1 Korɛnte Siè 3
3
Ɓɛ̀ ńdɛsĩ̀riè ɛ́ iè Dɔfĩn tɔntɛ́riè
1Kìe zɛ̀ɓɛ̀, ń hàarí ɛ́ yí dàń yí khɛ́ àá miɛ kɛ̀a ie nìɛ lɛ ɛ́ Dɔfĩn Mɛkɛ̃ni ɛ́ te hiɛhɔ́ dú, kɛ́ ń den hàarí khɛ́ àá miɛ kɛ̀a ie nìɛ lɛ ɛ́ iè peɓɛ̀ nìnbí-yáamu bòo lɛ ɛ́ hɔ́ wɛ ɛ́ ɓɛ́ bɔ̀ máahṹ, kɛ̀a ie zĩncãahɛ̃ hɔ̀ ńdɛsĩ̀nlɔ́ hũn. 2Hɔ̀ hàarí iè yɔmu ɛ́ ń lɛ́ miɛ ǹ nɛ mi ɲu, kɛ́ hɔ́ yí dínlɔ́ lɛ ɛ́ lì wɛ̀. Iè hɔ̀ lɛ ɛ́ mí den hàarí yá dàń hɔ́ wɛ̀. Ɛ́ hɛ̀rí kɛ̀a zoòni ɛ́ mí den pɛ́wi ɲɛùn yí dɛ̀ hɔ̀, 3iè hɔ̀ lɛ ɛ́ mí den pɛ́wi iè mì nìnbí-yáamu bòo lɛ ɛ́ hɔ́ wɛ ɛ́ mí bɔ̀ máahṹ. Lè yanlienú àá hɔ́ fuò ɛ́ den wi mi tĩ́ihṹ. Ɛ́ mí iè pe wo ɛ́ zɛ̃́ní kɛ̀amu kɛ́ hɔ́ iè mì nìnbí-yáamu bòo lɛ ɛ́ hɔ́ wɛ ɛ́ mí bɔ̀ máahṹ lò! Mí iè pe wo ɛ́ zɛ̃́ní kɛ́ mí wóò dàá míte ɛ̀ ɓáaníɓán àá mí nìnbí-yáamu lò! 4Ɛ́ hɔ́ lɛ ɛ́ mí tĩ́ihṹ ádɔ̀ ɛ́ wóò zɔ bie nɛ: «Ǹpe bòo ɛ́ sɛ̃̀ Pooli ǹ», àdɔ̀ ɛ̀ ɓiɛ̀ khíi bie nɛ: «Ǹpe bòo ɛ́ sɛ̃̀ Apolɔɔsi ǹ», ɛ́ hɔ́pe sí ɛ́ yí hɔ́pe mì nìnbí-yáamu wérɛ ɛ́ mí ɛ́ wé kɛ̀a mu?
5Apolɔɔsi ɛ́ iè wíeni, ɛ̀ ǹpe Pooli ɛ́ iè wíeni? Kèpe kè kùi ɛ́ iè Dɔfĩn tɔntɛ́riè lɛ te miɛ ɛ́ bɔ̀ hɔ̀ ńdɛsĩ̀nlɔ́ wṹn lɔ̀n. Ɛ́ képe àá ké nì-cóohɛ̃ ɛ́ hɔ́rɔ ɛ́ wóo tɛ́ hɔ́ tɔnlɔ́ lɛ á Ɲunsɔ ɛ́ dɔ́ piè núnú hũn. 6Ǹpe ɛ́ zù hɔ̀ bòo, ɛ̀ Apolɔɔsi ɛ́ hɛ̃un hɔ̀. Kɛ́ Dɔfĩn ɛ́ temu lɛ́ ɛ́ hɔ́ dàa siɛ lɔ́. 7Ɛ́ kɛ̀amu, á yí-e lɛ ɛ́ zù hɔ̀ bòo àá ɔ́lɛ ɛ́ hɛ̃un hɔ̀ ɛ́ temu iè bòo hie, kɛ́ Dɔfĩn lɛ ɛ́ temu lɛ́ ɛ́ hɔ́ dàa siɛ lɔ́ ɛ́ temu iè ɔ̀pe. 8Àlɛ zù hɔ̀ bòo àá ɔ́lɛ ɛ́ hɛ̃un hɔ̀ ɛ́ màamán. Ɛ́ Dɔfĩn ɛ́ ɓén lɛ́ hɔ́rɔ sàanín ɔ̀ ǹ ɛ́ ɓáaníɓán à piè tɔnlɔ́ lɛ á tɛ́. 9Kèpe ɛ́ den iè Dɔfĩn tɔntɛ́riè lɛ ɛ́ páa pehɔ̀ lɔ̀n ɛ́ dàa ɛ́ pehɔ̀ tɔnlɔ́ ɛ̀ tɛ́, ɛ̀ mìpe ɛ́ iè pehɔ̀ mún. Mí iè hɔ̀pe Dɔfĩn zũnù lɛ ɛ́ Hɔ́ ɛ́ te.
