PATADA 5
5
Patiendo kono posalara
5:1-23
1Anaku, pedongekamo pauku! Parindaya kaloʼeku pai parata ndaya anu kupaguruka siko, 2da naka nuincani mangkeni koromu pai da mompau ewa tau anu reʼe paincaninya. 3Weʼa wongo, ngujunya ewa kamomi juyu pai waʼa mpaunya madago ndadonge, 4paikanya ane liumo pura-pura setu, anu da totaʼa jamo kapaʼinya pai kapari. 5Siko da naombitaka njoʼu ri kareʼe ntau mate; jaya anu nalulu njoʼu ri kapate. 6Siʼa bareʼe da rodo ri jaya anu da njoʼu ri katuwu; bareʼe naincani siʼa mebiamo ungka ri jaya setu.
7Inceʼe painaka ee waʼa anaku, ndipedongekamo waʼa mpauku pai neʼe boi ndipesaru-saru. 8Nditilawangi weʼa anu ewanceʼe! Neʼe boi nditimosuki banuanya. 9Ane siko mogalo-galo pai weʼa anu ewancetu, da paya katetubunakamu pai inosamu da nayali ntau anu bereʼe purundayanya ntongo mangurapa siko. 10Kakoreʼemu da pura nakoni ntau, pai waʼa sili lengemu podo da napapurasi ntau anu bareʼe nuincani. 11Ripurinya nepa da mekakai siko, ane koromu puramo najunju njuʼa. 12Nepa da nutoʼo, “Oo wenu painaka bareʼe kupedongeka patuju? Wenu painaka bareʼe kupokono ndaseko? 13Bareʼe kupokono mampedongeka waʼa guruku pai bareʼe kululu tau seʼe. 14Bareʼe kusoro-soro yaku manawumo ri suara ntau sondo.”
15Inceʼe painaka katodomo ri rongomu ngkaliomu pai podo ri siʼa da nupantuju mawo ndayamu. 16Bereʼe yowenya siko da mampepali karodo ndaya ri weʼa anu banya rongomu. 17Karodo ndaya setu podo tilamu pai rongomu, banya pai tau ntaninya. 18Inceʼe painaka da lindo rayamu pai rongomu ngkaliomu, pepalimo kalindo ndaya ri anaweʼa anu da nuporongo – 19anaweʼa anu madolidi pai makaliki ewa lagiwa. Tuarapa kadolidi ngkoronya bareʼe bali-bali mampakawongko rayamu, pai kaloʼeya mantima rayamu bareʼe bali-bali. 20Nunjaa yowenya da nuposawoyo weʼa ntaninya, anaku? Wenu painaka da nupotengeaka weʼa wongo? 21I Pue mampetiro pura-pura anu napowia ntau. Rimbeʼi ntano palai ntolino ndakita i mPue. 22Salaa ntau majaʼa ewa patambo anu mantolia tau seʼe ngkalionya. 23Siʼa mate ua bareʼe napedongeka patuju. Katengonya anu mangkeni siʼa ri kagero.
