Ansa 4
4
Odoki o cicoꞋo wa̱ a̱ɗa̱nga̱ni
1Muku n va̱, panai kuyotsongusu ku va̱ mpa esheku a̱ ɗa̱.
zuwai ugboji, i ciya̱ kuyeve.
2M piꞋisaka ɗa̱ ta̱ ilisingai
adama a na nannai
ka̱ta̱ i ka̱sukpa̱ kuyotsongusu ku va̱ ba.
3A ayin a na mi ishi maku a kpaꞋa ke esheku a̱ va̱,
ana mi maku me te gba̱ɗa̱ wa̱ a̱na̱ku a̱ va̱,
4u piꞋisaka mu ta̱ u danai,
<<Reme kadanshi ka̱ va̱ n ka̱ɗu kete,
vu tono kadanshi ka̱ va̱ vi ta̱
a̱ kuciya̱ wuma.
5La̱nsa̱ cicoꞋo, la̱nsa̱ kuyeve,
ka̱ta̱ vu cinukpa n kadanshi ka̱ va̱
ko vu ka̱sukpa̱ kaꞋa ba,
6Ka̱ta̱ vu ka̱sukpa̱ cicoꞋo ba,
ci ta̱ e ku ere wu,
ciga tsu ɗa, ci ta̱ tana a̱ kula̱na̱ wu.
7CicoꞋo tsu laꞋa ta̱ ili ra̱ka̱,
adama a nannai la̱nsa̱ cicoꞋo,
ko yaꞋin ɗai baci tsa kulyaꞋa wu la̱nsa̱ tsu ɗa.
8Ciga tsu ɗa, ci ta̱ a kuneke wu tsugbayin.
oɓongu tsu ɗa, ci ta̱ tana e kuneke wu tsugbayin.
9Wi ta̱ a ku okpo wu an ma̱kuꞋun
ma tsugbayin a kaci ka̱ nu,
wo okpo wu tsu okolokolo a tsugbayin.>>
10Pana maku ma̱ va̱, vu ushuku n ili i na n danai,
a̱ya̱ a wuma a̱ nu kpamu i ta̱ o ko okpo n ka̱bunda̱i.
11M piꞋisaka wu ta̱ uye u cicoꞋo,
ɗa n tonoi n avu a uye u mejege.
12Ayin ana vi a nwalu, babu ili i na i kukpada wu,
ayin ana vi a ilaɗi, vi a kuta̱ɗa̱tsa̱ ba.
13Ɓa̱na̱ kadanshi ka nanlo ka,
ka̱ta̱ vu ka̱sukpa̱ ka̱ fa̱ta̱tsa̱ wu ba,
ere kaꞋa mayin, adama a na ɗaɗa wuma u nu.
14Ka̱ta̱ vu uwa uye wa aza gbani-gbani ba,
ko vu tono uye u uma a gbani-gbani ba.
15Suma ka gbani-gbani,
ka̱ta̱ vu wala a uye u ka gbani-gbani ba,
kpatala vu ka̱sukpa̱ u ɗa,
vu yaꞋan nwalu n nu.
16Adama a na uma a gbani-gbani a tsu lata ba,
sai a yaꞋan ka gbani-gbani,
a tsu lata ba, sai a zuwa vuza yoku
u ta̱ɗa̱tsa̱ u uka muna.
17Ka gbani-gbani ki ta̱ ci ilikulyaꞋa we le,
vishili kpamu tsu ma̱kya̱n ma kalam we e le.
18Uye wa aza a usuɓi wi ta̱
tsu kutashi ku wuti u kanna,
kuka̱na̱ kudoku ali ku yawa kanna a kaci.
19Ama uye wa aza gbani-gbani
wi ta̱ tsu ka̱yimbi ka kpaɓam,
e ci yeve ili i na i tsu zuwa le ku ta̱ɗa̱tsa̱ ba.
20Maku ma̱ va̱, pana ili i na mi a kudansa,
zuwa atsuvu mayin vu pana kadanshi ka̱ va̱.
21Ka̱ta̱ vu ka̱sukpa̱ kaꞋa ka̱ fa̱ta̱tsa̱ wu ba,
zuwa kaꞋa a ka̱ɗu ka̱ nu,
22adama a na wuma u ɗa,
wa aza ana i a̱ kula̱nsa̱ le.
m ma̱ta̱na̱ a ikyamba i vuma ra̱ka̱.
23Ere ka̱ɗu ka̱ nu n utsura u nu ra̱ka̱,
adama a na ta punu wuma u tsu uta̱.
24Vu ka̱sukpa̱ kadanshi ka̱ ma̱ya̱nsa̱ka̱ a̱ una̱ u nu,
yaꞋan daꞋangi n kadanshi ka gbani-gbani e kelentsu ka̱ nu.
25Shamgba a ukuna u mayun u nu
vu zuwa a̱shi a̱ nu a ili i na yi kelime ka̱ nu mayin.
26Vu yeve mayun ubuta̱ u na ene a̱ nu i o kutono,
vu tono uye u na wi mayin.
27Ka̱ta̱ vu katsukpa ugula̱ ko usingai ba,
vu ere ka̱ci ka̱ nu a ka gbani-gbani.
©️2025 Language Development and Translation Initiative (LDTI)