PATADA 13
13
1Ana anu loʼe da napedongeka ane mepatada papanya;
tau makiunde bareʼe napokono ndaseko.
2Pompau ntau anu madago da mampareʼe porasi;
tau anu bareʼe mayoa rayanya napokono periso.
3Tau anu timama ri pompaunya da maʼuono katuwunya,
tau anu mompau pontopanyamo da napere ngkasusa ndaya.
4I Malose maria ngaya anu napodaraya paikanya bareʼe mau sangaya anu da narata;
tau anu madoyo motetala da mangarata pura-pura anu napodaraya.
5Tau anu mayoa rayanya da napobanciika mbamba,
poʼengko ntau majaʼa mepakaea pai ndaposari.
6Kayoa ndaya inceʼe mangkantawi katuwu ntau anu mayoa raya;
kajaʼa inceʼe mangagero katuwu ntau anu masalaa.
7Reʼe tau anu moʼengko ewa tau anu koreʼe, ntanoka bereʼe aga-aganya;
reʼe tau anu moʼengko ewa tau anu kaasi-asi ntanoka siʼa koreʼe.
8Tau koreʼe sangaya-ngaya da mampapesuwu doi da naka uono katuwunya;
tau kaasi-asi bereʼe anu da mampakarugi.
9Tau anu mepoʼinaya ri Pue da merara makilaya;
tau majaʼa da ewa silo anu pikamo.
10Pekiunde podo da mampowuaka popaiso;
tau anu loʼe napokono mancabe pompaguru.
11Kakoreʼe anu saru-saru ndaparata podo sarai woʼu da kakuranya;
paikanya aga-aga anu ndapasambaka nteasakodi da kakoteranga-rangani.
12Ane anu ndapomata-mata bareʼe kobangani, mapari raya;
ane anu ndapodaraya kobangani, mawongko raya.
13Tau anu mampesaru-saru pompaguru i mPue, inceʼe mampakarugi koronya;
tau anu mepoʼinaya ri padika i mPue Ala da mangarata silinya.
14Pompaguru ntau anu loʼe ewa pebete ngkalindo ndaya;
ane reʼe peekasi, pompaguru setu da mancorepaka.
15Tau anu madago raya da ndaunde;
tau anu bareʼe ndasarumaka da masusa katuwunya.
16Tau anu loʼe da monawa-nawa riunya dikabareʼepanya mowia;
tau anu tengo da mampoleleka katengonya.
17Pomokau anu bareʼe loʼe podo da mampareʼe rugi;
pomokau anu ndasarumaka mampakanoto da kareʼe mposilinya.
18Tau anu bareʼe napokono ndapaguru da mewali kodi pai kaasi-asi;
tau anu mangkomatasi patuju da ndatubunaka.
19Ara meawasa ane ndarata nunjaa anu ndapodaraya!
Tau anu tengo bareʼe napokono mampalaika jaʼa.
20Tau anu mogalo-galo pai tau anu loʼe, da mewali loʼe;
tau anu mogalo-galo pai tau tengo da marugi.
21Tau anu masala da nalulu-lulu mpaliu ngkarugi,
tau anu madago bareʼe bali-bali kalindo ndayanya.
22Tau madago da mampantaika ananya pai makumpunya kakoreʼe;
kakoreʼe ntau masalaa inceʼe da ndadika tila ntau anu mayoa katuwunya.
23Tana anu soa da mampareʼe
pangkoni tila ntau kaasi-asi;
paikanya ua potengkobatu painaka tana setu bareʼe ndapotetalaka.
24Ane ana bareʼe ndatabasi posokinya bareʼe ndapomawo siʼa;
ane ndapomawo, sangaya-ngaya makoje woʼu mantabasi siʼa.
25Tau anu madago sangaya-ngaya da gana mpaliu anu da nakatuwuka,
paikanya tau majaʼa da makura mpaliu katuwunya.
