Lomɛ́ŋ 13
13
Kuɔ́pinɔn ɔŋgɔ́munɛ
1Mɔɔnd kitikit ɔ́ɔ́pinɔn pɔɔŋgɔ́munɛ pɛnyɛɛ́ kɔ́ ɔnyɔ́lí, á kiákí ɛ́ɛ́ pufuŋ óókoólinon ku Támbák, wɔ́ umɛɛ́tɛ́k epé péendesíé. 2Ewú utiányípá wɔɔ́pinɔn ɔŋgɔ́munɛ tipá wɔɔ́pinɔn Támbákɛ́ɛ, epé kɔk pátiányípá pɔ́ɔ́pinɔn Támbákɛ́ɛ áányítáŋap inséésítényí. 3Á kiákí ɛ́ɛ́ pátipá pétííne pesúmbí moónyi aká ɛɛlɛnɛ́ peseé, ɛsiɛ́ aká ɛɛlɛnɛ́ kilɔk. Atipá aamba ɛ́ étííne ɔŋgɔ́munɛ á? Ɛɛlɛ́ peseé pɛɛnd kekupísiimesi, 4á kiákí ɛ́ɛ́ panyɛ á pusɔ́m pú Támbákɛ́ɛ pékutítiken é peseé. Maná índɛ ɛɛ́kɛlɛ kilɔk, tííne. Á kiákí ɛ́ɛ́ pútipá sɛ́kísɛ́k pápianɛ́ yɔɔ́nɔnɔ́ í pitíí é kuséésitenyi, Pányɛ ó puólí pú Támbák é kutíínyi ilópi yɛ́ɛ́yɛ́ ká afafál. 5Kɔk púnyɛ peseé ɛ́ɛ́ ápá kí iŋɔ́pinɔ, kútipá kɔ́ɔ́m ɔ́ kupínɔɔn ilópi í Támbák, maná kááwɔ é peseé é kiyeéwe kí ɔtɛ́m. 6Púúpú nuandá anaman lemfúe; Epé pákúsanɛ́ pɔ́ Támbákɛ́ɛ umaáyɔ́ɔ́n pɔ́ ɛ́ɛ́ pɛ́ɛ́lɛ pusɔ́m pukáánɛ́. 7Énuekényí sikɛ mɔɔndɛ epú púnyɛɛ́ púɛ́yɛ́. Lemfúe, táásiɛ, iŋɔ́pinɔ, nuum, sikɛ mɔɔndɛ epú nupianɛ́ɛ wɔ.
Niɔyi panúɛ na panúɛ
8Tɛ mɔɔnd utinúówún ɔɔlɔ́, ɛsiɛ́ ú kuɔyinɔn panúɛ na panúɛ; á kiákí ɛ́ɛ́ ewú wɔɔyɔɔnɛ́ɛ wɔɔkúɔ́p mowóónyí kikotí kitikit. 9Á kiákí ɛ́ɛ́ pikotí: ɛtiɛndɛ́t isɔm, ɔtiɔ́n, etiép, atipísámɛ́t, no pikotí kitikit, óópíwóónyosi á nukál enue: Ɔyɔ́ waakúán ɛlɛɛ́ aŋɔ́ muɛ́t. 10Ewú wɔɔyɔɔnɛ́ɛ tipá wɛɛlɛ wɔɔkúɔ́p kilɔk: Iŋɔyɔ kɔk nyɛ kuwóónyi kú pikotí kitikit. 11Aná panɔ́ muɛ́t numenyené kisikɛl tunyɛɛ́ á kɛ́ɛ: Índɛ́ kisikɛl kí kuɛnyɔk ɔ́ tunɔ́ ekie; Á kiákí ɛ́ɛ́ ínanɔ ewe, kisótio nyɛ masíá naasɔ́ kutápɔk kisikɛl ekí tumaátáp. 12Putúk kanyɛ putápúkán, kuɔ́m kɛɛ́kɛt kúpál. Túpílɛŋunɛ melíe mí imbíne, túpísɔnɔ mɛlɛŋ mé pitíí, mé kisie. 13Tuɛ́ndɛ kí indɛ́ndɛ́nɛ, ɛlɛɛ́ kɔ́ ɔtɛ́m ú puɔ́s, kááyɛ́ no ɔndundɔ́, tɛ kuótukon makɛp, puamba ne kuwéemb, iŋɔ́mɔn na muák. 14Maná ɛ́nupílɛŋɛ́ Ɔkɔ́n Yésus kilíise, nutikɔ́lɔ́n kisikɛl nɔ nuɔ́l ó kuwóónyosi pilɔ́ɔ́ŋɛ́t píɛ́yɛ.
ప్రస్తుతం ఎంపిక చేయబడింది:
Lomɛ́ŋ 13: yav
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2026, CABTAL