Kenehe 44
44
Ko te Ipu na Galo
1Ka ko hēki tafa ia ata i te aho na hohoko ai, na fai ai te fakatonuga a Iohefa ki te kaukauna e pule i tona fale, kua lea vē atu ki ei, “Fakatūtumu nā taga a nā tāulelea i ni meakai, ki te lahi e mafai ke ofi ki loto, ma tuku lava te tupe a te tino ki loto i luga o tana taga. 2Tuku taku ipu hiliva ki loto i luga o te taga a to lātou uho tamaiti fakatahi ma tana tupe mo nā haito a ia.” Na fai uma e te kaukauna nā mea na fakatonu ake ai ia. 3Kua tafa mai ia ata i te vaveao, oi na uga ai loa te kau uho ke olo ma a lātou āhini. 4E hēki mamao talu te teka kehe atu o kilātou ma te kakai, kae lea ia Iohefa ki te kaukauna e pule i tona fale, “Fano vave oi tuliloa nā tāulelea nae i kinei. Kāfai e maua atu e koe, fehili vē ki ei, ‘Heā kua taui ai e koutou te lelei i te kino? 5Heā te kua kaihohoa ai e koutou te ipu hiliva a toku matai?#44.5 E fokotahi te fakaliliuga tuai Heā te kua kaihohoa ai e koutou te ipu hiliva a toku matai? E hē i loto o te tuhituhiga Epelu nā kupu iēnei Ko te ipu tēnā e inu ai, ma fakaaogā e ia ke ia iloa ai nā mea ka tutupu i te lumanaki. Kua fai e koutou he mea e matuā kino lahi lele!’ ”
6I te maua atuga e te kaukauna o kilātou, oi na lea ai ki ei i nā kupu lava iēnei. 7Na tali mai kilātou, “Te tamana, heā te kua lea vēnā mai ai koe? E hē mafai e ni tino fakatauvā e vē ko kimātou oi fai he mea vēnā. 8Kikila, ko tēnā lava e kē iloa na toe kaumai e kimātou mai te fenua ko Kanana, nā tupe na kimātou maua e pito ki luga o a mātou taga. E vēhea la ona mafai ke kaihohoa e kimātou ni hiliva pe ni aulo mai te fale o tō matai? 9Te tamana, kāfai he tino o kimātou e maua ki ei te ipu hiliva, ko te tino tēnā e tāmate, ma ko kimātou uma iēnei, ka kavea ma au pologa.”
10Kua lea atu te kaukauna pule, “Ko au e malie ki ei; kae nā ko te tino lava e maua na ia kavea te ipu te kā fai ma aku pologa, kae ko koutou uma ka fakahaoloto.” 11Oi na vave lele oi tuku ki lalo a lātou taga, ma tatala lava e te tino tana taga. 12Ma na kāmata ai oi vākili e te kaukauna nā taga a te kau uho, kāmata mai i te taga a te uho matua ke pa ki te taga a te uho tamaiti, ma na maua ai te ipu i loto o te taga a Peniamina. 13Kua tahae e te kau uho o lātou kofu i te fakanoanoa lahi. Oi na toe uta ai a lātou āhini, ma kua toe foki ki te kakai. 14Ko Iohefa koi te fale lava o ia kae papā atu ki ei ia Iuta ma ona uho. Kua pūnonou kilātou ki lalo ma ifo atu kia te ia, 15oi na lea atu ai ia Iohefa kia te kilātou, “Heā ko tā koutou kua fai? E hē koutou iloa ko he tino e ia te ia te pule e vē ko au, e ia mafaia oi kitea nā mea ka tutupu i te lumanaki? Heā te na kaihohoa ai e koutou taku ipu?”
16Na tali mai ia Iuta, “Te tamana, ka vēhea atu nei kimātou kia te koe? Ka vēhea nei he mātou tala e fai atu? Pe vēhea foki oi fakamāonia e kimātou kia te koe, e hēai he mātou mea hehē na fai? Kua fakaalia e te Atua te hehē o kimātou, au kaukauna. Ko kimātou uma la iēnei ni pologa e a koe, kae hē nā ko te tino oioti na maua ki ei te ipu.”
