Actes 24
24
Pol ve wusu ngowu Felikese
1Tsufu yiranu tsivyoge, givunde gi muvegitsi pagu Ananyas yende gu Sesaré ne bivunde bi dibundu ne gikambi gyanengu re Teretilis. Gutse funde Pol gu ngowu Felikese. 2Pol ne gurugisu, sige Teretilis negumufuregile: «Ngowu etu Felikese, dibandu ndyayu dwatsagenini pembi ne polu, dibandu givagitsi gi agu ne pikile tsi agu gu bulongu bu etu. 3Dwakugabusili diboti gu motsu me dwadili gigumbi gyotsu kepagere mbure. 4Tumbe nzagukunde tsyemune gigumbi, re dibandu nyakwivuli kokolu yi gudulimbilile mwegigumbi. 5Dwalabi re mutu wuwu pire ginwangu, agatubi misosu gu Sif tsyotsu tsi bulongu, lavane givunde gi dibundu di Sesu yi Nasarete. 6Mbere aronde sumune ndagu Nyambi yi rereri, vane dumugange. [Mbere dumusosise neve gwambili mugage etu. 7Tumbe gidyeti Lisyase aruge ne ngube gutse mupatule mu mekake metu, 8gu guduvege dinyange digu mufunde gu ndyayu#24.8 Mirendu myasukisi girini gi musyamunu kwange dipakilu di girini ginane, migu ngoku ([]) miserendu mu mbili bisangumu bi gulu bi Girek..] Pasi re wutsemwivule ndya beni wugulu re me dwagwambili gukyelu andi me ngenze.» 9Bidyeti bi Sif bekokune re negungenze.
Pol gakwekani ve wusu ngowu Felikese
10Ngowu muvege dinyange di gwambile, vane Pol yandi re «Nyayabi re wavagi bureti gu bulongu bu etu mu mbili mipume, kabe ne gitu nyarugili ve wusu agu. 11Neve wubenze gengile ndya beni, gusame vyoge digumi di tsufu ne tsufu beye nyendile gu Serisalem gwekutemine Nyambi. 12Nzameragunu gu ndagu Nyambi re nyasosi ne kepagere mutu, vo gukokise kumvu gu ndagu Nyambi, gulu gulu ne gu ndagu tsi ndebu ne kepagere mbure gu yadi. 13Batu babe besabenze kuvege gilimbe gi mambu mebagwambili gukyelu ami. 14Tumbe, ve wusu agu nyasingi re nyadyanzili Nyambi begulu betu mu dibundu di “Nzile” Fumu. Gu yawu, bavagi re nzile gufure. Tumbe menu, nine gitu ne motsu merendu mubisangumu bi migage ne bebigitsi. 15Nine gitu ne Nyambi re batu botsu babi ne beboti begurambuge gu dufu, gitu gi nawu gwandi. 16Re dibandu nyakwebokili gigumbi gyotsu re niyabe ne togu ve wusu Nyambi ne ve wusu batu.
17Mbili mipume nyendile, nzerugile gu Serisalem gutsegwamuse bumongu bu ami ne doli ne pagu gu Nyambi ami. 18Labe gi nivagange ve betagenine gu ndagu Nyambi. Mbere nyabande mususu, gusabe bumongu ve mbeke ami, gusabe dimbunge. 19Tumbe be Sif tsi musyengi Asi tsibe vane, yawu re mbere betseruge ve wusu agu gusegwambile, gere bene dyambu nami. 20Avo, batu babe bevave bambili dibi dinzebegilu ve wusu dibundu dyatabuli misosu. 21Gotsu digube ke gukyelu di nzegwambile, meteli ve wusu agu “Mbare nine gitu ne durambugu du dufu nyabegilu nemuni gutsesosisu ve wusu enu!”»
22Felikese, wuyabange dikengi «Nzile» Fumu, aragige musosu gigumbi ginzusu ne gwambile befunditsi re «Pasi re gidyeti Lisyase maruge nigutabule musosu enu.» 23Avege givunde gi gori dinyange di gurare Pol gu nzugu, ne gumusile kindi kindi, ne guvege bembatsi bandi dinyange di gutsemudyanzile.
Pol ve wusu Felikese ne Duresil
24Be tsufu kwe, Felikese ruge ne mugatsi andi Duresil, wu Sif. Arume batu gwebonge Pol gu gulu di agwambile gukyelu gitu gu Sesu Kirisete. 25Tumbe gigumbi gi Pol yambililange gukyelu mutsageninu wusungeme, gukyelu gusinde murime ne bumbanze bu musitu, Felikese, ne medume, yandi re «Dukisukile vane. Pasi re nike ne gigumbi, nigukunenge.» 26Apikilange re Pol gumuvege doli, re dibandu amurugisange gu gwambile nandi. 27Mipume mibeye mivyoge, akurondu ne Sif Felikese asile Pol gu nzugu. Sige Poresyus Fesetis muvyagesene.
ప్రస్తుతం ఎంపిక చేయబడింది:
Actes 24: SWJ
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
