PATADA 16
16
1Tolino nakoto mampapodede tinako ndayanya,
paikanya i Pue anu mampakanoto.
2Sangaya-sangaya seʼe powia ntau bara naepe madago malulu pangkitanya;
paikanya i Pue anu mangaincani tunggai ndayanya.
3Tambusaka ri Pue pura-pura tangara ndayamu,
da naka nukoto mawianaka.
4Ri mpengaya-ngaya anu ndawianaka i mPue, reʼe anu ndatinako ndaya;
anu ndatinako ndaya ri tau majaʼa inceʼe kagero.
5Pura-pura tau anu mekiunde ndapobanciika i mPue;
bareʼe da ndapapaliuka tau seʼe da lapa ungka ri popahuku.
6Tau anu todo ri Pue Ala bareʼe da ndakianaka salaanya;
Tau anu mepoʼinaya da ndatawanaka ungka ri majaʼa.
7Ane nupakawongko raya i mPue,
waʼa iwalimu da ndapapewali balemu.
8Moruana podo sakodi pandata paikanya ri jaya anu mayoa,
painaka pandata anu sondo paikanya ri jaya anu modenggo.
9Tolino nakoto madedewaka tinako ndayanya,
paikanya i Pue Ala anu mampakanoto jaya ngkatuwunya.
10I Mokole marata kuasa ungka ri Pue Ala,
mewali, siʼa bareʼe masalaa ri pobotusinya.
11I Pue mantangara tau da mayoa ri jaya mpobalu-balu, ewanceʼe
seʼe ri pontubu pai ri podasi.
12Tau anu mangkekeni kuasa, mowia majaʼa inceʼe karika,
maka poparentanya da maroso ane mayoa.
13Totoraka anu monco mampakawongko raya ntau makuasa,
siʼa mampotowe tau anu mayoa pompaunya.
14Karau ndaya i mokole inceʼe ewa bambari mpopahuku mate;
tau anu loʼe mampari-pari da mampakamongku!
15Kapande ndaya i mokole mampareʼe kalindo ndaya ri katuwu,
ewa limu anu mampatudu uja ri tempo mporeme.
16Marata kaloʼe meruu kadagonya painaka marata wuyawa;
marata pangaincani meruu olinya painaka marata salaka.
17Tau madago da mantilawangi anu majaʼa;
tau anu mampepewoloka jaya ngkatuwunya, mantatondoni koronya.
18Pekiunde da mampowuaka kagero,
pobangke-bangke da mampowuaka kamanawu.
19Moruana lauka raya mau bereʼe aga-aga,
painaka sangkani-ngkani, pai tau mekiunde mampokawongko aga-aga anu narampo ntau seʼe.
20Parindaya njaa anu ndapaguruka siko, sangaya-ngaya da nurata njaa anu madago.
Peayamo ri Pue da naka lindo rayamo.
21Tau anu loʼe da ndaincani ri kataja mponawa-nawanya;
pompaunya anu manoʼo raya ntau, painaka waʼa mpaunya ndapoaya monco.
22Kaloʼe ndaya inceʼe perontada ngkalindo ndaya ri katuwu ntau loʼe;
tau tengo naparini ngkatengonya ngkalionya.
23Nawa-nawa ntau pande mporaya mampapewali waʼa mpaunya mayombu
pai pompagurunya kako napedongeka ntau.
24Pau anu maʼalusu ewa juyu;
momi ndaepe pai mampakadonde koro.
25 #
Pat. 14:12
Reʼe jaya anu ndakita mayoa,
paikanya ripurinya jaya setu tepatotoka ri kapate.
26Kasawoyo ndaya da mangkoni maʼiowaka tau da mampari-mpari;
ua komponya, inceʼe mariso siʼa da motetala.
27Tau majaʼa mompari-mpari da mampakarugi kasiyununya;
waʼa mpaunya majaʼa ewa apu membaa.
28Tau anu modenggo mampapebete popaiso;
topenuntuki majaʼati pobale maramu.
29Tau anu masii mambabasi waʼa yununya,
pai mangkeni tau seʼe ri raya ngkapari.
30Da nusoro-soro tau anu tekalumiri paikanya mesiligi,
maka reʼe tinako ndaya anu jaʼa ri rayanya.
31Tau anu mayoa rayanya da mangarata tinuwu marate,
uwanya da ewa, makota mpeawa mboʼo anu ri rayanya.
32Bareʼe sarai sengke inceʼe meruu ngkadago painaka mampotumpu kuasa;
mangkuasai koro inceʼepa meruu ngkadago painaka mampapeʼuru sambaʼa kota.
33Tolino mentende dadu da mantonaa were ngkatuwunya,
paikanya anu mampakanoto sononya podo i Pue ngkalioa.