17Oi na lea atu ai ia Iohefa, “O, hēai! E hē mafai ke kō faia te mea tēnā! Nā ko te tino lava nae ia te ia te ipu, te ka kavea ma aku pologa. Kae ko koutou uma, toe liliu ma te fīlēmū ki te koutou tamana.”
Kua Tautala ia Iuta mo nā Uho o Ia
18Oi na hōhō atu ai ia Iuta ki tafa o Iohefa ma lea vē atu ki ei, “Te tamana, fakamolemole kō ia koe nā ita. Ko au tau kaukauna fakatauvā, e fia maua he avanoa ke faitala atu ai kia te koe; auā ko koe e tutuha lava ma te tupu ko Falao. 19Te tamana, na fehili mai koe kia te kimātou au kaukauna, ‘E iei he koutou tamana pe hētahi uho o koutou?’ 20Na tali atu kimātou, ‘E iei to mātou tamana kua matua lele ma to mātou uho tamaiti, na fānau mai ka kua matua to mātou tamana. Ko te uho la o ia kua oti, ma ko ia oioti te tama a tona mātua koi ola; ko tona tamana e alofa lahi lele ki ei.’ 21Oi na lea mai ai koe kia te kimātou au kaukauna, ‘Kaumai te tama kia te au, ke kikila au ki ei.’ 22Na tali atu kimātou kia te koe te tamana, ‘E hē mafai te tama ke fano kehe ma tona tamana; kāfai e fano kehe, e i nā kā oti ai tona tamana.’ 23Oi na lea mai ai koe ki au kaukauna, ‘Ko koutou e hē toe ōmamai oi kikila au, heiloga e ōmamai koutou ma te koutou uho tamaiti.’
24“I te toe fokiga o kimātou ki to mātou tamana, na taku e kimātou ki ei au kupu na fai mai. 25Ma i te lea maiga o te mātou tamana, ‘Toe olo oi fakatau mai ni nāi meakai mo kitātou,’ 26na tali atu kimātou ki ei, ‘E hē mafai kimātou ke olo; ka hē mafai kimātou ke fakataga ke olo oi kikila te tino, heiloga to mātou uho tamaiti e olo ma kimātou. E mafai oioti ke olo kimātou, kāfai to mātou uho tamaiti e kave e kimātou.’ 27Oi na lea mai ai to mātou tamana, ‘E iloa e koutou e toka lua oioti oku ataliki mai taku āvaga ko Lahela. 28Ko tētahi kua fano kehe ma au. Hōvē nei pe na hae valevale tona tino e ni manu fekai, auā e hēki toe kō kitea talu te fano. 29Kāfai nei ka kave e koutou toku ataliki tamaiti kae tupu ki ei he mea, ko te fakanoanoa ka fakauta mai e koutou kia te au, e i nā kā mate ai lava au, auā ia au kua matua.’ ”
30-31Kua toe lea atu ia Iuta, “Ko te mea la ia, te tamana, kāfai au e toe foki ki toku tamana kae hē toe kavea e au te taumalo, e ia kitea mai lava ko te taumalo e hē ōatu kimāua, oi e uma ai lava tona ola i te taimi tēnā. Ko te ola o ia e fuhia fakatahi ma te ola o te taumalo ma kua matua foki, ma ko te fakanoanoa ka kimātou fakauta atua ki ona luga, ka uma ai lava tona ola. 32Ko tētahi mea, na fai taku takutinoga ki toku tamana ko te taumalo e puipui e au i toku ola. Na lea au ki ei, kāfai e hē toe kavakea e au te taumalo kia te ia, oi ka pakū mai pea lava ki oku luga te kino, i toku olaga kātoa. 33I te taimi la tēnei te tamana, ko au ka nofo i kinei ke fai ma au pologa, ke hui ai te taumalo; kae tuku kō te taumalo ke olo ma nā uho o ia. 34Auā e hē mafai au ke toe foki ki toku tamana kae hē kavea e au te taumalo. E hē kō nafatia oi kikila ki te puapuagā ka pa ki ei toku tamana.”
ప్రస్తుతం ఎంపిక చేయబడింది:
Kenehe 44: TOKU
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible Society New Zealand Charitable Trust
