Luke 23
23
Jesus e kavena kia Pilate
(Mat 27.1–2; 27.11–14; Mak 15.1–5; Jon 18.28–38)
1Te kano fenua kaatoa rei ne feturaki ake ki runga, o kave ko Jesus kia Pilate. 2I ngangea ne ratou tauia iei, o mmuna, “Ne matou maua riaina ko te tangata nei e nai takina sara ko tatou kano fenua, e usu usu kia ratou ka see tauvi taakisi ki te Empra o nga Roman, ma e muna maso koia te Ariki Fakaroro, te Tii.”
3Ta fesiri atu rei ko Pilate kia Jesus, “Ko kee te tii o nga Jew?”
Tongoi atu rei ko Jesus, “Teenaa rei ko kee e muna iei naa.”
4Tera ko Pilate muna atu rei ki nga ariki fai kava ma te kano fenua, “Kuou si se ne kau maua ria ko se atamai ma te tangata nei ke sara iei.”
5Kae koratou ne meeaki faka makeke rei, “Koia naa, tana faka taki featunga ki te kano fenua e maatea rei i ana fakaako ranga i roto Judea kaatoa rei. Koia ne fakatafito i Galilee, kae vasia nei ku au ki kunei.”
Jesus e kave kia Herod
6Vasia o Pilate ne rongo kiei nei, fesiri rei koia, “Nai te tangata nei te foi Galilee?” 7Vasia ku nai iroa ina ko Jesus mai te motu ngangea e fakarongo kia Herod, koia ne nai fakkauna ke kave kia Herod, koia fokia i Jerusalem i te vasia. 8Ko Herod ku maatea rei na vaki vaki ku fekitei kia Jesus, natafito koia noko rongo kiei, kae maatea rei na fifia ke ono mata kiei. Ku roa rei ko na vasia ma tana nofo maanatu ke ono kia Jesus ke fai fekauaki ko ni furisanga. 9Tera ko Herod e rava rei ko ana fesiri siri anga kia Jesus, kae ko Jesus siei rei se foi taranga ne nai tongoia ria. 10Nga ariki fai kava ma nga fakaako oa Fono, koratou ne feturaki ake o mmuna faka teke teke ma ratou ngutu kia Jesus. 11Herod ma tana kano faoa tau, ne ratou fai faka kata ria ko Jesus ma ne ratou ngongotia riaina. Ne ratou faka raakei ria kia suru o nga ariki, fakkauna rei ke foki o poi kia Pilate. 12Tera i te aso, ko Herod ma Pilate ne tafito rau tau soa, natafito i vasia ku oti koraua noko fefiri aki.
Jesus ku tukuna ke tamatea
(Mat 27.15–26; Mak 15.6–15; Jon 18.39—19.16)
13Pilate ne nai karanga tia ko nga ariki fai kava, ma nga fakarongo ranga, ma te kano fenua ke taanaki mai, 14o muna atu kia ratou, “Te tangata ne aumai ea kotou kia kuou, ma kotou e mmuna e nai takina ko te kano fenua ki te sara. I vasia, ne maataki ea kuou koia i otou vasia rei i kunei, si se ne kau maua ria pe nia ma ana ne fai sara i otou sara e tukuaki kiei nei. 15Ko Herod fokia se ne nai faara sia ko ni sara ma ana, teinei arei ne nai fakkauna ke foki mai kia tatou. Siei rei pe nia ma te tangata nei ne fai sara tera ke tamatea iei. 16Kuou ka sasa fuarei koia, tera tuku raa ke poi.” 17[I nga Kai kai o te Faka sara anga kaatoa, ko Pilate e faka masara te nea fakkiro sokotasi ki te kano fenua.]
18Te kano fenua kaatoa rei ne foorua fangatasi ake, “Tamatea ria koia naa! Kae tuku mai kia matou ko Barabbas!” 19(Barabbas ne tukuna ria ki fare pono pono, koia te tangata ne faka taki featunga i te noforanga lasi, ma ne taa taangata.)
20Ko Pilate ku fifia rei ke faka sao ki tua ko Jesus, tera koia ne nai karanga tiaina ko te kano fenua foki. 21Kae koratou ne foorua ake o karanga, “Tamatea riaina koia naa! Tamatea riaina koia naa!”
22Pilate ne muna atu faka toru kia ratou, “Kae sea rei tana sara ne fai? Kuou si se kau maua ria pe nia rei ma ana ne fai sara ke tamate iei! Ka sasa ea kuou, ma e tuku rei ke poi.”
23Kae koratou ne foorua lasi rei ki runga ia ratou reo, ko Jesus ke tukia ria ki fongo raakau, ma a ratou reo ku faka okotia riaina. 24Tera ko Pilate ne nai tukuna ko Jesus kia ratou pe nia ma ratou ne kaaisi kiei. 25Koia ne nai faka masara ria ko ratou tangata ne fifia kiei, te nea ne tukuna ria ki te fare pono pono, ne faka taki featunga ma ne taa taangata, kae nai tukuna rei ko Jesus ke fai kiei ratou fifia.