10Ɛ́ ɓáaníɓán àá lé hiì lɛ ɛ́ Dɔfĩn ɛ́ wɔ́ àá mi, ɛ́ ń ɲɛ̀ lè zũnù fìi kɛ̀a zũte lɛ hɛ̀ dũ mí tɔnlɔ́. Ɛ́ nìnbí-ɓuɛ̀ ɛ́ ɓɛrɛ tɔn lè toohɔ́ pelè lɔ̀n ɛ́ yòoniɛ. Kɛ́ hɔ́rɔ ɛ́ den sãawi à wóo pɛ míte sãàní àá bòo lɛ á dàa ɛ́ lè toohɔ́ ɛ̀ te yòoní lépe zũnù fiì lɛ ɲɛ̀ vɔ́ lɔ̀n. 11Ɛ́ lépe zũnù fìi lɛ ɲɛ̀ vɔ́ ɛ́ iè Yiezu Kirisa. Ɛ́ nìnbírɔ dɔ̀ ɛ́ yí bĩniɛ dɛ̀ zũnù fìi dɛ̀ɓuɛ̀ yá ɲì wɛ̀. 12Ɛ́ ɓɛ́ nìnbirìe dɔ̀ ɛ́ den iè hɔ́ sɛ̃́ní tàá màa tàá sɛ̃̀nlɛ̀a lɛ yaamu hie ɛ́ ɓɛ́ ɓén khui ɛ́ dàá te lepe zũnù fìi lɛ ɛ́ ɲɛ̀ vɔ́ lɔ̀n, ɛ̀ ɓɛ̀dɔ̀ ɛ́ ɓiɛ̀ ɛ́ wé dãahĩ́ tàá ńmíimìí tàá bùkú ɛ́ ɓɛ́ ɛ́ khui ɛ́ dàá te pelè lɔ̀n. 13Kɛ́ hɔ́rɔń nìnbírɔ tɔnlɔ́ lɛ á tɛ́ ɛ́ ɓén zɔ̀n dɔ̀ ɛ́ lé yíe kè Ɲunsɔ khũ̀á ɓénlɔ́ zɔn. Ɛ́ pehɔ̀ zɔn, ɛ̀ hɔ̀ dṹn ɛ́ temu ɓén zɛ̃ní hɔ́rɔ tɔnlɔ́ bòo lɛ ɛ́ hɔ́ te dàa dɛ̃̀. 14Kɛ́ nìnbírɔ dɔ̀ bòo lɛ á tɔn yòoniɛ lèpe zũnù fìi sɔ lɛ ɲɛ̀ vɔ́ lɔ̀n ɛ́ hɔ́ dṹn ɛ́ yí dàń ɛ́ yí cĩ̀ní, ɛ́ ɓàasɔ ɛ́ ɓén yí sàanín. 15Ɛ̀ kɛ́ álɛ tɔnlɔ́ ɛ́ zɔn cɛ̃̀ hɔ̀ dṹn hũn, hɔ́rɔsí ɛ̀ ɓàasɔ ɛ́ wo tɔ̀. Ápe kùusɔ ɛ́ pe wo ɛ́ fuen, kɛ́ hɔ́ den ɛ́ wé kɛ̀a nìnbírɔ lɛ ɛ́ zɔn kɛ̃nɛ lɔ́ hɔ́ dṹn pɔ̀nù hũn ɛ́ khie va lɔ́.
