Aromayi 10
10
1Əmi aza ayeyeyi, azanugbai n anyikwozai, əmi ədu ɓəmwi n aduwazhnii ga Shekwoyi ntu Aisrailayi ɓo, əkwo nu nge, ń ɓa ɓə kwu zhni apwopwoyi. 2Ntuge mi ɓa myi ma gbmi ɓa əɓo nge ɓa n əwyei nyinyíi lo, ntu Shekwoyi əɓo, ama wyenyi ye, too lo ntu n ɓəyekpe ɓo nu m. 3Shikwonyi ɓa to ɓə kpe Shekwoyi ɓəfyecezhni əye m, ntucenu ɓa zhnatna ɓa shi əɓahni nya, ɓa to ɓə n əɓahnii ga fyi n Shekwoyi ɓəfyecezhni m. 4Kirisiti nu zhni owa acezhiba, nabai ń a ɓa ɓwa ɓəfyecezhni ga zahozahoyi ń wo ga gaiciya.
5Mwusa kanya ye ntu ɓəfyecezhni ɓo nu ń kwo vyi owa nyi: “Əza n wo zhni aɓo ye, wo ɓa gyianyì n ɓai nu.” 6Ama ɓəfyecezhni n kwo gbmiɓe ń gaiciyaga, kwo gna: “To da dna n əho ədu, ‘Nyika nu ɓa gwnulo əshemi a?’ ” (n kwo nu gyi nge woo shnizhi ɓe n Kirisitii), 7“kwo ‘Nyika nu ɓa kadna shnilo abaloloi tnaceshiba a?’ ”(n kwo nu gyi nge, woo gbmiɓe n Kirisitii ń əfyí). 8Ama kwa gna ge nanu a? “Ɓədagbma wo lo vyivyiwyi n hoi; kwo dnalo n əho əgbe ɓədo n əho ədui,” əkwo nu zhni waazi n yi dnawyi ntu gaiciyaganunui ɓo: 9Ń ha da n əho əgbei, “Yeisu zhni Dagayi nu,” jesnu haa gaiciyaga dna n əho ədu nge Shekwoyi ɓə la wo laka n əfyí, ho ɓa pwo. 10Ntuge n əho ədui nu n ho ga gaiciya, a kpma ho aɓoya, jesnu n əho əgbei nu n ho da əho gaiciyaganunui ɓo, ha pwo. 11Shi Nyakagyigyiyi ncei da lo, “Zahozahoyi n wo ga gaiciya n wo, vnyinkwo taa wo wo m, kpeekpe.” 12Ntuge Yahudiyi to kakai lo n Abyedoyii m, Dagayi gbmanyi nu zhni Dagayi tu n əɓa tukwo vnyanya, woi kpe aza vnyanya anabəlika n ɓa zna wo shni, 13ntuge zahozahoyi n wo yi Dagayi əye, wo ɓə la pwo.
14To nsaiye, aza ɓa yi əza n wunanu n ɓa too ga gaiciya dna n wo ma a? Njesnu ɓa ɓá ga gaiciya n əza n wunanu n ɓa to wo əwo əɓo ma a? Njesnu ɓa ɓá wo n wunanu ntna əza n wo ɓa zhni waazi ga ɓa a? 15Njesnu ɓa ɓá zhni waazi n wunanu to ai tnu ɓa nu ma a? Ngye she kwo kafyilo nyi: “Ho gyelo shi aza yi apita n bmyabmyai n ɓa ɓe n nabagyi manai nyi!”
16Ama Aisrailayi vnyanya nu to ɓə gwo nabagyi manai m. Ntuge Ishaya ɓə kwu da, “Dagayi, nyikanu ń la gaiciya ga n əyi ɓədatnu a?” 17Ntulonu, gaiciyaganunui ɓe n waazi wowoi nu, jesnu a wo waazi dna n ɓədagbma nu ntu Kirisiti ɓo. 18Ama mi nyaɓo lo: Ɓa to ɓə wo nu m? N kwnusnu, ɓa ɓə kwu wo:
“Əɓa ɓədatnu ɓə la lapwi fyi n əknyi vnyanya,
əɓa ɓədagbma kwa kwu si anyìcezhiba.”
19Ama, mi nyaɓo lo: Israila to ɓə ɓwa awyega nu m? Kpmisnui, Mwusa ɓə gna,
“Mi ɓa zhni fye fya woshe n aza yii n ɓa to zhni əbye nu m;
Mi ɓa zhni minagyi kwa gyi fye, n əbyei n kwo to n awyegai lo m.”
20Nlonu Ishaya daɓo lo n əgbei myimyii,
“Aza yi n ɓa to ɓə zna mi shni nyi m, ɓà ɓə la mi ɓwa;
Mi ɓə la əmihni kpeyawu aza yi n ɓa to ɓə nya mi əɓo nyi m.”
21Ama ntu Israila ɓo, wo gna lo,
“Dna n wyizo vnyanya, mi la əmi aɓwa kpeyawu
aza atnaɓəgbetuvyiyi n atukwognanakwoyii.”
ప్రస్తుతం ఎంపిక చేయబడింది:
Aromayi 10: GNB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.