PATADA 8
8
Paboo oni nganga ngkaloʼe ndaya
8:1-36
1 #
Pat. 1:20-21
Pedongeka! Kaloʼe meboo-boo,
loʼe ndaya mampepapadongeka oni nganganya.
2Mekakore siʼa ri waʼa mpongku ntana ri wiwi njaya
pai ri waʼa porampu njaya.
3Ri baa-baa ri jaya da pesua ri kota,
njairiamo da ndapadonge oni nganganya.
4“Ee waʼa ntolino, ri komi kupampebooka;
pura-pura anu moʼinosa ri lino ndipedongeka patiendoku.
5Komi anu bareʼe gana pangaincanimi, ndipegurumo da naka loʼe monawa-nawa;
komi anu tengo, ndipegurumo da ndiparata ndaya.
6Ndipedongeka waʼa mpauku,
maka pura-pura monco pai moyowe.
7Anu kutoʼo seʼi, monco pura-pura,
maka yaku mampobanciika lopu.
8Waʼa mpauku mayoa pura-pura,
bereʼe anu teliko-liko bara sala.
9Ri tau anu loʼe waʼa mpauku monco,
ri tau anu mayombu rayanya waʼa mpauku singkono.
10Patujuku meruu ri oli ncalaka anu malino,
pangaincani meruu ri oli mbuyawa malino.
11Yakumo kaloʼe; maruu olinya painaka paramata,
bareʼe ndipasiwiaka pai pura-pura anu nupodaraya.
12Yakumo kaloʼe; ri yaku kareʼe mparata ndaya,
kaloʼe ndaya pai pangaincani.
13Mantubunaka i Pue posokinya mampobanciika anu jaʼa;
bareʼe kupokono pobangke-bangke pai pekiunde.
Kupobanciika poʼengko anu majaʼa
pai waʼa mpau anu monggoli-nggoli.
14Yaku anu mawai parata ndaya.
Pai yaku seʼe anu mawianaka.
Yaku loʼe pai maroso woʼu.
15Waʼa mokole kupelae mampapelinja songka,
waʼa ntau makuasa kutulungi mampepakoreka yoa.
16Ua kadagoku, waʼa ntau bangke pai waʼa ngkabosenya
moncongka mampapelinja kayoa.
17Yaku mampotowe tau seʼe anu mampokono yaku;
anu mampepali yaku, da mangarata yaku.
18Ri yaku toka kakoreʼe,
ewanceʼe seʼe katetubunaka pai kagana-gana.
19Anu da nurata ungka ri yaku meruu ungka ri oli mbuyawa anu malino;
meruu ngkasuli pai salaka anu malino.
20Yaku mangadika jaya anu mayoa,
yaku melinja malulu jaya kayoa ndaya.
21Tau anu mampotowe yaku, da kupapewali koreʼe,
banuanya da kubuketika aga-aga.
22 #
Pepat. 3:14
Yaku ndapapewali i mPue ewa anu kaʼisa,
yakumo anu uyu mbua ungka ipiamo.
23Yaku anu ndapareʼe ungka tepuʼu lino,
ungka ri tepuʼunya, ri kabareʼepanya ndapapewali lino.
24Yaku ndapoanamo ri kabareʼepanya reʼe tasi bangke,
ri kabareʼepanya reʼe mata ue.
25Yaku ndapoana ri kabareʼepanya tepatunda waʼa buyu,
ri kabareʼepanya mekakore waʼa pongku ntana,
26ri kabareʼepanya ndapapewali i mPue lino pai waʼa mpada,
sako tana salemo bareʼepa ndapapewali.
27Kukita ndapantale yangi,
pai gawu ndabini ri wawo ntasi,
28Sindara mpadika i mPue limu ri tongo ndaoa,
pai maloka waʼa mata ue ri tasi,
29sindara ndapasongka ue ntasi
da naka neʼe maliunaka ungkanya.
Yaku seʼe woʼu njau njairia
ri tempo mpadika potunda lino.
30Yaku njau ri soria ewa ana anu ndapomawo,
sandeme-sandeme yakumo anu ndapokawongko;
bareʼe bali-bali polega-legaku ri suaraa.
31Mawongko rayaku maroo-roo ri linoa
pai lindo rayaku maroo-roo ri oyo ntolino.
32Inceʼe painaka ndipedongeka yaku ee waʼa ntau mangura!
Lulumo totorakaku, da naka lindo rayamu.
33Da nusabemo parada pai da nupewalimo tau anu loʼe,
neʼe kojo boi nupesaru-saru inceʼe.
34Morasimo tau anu mampedongeka yaku,
anu sandeme-sandeme njau mopea ri wombo banuaku,
pai njau mojaga ri baa-baa ngkota peariku.
35Isema anu marata yaku, da mangarata katuwu,
siʼa da ndapokono i mPue.
36Isema anu bareʼe marata yaku, mampakarugi koronya ngkalionya;
tau anu mampobanciika yaku, siʼa mampotowe kapate.”