16Mí lò wo dũ sãàniɛ kɛ́ mí iè lè Dɔfĩn zunù, ɛ̀ lèpe Dɔfĩn Mɛkɛ̃n ɛ́ lò wo wi miɛ ǹ. 17Ɛ́ nìnbírɔ kɛ́ á yaakɛa Dɔfĩn zunù, ɛ́ Dɔfĩn ɓiɛ̀ ɓén yáakɛ ɓàasɔ. Iè hɔ̀ lɛ ɛ́ lépe Dɔfĩn zũnù ɛ́ den bòo hie hɔ̀pe Dɔfĩn cɛ̃̀un, ɛ́ mípe ɛ́ temu iè lèpe Dɔfĩn zũnù sɔ.
18Mì bí khɛ̃̀níkɛ mite wɛ̀. Kɛ́ mí tĩ́ihṹ ádɔ̀ ɛ́ lieníkɛ à nɛ mí dũ bòo lèpe dímíɲɛ́ lɛ nìɛ bɔ̀dũmunù vìi, ɛ̀ nɛ ɓàasɔ ɛ̀ wé míte àá bɛ̃́nbṹ bòo lɛ ɛ́ wé à den wé bɔ̀dũmunù ɓàasɔ àá bɔ̀bín. 19Iè hɔ̀ lɛ ɛ́ lépe dímíɲɛ́ lɛ nìɛ bɔ̀dũmunù ɛ́ iè bɛ̃́nbṹ yáamu Dɔfĩn híɛhɔ́. Ɛ́ sí iè hɔ̀pe ɛ́ hɔ́ dàa wɛ̃́ lé Dɔfĩn bienù vɛ̃hṹ ɛ́ nɛ làa: «Dɔfĩn ɛ́ wóò vĩ ɓɛ bɔ̀dũmunù ɓàasiè ɓɛ́ kùrú hɛ́ncín bòo hũn.» 20Ɛ̀ hɔ̀ lò bĩniɛ wɛ̃́ yán ɛ́ nɛ làa: «Ɲunsɔ ɛ́ dũ ɓɛ bɔ̀dũmunù ɓàasiè bɔ̀lieníkɛà, à dũ kɛ́ hɔ́ iè kã́amáà.» 21Ɛ́ nìnbírɔ ɛ́ yí sãawi à bè mí tĩì ɓɛ̀ nìnbirìe lɔ̀n ɛ́ dàá cɛ̀ mí yèrè wɛ̀. Iè hɔ̀ lɛ ɛ́ bòo míkùi ɛ́ bòo sɛ̃̀ mìpe ǹ: 22Á Pooli tàá Apolɔɔsi tàá Piɛre, lè dímíɲɛ́ àá lé mɛkɛ̃nì àá hɔ́ húmú àá hɔ́pe zoòni lɛ tàá hɔ̀ yírí, hɔ̀pe sí míkùi bòo ɛ́ sɛ̃̀ miɛ ǹ. 23Kɛ́ mípe mìkùi ɛ́ ɓiɛ̀ bòo ɛ́ sɛ̃̀ à Kirisa, à Kirisa ɛ́ ɓiɛ̀ bòo ɛ́ sɛ̃̀ hɔ̀ Dɔfĩn.
ప్రస్తుతం ఎంపిక చేయబడింది:
1 Korɛnte Siè 3: bwj
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 L’Association Nationale pour la Traduction de la Bible et l’Alphabétisation