TITU 2
2
Potunda pampaguru anu monco
2:1-15
1Paikanya siko Titu, da nupepaguruka pompaguru anu monco. 2Patujuki waʼa ntuama anu matuʼa, da naka nakekenisi tanda ngkatau tuʼanya da loʼe pai nakoto mantaʼamaka raya, da tuwu ewa tau ndatubunaka. Tau seʼe woʼu sangaya-ngaya da mangkekeni maroso pompaguru anu monco ungka ri Pue Ala, matowe ri gori ngkamonconya, ri tongo ngkapari da todo. 3Ewanceʼe seʼe da nupatujuki waʼa mbeʼa anu matuʼamo, da naka magali poʼengkonya, da ewa poʼengko waʼa ntau anu mepoʼinaya ri Pue Ala. Tau seʼe bareʼe maya manuntuki tau ntaninya, pai bareʼe maya topanginu panginu anu mampakayangu. Tau seʼe da mampepaguruka anu madago, 4poʼengko ntau seʼe anu ewanceʼe da mamponinika waʼa mbeʼa anu mangurapa da mampotowe langkainya pai waʼa ananya, 5da naincani mantodosaka rayanya, pai da tuwu magali, da mewali ine ri raya ncombori anu madago pai medonge ri langkainya. Ane ewanceʼe poʼengkonya bareʼe da reʼe jaya ntau da mamposari nuntu i mPue Ala.
6Ewanceʼe seʼe da nupatujuki waʼa ntau mangura da napaincani mantodosaka raya. 7Ri mpengaya-ngaya siko ngkaliomu woʼu da mewali pandiri anu madago. Ane mompaguru siko da nuwianaka ri kamonco-monconya pai mayoa. 8Pakemo basa anu mampatongawa kaloʼemu, bareʼe da naposari ntau, da naka ngira waʼa ntau anu maewa siko maka bareʼe narata posarinya anu da mampakajaʼa toʼota.
9Waʼa anamayunu sangaya-ngaya da medonge ri puenya, da napakawongko raya mpuenya ri mpengaya-ngaya. Tau seʼe bareʼe maya mancapu songka, 10bara melima. Da natuju ntau seʼe kadago engkonya pai katodonya; da napaunde ntau pompaguru ungka ri Pue Ala, Toponcorepakata.
11Maka Pue Ala mantujumo towe ndaya anu da mancorepaka pura-pura tolino. 12Towe i mPue Ala setu mampagurumo kita da naka neʼe mampowia anu bareʼe singkono pai pepokono i mPue Ala, bareʼemo nakuasai ncawoyo ndaya lino seʼi. Kita ndapaguru da tuwu ri lino seʼi da mangkoto mantaʼamaka raya, mayoa pai mepoʼinaya ri Pue Ala. 13Wawaseʼi kita ntongo mampopea karata Eo anu tapomata-mata setu; ri Eo setu nepa da nakita lino ewambeʼi peawa i Yesu Kerisitu, inceʼemo i Pue Ala Anu Bangke pai Mokole Tadungkadagota. 14#Pol. 130:8, Pa. 19:5, Paw. 4:20, 7:6, 14:2, 1 Ptr. 2:9 Sira anu roo mampepasolayaka koro-A ua kita da mancorepaka kita ungka ri waʼa ngkajaʼa, pai kita ndapapewali tau-A anu magali, pai Sira tumpunya pai anu madoyo mawianaka anu madago. 15Pagurukamo pura-puranya setu, pai patujuki seʼi da nusekomo waʼa ntau anu mampedongeka siko ewa tau anu ndatubunaka, neʼe nupapaliuka mau sambaʼa tau da mampetikodi siko.
