritemisi nkulu nenge bgwe lakayengemala lakawa lidwa kudzimu. 36Aapo ungalandula zwithu izwezwi. Ndizo makafanila dzikama, musithame tjimwe nge phupu. 37Mazhisa balume ibaba ngeno nenguba basatolela ng'umba dze midzimu yedu kene kuli kuleba tjakabipa ngekwe ndzimukadzi wedu. 38Ha Demetiriyo ne bashingi babe bana nlandu wabanopa mmwe, mabazhe akazhuka ne balauli bayapo ndizo ngabatjetane. 39Koga ha kuna tjimwe kakale tjamunoshaka, pana itjetji tjowolulwamisiwa mu gubungano le babaki bamuno kuyendidzana nge nlayo. 40Ngobe ngekwe tjashingikala nasi, kuna mbatsha dze kuti tingatjetegwa phipiti. Akuna dama latingaleba labanga zhoba iyeyi.” 41Kati aleba ikoku kapaladza nshangano.
ప్రస్తుతం ఎంపిక చేయబడింది:
Mishingo 19: KBTP
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Kalanga Bible © Bible Society of Botswana, 2008, 2018.
