PATADA 30
30
Waʼa mpau i Aguru
30:1-6
1Seʼimo waʼa mpau anu napasowa i Aguru ana i Yake ungka ri Masa
“Yaku malenge, boo Pue Ala,
yaku malenge!
Puramo rosoku!
2Yaku tengo ewa pinatuwu,
bereʼe parata ndaya.
3Bereʼe kupampeguru kaloʼe ndaya,
mau sakodi bereʼe kuincani kono i Pue Ala.
4Tolino anu reʼemo pepone pai penaʼunya ri suruga?
Reʼemo napangkamumu ngoyu ri palenya
bara mantonge ue ri bajunya,
bara mampakanoto waʼa ungka lino?
Isema siʼa pai isema ananya?
Manoto nupangaincani siʼa!
5I Pue Ala mabangani waʼa janjia. Sira ewa kanta ri pura-pura tau anu rata metatondo ri Sira. 6Ane nurangani nunjaa anu ndatoʼo, Sira manganceko siko pai mampatongawa kasikonya tau anu kalopu-lopu.”
Bara tesangkuja patada ntaninya
30:7-33
7“Boo Pue Ala, kuperapi ri kabareʼepanya kumate, ndiwaika yaku anu radua ngaya seʼi. 8Neʼed boi kupasowa waʼa mpau anu teliko-liko pai mbamba, pai neʼe ndipapaliuka yaku kaasi-asi bara koreʼe. Ndiwaika yaku podo nunjaa anu da kupoyoweka. 9Maka ane koreʼe yaku, boi da kutoʼo, yaku bareʼemo reʼe pokentaku pai Komi. Pai ane yaku kaasi-asi, boi da kumangangka painaka mampakajaʼamo toʼomi.”
10Neʼe manuntuki sambaʼa anamayunu ri puenya,
boi siko napepepara pai ndapakasala.
11Reʼe tau anu mampepepara papanya,
pai bareʼe mantubunaka inenya.
12Reʼe tau anu maepe koronya magali
ntanoka siʼa tonggeonu.
13Reʼe tau anu maepe koro maʼai kojo kadagonya –
maʼai kojo kadagonya!
14Neʼe tau anu mampepali anu da nakatuwuka ri jaya mpeekati;
tau seʼe masii pai mampipisi tau anu kaasi-asi pai bereʼe rosonya.
15I Bagagu mampotumpu ana radua;
raduamo seʼe mampotoʼo, “I Galaku”!
Reʼe aopo ngaya anu bereʼe kaʼosa ndayanya.
16Lino kareʼe ntau mate,
weʼa anu bereʼe poananya,
tana mangau anu mampodaraya uja,
pai apu anu melao ri sambawo ntana.
17Tau anu mampasinggori papanya bara inenya anu matuʼamo, sintinaja da ndapetasoka ri sambalikunya da naka natungkusi mpaa-paa matanya pai wata ngkoronya da nakoni tonci kuayangi.
18Reʼe aopo ngaya anu maʼai ngkapari da kuparata ndaya:
19tonci kuayangi anu moyoko ri raoa
ule anu menjoyo ri wawo roka mbatu,
kapala anu mosumomba ri tongo ntasi,
ngalitau pai anaweʼa anu motengea.
20Seʼimo akala sambaʼa weʼa anu bareʼe todo ri langkainya; roo mosalara nepa mangkoni siʼa napalisi ngujunya, nepa natoʼo, “Yaku bereʼe bara nunjaa-njaa anu kupowia!”
21Reʼe aopo ngaya anu masusa napantarima ntau ri sambawo lino;
22Sambaʼa anamayunu mewali mokole,
sambaʼa tau tengo anu marata mpengaya-ngaya anu napodaraya,
23sambaʼa weʼa molangkai ntanoka siʼa bareʼe napokono ntau,
sambaʼa anamayunu weʼa marampa langkai mpuenya.
24Ri lino seʼi reʼe aopo ngaya pinatuwu anu kodi-kodi paikanya loʼe kojo, inceʼemo:
25Onti, pinatuwu anu bereʼe rosonya, paikanya napatoka pangkoninya ri tempo mporeme.
26Tangkasi, pinatuwu anu malente, paikanya napowia banuanya ri roka mbatu.
27Tupako, pinatuwu anu bereʼe mokolenya, paikanya modede mpodago.
28Sosoki, pinatuwu anu manaya-naya, paikanya tau reʼe ri langkanae i datu.
29Reʼe aopo ngaya anu meawa ndanawa-nawa ane ndapatomata ewambeʼi cara mpelinjanya inceʼemo:
30Singa, pinatuwu anu maʼai ngkarosonya ri oyo pura-pura pinatuwu pai bereʼe ekanya mau nunjaa anu nasuara;
31mbula laki,
manu jangko anu melinja toa-toa,
pai mokole ri suara mpalilinya.
32Ane ua katengomu siko
mampekiundeka rencanamu waʼa anu majaʼa, jagamo! 33Maka anu siko mangaiko ue ncusu da nurata mantega. Ane siko mawombo engo ntau da mesuwu daa. Ane siko mangkelo kasengke, siko da tesua ri popaiso.
