Actes 9
9
Sol marombu ne Sesu
1Gigumbi gine, Sol ne pikile ke yi gukwane ne guboke bane be Fumu. Negwende gwelabe givunde gi muvegitsi pagu 2negumwivule bisangumu bi bivunde bi ndagu tsi ndembu tsi Damase, bya muvegi dinyange. Pasi, atseragene batu, bebagele ne begetu babingi nzile Fumu Sesu, agubenze begange negubebege gu Serisalem.
3Sol mbere ki munzile, ake beli ne yadi Damase. Vane ne vane, giyalele girugile gu nzambi gimutsyenge. 4Aberuge vetsi negulu dyufi dyamwambili re «Sol, Sol, gye gi wakwanini?» 5Sol ne gwivule: «Ndya nye Fumu?» Dyufi ne gwagule: «Ni Sesu yi wakwani. 6Tumbe rambuge, yingene gu yadi, vane, begukwambile di wuguvage.» 7Gilonge gi andi gi mwendu gisikeme, nesi gubakule. Bagulu dyufi tumbe besalabi mutu wagwambili. 8Sol rambuge misu mwasi, tumbe akene pafu. Bemugange mu dikake gu gumubegise gu Damase. 9Abe ne pafu mu tsufu yireru, nesi guye nesi gunu.
10Gubange gu Damase mubingitsi Sesu wanengu re Ananyas. Fumu muvudugile gu ndosi amwambile re «Ananyas.» Ayagule: «Fumu, me yandi wuwu.» 11Fumu mwambile re «Yende ne mesavu mu nzile yi Sungeme, yingene gu ndagu Suda, yivule dibagele di mwisi Tarese dyanengu re Sol. Gulembe galembi, 12gu ndosi, aselabe dibagele dyanengu re Ananyas ditse gwingene negu mutsabige mekake nonge akulabe.» 13Ananyas yagule: «Fumu, mbili batu betse nyambile me dibagele dine, nyayabi mabi motsu me yandi tsivage bebingitsi bagu gu Serisalem. 14Sige atseruge gunu ne dinyange ditse muvege bivunde bi bevegitsi be pagu gwenegange botsu balembi gu dine di agu.» 15Tumbe Fumu mwambile re «Yende, ragene dibagele dine. Nyamusale, agundyanzile gu guyabise dine dyami mu beni ne kanangu tsi awu, negu bumongu bu Iserayel. 16Nigu murigitse me beni motsu me agukengile gukyelu ami.» 17Ananyas yende. Ayingene gu ndagu, atsabige Sol mekake amwambile re «Mwate Sol, Fumu Sesu, yitse kuvugile munzile, atsetume nonge wukulabe ne gubase ne Dinyuni Diboti.» 18Vane ne vane, megagele musuge mu misu me Sol vane alabe. Arambuge sige abatisu. 19Vane, aye, ngudu tsimugabugile.
Sol gagwanzi musamu boti gu Damase
Sol tsagene betsufu ne bebingitsi be Sesu be Damase. 20Vane ne vane ayende ne gwanze musamu boti mu ndagu tsi ndembu tsi Sif, re Sesu mwane Nyambi. 21Botsu bemulungu besutu bivulange re «Sa yandi tse kwanange gu Serisalem botsu betse lembange mu dine di Sesu? Asarugile gunu ne mekasi gwene begange ne gubebege gu bivunde bi bevegitsi be pagu?» 22Tumbe Sol gagwambili ne bureti. Agarigitsi re Sesu ayi Kirisete mwobutsi. Sige Sif tsya tsageni Damase tsisegandi guyabe di gumwagule.
23Mwe gigumbi neguvyoge, babe ne pikile yigu bokise Sol, 24tumbe beku munweritse dugwegu du awu. Bekugwasange mingeninu mi yadi, nyangu ne dibeti beku muboke. 25Vane bebingitsi be Sol bemubege gu gari ponzi dibeti, gu gumuvyose disimu dine di murumbe yadi.
Gu Serisalem, Barnabase rigitse Sol ve bilumbi
26Neguvuduge gu Serisalem, Sol mange ragene bebingitsi be Sesu, tumbe botsu bene wome, mbare besabange ne gitu re yandi gwandi ake mubingitsi Sesu. 27Barnabase mubonge negumubege gu bilumbi. Abambile nevu Sol labile Fumu mu nzile, nevu Fumu mwambilile. Abambile gwandi nevu anenzile ne bureti mu dine di Sesu gu Damase. 28Gigumbi gine, reve Sol abile nawu, agagwendi gagabugi gu Serisalem, negunenzange ne bureti mu dine di Fumu. 29Agabengune ne Sif tsya gwambili dilongu di girek ayambilange nawu, tumbe yawu bekebange gu mubokise. 30Ve bane be Nyambi bedyulilu, bemubege gu Sesaré, sige bemwenze gu yadi yi Tarese. 31Gigumbi gine, dibundu dike polu, gu Sudé, gu Galile ne gu Samari. Dyadyole mu gitu dyatsageni kene gugobisange Fumu, ne ngudu Dinyuni Diboti bane be Nyambi bafuni ke fune.
Ené mabeluge
32Pyere nangange bulongu bwotsu, wisi mosi ayende gu bane be Nyambi batsageni gu Lida. 33Gune aragene dibagele dya nengure Ené melamine ve tangi andi mu mipume ginane, ne membogelotu. 34Pyere mwambile: «Ené, Sesu Kirisete kakubelusi! Rambuge bonge ditogu di agu!» Arambuge vane ne vane. 35Batu botsu be Lida ne Saru bedyene, begeluge gu gyari gi Fumu.
Tabite rambusu gu dufu
36Gu Safa, gubange mwane Nyambi mugetu dine di andi Tabite gu dilongu di gereke, «Dorekas», re guvage re tsyesi. Avyosange gigumbi kaguvagange meboti ne gwamusange bigayi. 37Wisi mosi akugangu ne gubele afu. Bebwitse gibindi, bekisunze gu girini gi ndagu ndiki. 38Bebingitsi be Safa belu re Pyere ayi gu Lida, beli ne Safa. Berume batu bebeye gwegwambile Pyere re «Kokolu, ruge ne mesavu gu mbu gi etu!» 39Pyere yende nawu vane ne vane. Ve avudugile, bemubege gu ndiki. Bekwili botsu beruge ve yandi ne gulile, bemurigitse ngoye ne bidwaru bi atobange ve ayibilange monyu. 40Pyere vuduse batu botsu, akuteme negulembe. Vane ageluge gu gyari gi gibindi ayambile re «Tabite, rambuge!» Atsibule misu, ve alabile Pyere, atsagene. 41Pyere mugange dikake amurambuse. Sige anenge bane be Nyambi ne bekwili, aberigitse Tabite monyu. 42Tsangu yipanzige ne yadi yotsu, mbili batu bevagile Fumu gitu. 43Pyere tsagene gigumbi gu Safa gu mbu mudyanzitsi bikate, wanengure Simu.
ప్రస్తుతం ఎంపిక చేయబడింది:
Actes 9: SWJ
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
