PATADA 28
28
1Tau majaʼa molonco seʼi bereʼe nu maduduki,
paikanya tau mayoa, makoje ewa singa.
2Ane banca anu mowia salaa, tau anu makuasa mombesawa-sawani;
ane tadulako loʼe, da toa mpaliu pai da gana-gana katuwunya.
3Tau makuasa majeani tau kaasi-asi,
ewa uja marombo majaʼati anu da ndapota.
4Isema anu mampesaru-saru padika, mancambiranaka tau majaʼa;
isema anu mepoʼinaya ri padika maewa tau baleparu.
5Kayoa bareʼe da narata ndaya ntau baleparu,
paikanya tau anu manyomba ri Pue, narata ndaya kojo.
6Moruana tau anu kaasi-asi anu mayoa rayanya,
painaka tau koreʼe anu modenggo.
7Ngalitau anu mepoʼinaya ri padika inceʼemo tau anu loʼe.
Paikanya tau anu mogalo-galo pai tau bolonta mampakaea papanya.
8Isema anu koreʼe ua mampapoana doi pai mantima rasi gori ngkasondonya,
kakoreʼenya da manawu ri pale ntau anumampokapuru tau anu kaasi-asi.
9Ane siko bareʼe mepoʼinaya ri padika i mPue Ala,
da wusu lua i mPue Ala madonge pakakaimu.
10Isema anu mangkanarasi tau mayoa da naka mampowia jaʼa,
siʼa ngkalionya da manawu ri patambonya.
Tau anu mabuya rayanya
da ndadonco painaka lindo rayanya.
11Tau anu koreʼe naepe siʼa tau anu loʼe,
paikanya tau anu kaasi-asi pai pande mporaya naincani kaʼisemanya kojo siʼa setu.
12Ane tau anu madago mangkekeni kuasa, pura-pura tau mawongko rayanya,
ane tau majaʼa moparenta, tau sondo da mesambuni.
13Isema anu mancambunika salanya bareʼe da morasi.
Isema anu mangaku pai majea, siʼa da ndapokapuru i mPue.
14Neʼe bali-bali nupantubunaka i Pue, da naka lindo rayamu.
Ane siko mangaewa Sira, siko da marugi.
15Tau majaʼa anu mangkuasai tau anu mapari katuwunya,
ewa singa anu mengara bara beruangi anu da mesoko.
16Tau makuasa anu majeani tau ntaninya, bareʼe mampotumpu nawa-nawa anu monco;
tau anu makuasa anu mampobanciika podenggo da moparenta motaʼu-taʼu kasaenya.
17Sambaʼa topopepate da naepe ewa ndaduduki mpaliu rantani mate;
bereʼe tau anu mangkoto mantaʼamaka siʼa.
18Tau anu tuwu ri kabareʼenya reʼe posarikanya da tesorepaka.
Tau anu teliko-liko katuwunya, da manawu.
19Topojamaa anu madoyo motetala da gana pangkoninya;
tau anu mantaji-ntaji tempo da makura anu nakatuwuka.
20Tau anu mayoa da ndadonco i mPue,
paikanya tau anu da rayanya ronga koreʼe, bareʼe da lapa ungka ri popahuku.
21Bareʼe madago mampili-mpilisi tau;
paikanya reʼe woʼu topobotusi anu modenggo
podo da naka reʼe yau doinya sakodi.
22Tau anu bahoho da rayanya roga koreʼe;
bareʼe nasoro-soro kakaasi-asi da ronga napomberataka.
23Tau anu mawai peseko ripurinya
da meruu pantubunaka painaka tau anu mawai peunde.
24Isema anu melima ri tau tuʼanya pai nasarumaka inceʼe banya salaa,
siwia pai waʼa ntopelima anu ntaninya.
25Podo maendo koro ngkalio, mampareʼe popaiso;
da meruu porasimu ane siko meaya ri Pue.
26Isema anu mancarumaka parata ndayanya ngkalionya, siʼa bareʼe mampotumpu nawa-nawa anu monco,
isema anu malulu pompaguru ntau anu loʼe siʼa da tesorepaka.
27Isema anu mombai ri tau kaasi-asi bareʼe da makura.
Isema anu bareʼe mampeole katuwu ntau anu kaasi-asi da nakono mpetusaki.
28Ane tau majaʼa makuasa,
tau sondo da mesambuni;
ane tau majaʼa magero,
tau anu mayoa da mombawanaka ri kaʼuononya.