Jesus e tukia ki te raakau
(Mat 27.32–44; Mak 15.21–32; Jon 19.17–27)
26Nga faoa tau ne ratou kave ina kese ko Jesus. I vasia oratou e oro iei, ne ratou fekitei akina ko te tangata mai Cyrene, na ingoa ko Simon, koia e au ki te noforanga lasi mai take potu fenua. Ne ratou faka oso fia ria ke amo ko te raakau o Jesus i ana tua. 27Te kano fenua e tautari atu kiei. Ia ratou ko rake maatua faafine, koratou e ttangi fai fai ngutu ia ratou arofa kiei. 28Jesus ne tafuri ake kia ratou, o muna atu, “A maatua faafine o Jerusalem ee! Kau see ttangi mai kia kuou, kae ttangi kia kotou ia, ma ki otou tamariki. 29Natafito koa aso e au, i vasia o te kano fenua ka mmuna: ‘Ku sao ko nga maatua faafine paa, koratou si se ne fai tama, koratou si se ne ratou faka saerea!’ 30#Rev 6.16.Tera te vasia o te kano fenua ka mmuna ki nga maunga, ‘Singa ifo kia komatou!’ ma ki nga ngangea matike tike, ‘Fuu mai komatou!’ 31Kae pea nea faka peinei e faia i vasia o te raakau e mata iei, ia ka faia faka fefea rei i vasia ka paku paku iei?!”
32Koratou ne kave koa taangata fai fai sara e toka rua, ke tuku ki te mate ma Jesus. 33I vasia oratou ne oomai ki te ngangea e ati “Te Pokouru”, ne ratou tukia riaina ko Jesus ma taangata fai fai sara kia fongo oa raakau, e taki tasi i ana faasi, take tangata i na faasi matau, take tangata i na faasi sema. 34Muna rei ko Jesus, “Faka ngaromia ina ko aratou fainga nei, Pa ee! Koratou si see ratou iroa ina pe nia ma ratou e fai.”
Koratou ne fai taakaro ke vaevae i ana suru. 35Te kano fenua ne turaki o mata, i mo vasia oa fakarongo ranga o nga Jew e fai faka kata kiei, “Koia noko nai faka saofia ko rake nea! Tuku rei mua pe faka sao maso koia, siki koia te Ariki Fakaroro ne faka patino e Tupua?!”
36Nga faoa reo fokia ne fai faka kata kiei. Koratou ne oomai o sori koa waeni kona kiei, 37ma ne muna atu, “Kae ko kee te Tii o nga Jew, faka sao maso ko kee!”
38Koa foi taranga nei ku tusia ria i ana arunga: “Teinei te Tii o nga Jew.”
39Take tangata fai fai sara ne muna teke kiei, “Ko kee siki te Ariki Fakaroro? Faka sao kotatou!”
40Kae take tangata ne muna atu kiei, “Kau see muna faka peenaa. Ea, ko kee si see mataku ki Tupua? Kotatou kaatoa i te fakataunga sokotasi. 41Kotaua ia e tonu fuarei, natafito kotaua e faia ria i tau kee tukunga pariki, kae koia ia siei pe nia ma ana ne fai sara.” 42Tera koia ne muna atu kia Jesus, “Faka maanatu mai kia kuou i tou vasia ka au ki tou Kainanga iei.”
43Muna atu rei ko Jesus kiei, “Kuou e faka ari atu kia kee te maori: I te aso nei ko taua kaatoa ka fare i Parataisi.”
Te mate o Jesus
(Mat 27.45–56; Mak 15.33–41; Jon 19.28–30)
44Ku piri ki te raa ke fuanga furu ma rua, i vasia o te fenua ne purou ria ki te kau pouri ngiti rei, oko rei ki te raa e toru, 45te suru fokia e sisi i mataa Paito Tapu ku masae rua. 46Jesus ne tangi forua ake ki runga, “Pa ee! I ou rafi rima kuou e tuku atu toku mauri!” Koia ne muna faka peinei, kae mate arei.
47Te tangata fakarongo ranga o te kano tau ne ono mata pe nia ne faka sasa, ma ne rausapai ki Tupua o muna, “E tonu rei, koia nei te tangata laoi!”
48Vasia o te kano fenua koratou ku turaki o mata, ne ratou ravea ria koa nea nei, koratou kaatoa ne foki ki aratou noforanga, e tuki ko aratou fata fata i aratou arofa. 49#Luk 8.2–3.Ko faoa kaatoa ku ratou iroa laoi rei ko Jesus, ma nga maatua faafine ne tautari atu kiei mai Galilee, e turaki mmao mai rei, o ono mai kia nea nei.
Te tanu anga o Jesus
(Mat 27.57–61; Mak 15.42–47; Jon 19.38–42)
50Ia vasia te tangata na ingoa ko Joseph, e kau i te Kau Fono fono o nga Jew. Koia te tangata laoi ma e tonu. 51Koia si se ne kau ia ratou atamai ma ratou fainga. Koia e au mai te noforanga i Arimathea te taoni i Judea, ma koia e fetari rei ki te Kainanga o Tupua. 52Koia ne poi kia Pilate o kaisi ki te tino o Jesus. 53Sau ifo rei ki raro ko te tino, o ruru kia suru, ma ne tuku ki te rua ne foto mai te mato. Te tano siei pe koai ne tanumia kiei. 54I te aso ai, te Aso Rima, ma te Aso e tapu o nga Jew ku tafito ke fai.
55Ko nga maatua faafine, koratou ne tautari mai kia Jesus mai Galilee, ne oro ratou ma Joseph, ne ono ki te tano o Jesus, ma na tino ne tuku ki roto. 56Tera koratou ne foki ki aratou noforanga, o pena pena mai koa sua sinu ke faka male na tino.
I te Aso e tapu koratou ne maanava, tautari kia Fono.
ప్రస్తుతం ఎంపిక చేయబడింది:
Luke 23: TKP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2025 Wycliffe Bible Translators, Inc.
