Kenehe 39
39
Ko Iohefa i te Fale o Potifala i Aikupito
1I te kavega o Iohefa ki Aikupito e nā tino ha-Ihamaelī#39.1 ha-Ihamaelī pe ha-Mitianā, na kilātou fakataua kia Potifala, he takitaki o nā fitafita e leoleoa te fale o te tupu. 2Nae fakatahi pea lava te Aliki ma Iohefa ma na fakamanuia e ia i ana mea uma nae fai; ma nae nofo i te fale o tona matai Aikupito.#Gāl 7.9 3Na kitea e tona matai ko te Aliki e fakatahi ma Iohefa ma kua fakamanuia e te Aliki nā mea uma a Iohefa nae fai. 4Nae fiafia lele ia Potifala kia Iohefa, ma na tōfia ai e ia ma ana kaukauna fakapitoa, ma ke pule i ana kaukauna ma ana mea uma lele. 5Na kāmata mai i te taimi tēnā oi fakamanuia e te Aliki te kaukāiga o tona matai Aikupito, ma nā mea uma i loto o tona fale ma ona fātoaga. 6Oi na tuku ai e Potifala nā mea uma a ia ke pule e Iohefa, ma e hēai lele hētahi mea na popole ia ki ei; oioti lava te mea nae fano ki ei tona māfaufau ko nā meakai a ia.
Ko Iohefa nae tino lelei lele ma matagali.
Ko Iohefa ma te Āvaga a Tona Matai
7Kua mataloa mālie he taimi, oi na kāmata ai kua fofou te āvaga a tona matai kia Iohefa, ma na lea ai kia Iohefa ko kilāua ke momoe. 8Kae na teteke e Iohefa ma lea vē atu ki ei, “Kikila, e hēai lele he mea i loto o te fale e popole ki ei toku matai, auā ko au e i kinei. Kua tuku mai e ia nā mea uma a ia ke pule au ki ei. 9Kua tutuha lava taku pule i loto o te fale tēnei ma tana pule, ma e hēai he mea kua ia tāofia mai ia te au, vāganā ai lava koe. E vēhea la ona kō faia he mea kino vēnā e agahala ai au ki toku Atua?” 10E ui lava nae tauānau e te fafine ia Iohefa i aho uma, kae e hēki talia lele e Iohefa ke momoe kilāua.
11Kae i tētahi aho, na fano ai ia Iohefa ki loto o te fale oi fai ana gāluega e vē ona māhani ai, ma nae hēai lele hētahi kaukauna nae iei. 12Kua tāofi e te āvaga a Potifala te kie nae hulu ai ia Iohefa ma lea vē atu ki ei, “Hau tā momoe.” Kae kua oho ia Iohefa ki fafo o te fale, ka kua tāofi lava e te fafine te kie i tona lima. 13I te kiteaga e te fafine ko Iohefa kua vili ki fafo o te fale kae tīaki tona kie, 14oi na kalaga vē atu ai ki nā kaukauna a ia, “Kikila mai ake! Ko te Epelu tēnei na kaumai e taku āvaga ki te fale, kua fakamātagā e ia kitātou. Na hau ki loto o toku potu tau toho fakamālohi au, ka ko au na kekē lahi lele. 15Na ia lagona lava ko au kua kekē, oi vili loa lava ki fafo kae tīaki tona kie i oku tafa.”
16Ma na tāofi ai lava e ia te kie ke pa mai te matai o Iohefa ki te fale. 17Oi na fai ai foki tana tala tēnā ki tana āvaga, “Ko te pologa Epelu a koe na kaumai ki kinei, na hau ki loto o toku potu oi fakamātagā au. 18Kae i toku kekēga, oi na vili ai ki fafo kae tīaki tona kie i oku tafa.”
19I te fakalogoga o te matai o Iohefa ki te tala a tana āvaga e uiga ki te mea a Iohefa na fai ake kia te ia, oi na ita lahi lele ai. 20Ma na fakatonu ai e ia ke kave ia Iohefa oi loka i te falepuipui e tuku ai nā pāgotā a te tupu, ma na nofo ai lava i kinā. 21Ka ko te Aliki nae fakatahi pea lava ma Iohefa ma fakamanuia e ia, ma na fai ai ma mea na fiafia ai kia Iohefa te pule o te falepuipui.#Gāl 7.9 22Na tuku ai e ia ia Iohefa ke kikila e ia nā pāgotā uma i te falepuipui, ma ke ia faia nā tonu ki ho he mea e fai i loto o te falepuipui. 23E hēki toe tuahā lele te pule o te falepuipui ki ho he mea kua i lalo o te kikilaga a Iohefa, auā ko te Aliki nae fakatahi pea lava ma Iohefa, ma na fakamanuia e ia ana mea uma nae fai.
ప్రస్తుతం ఎంపిక చేయబడింది:
Kenehe 39: TOKU
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible Society New Zealand Charitable Trust
