PAIMBA 36
36
Panta waʼa mbeʼa anu molangkai
36:1-13
1Waʼa ntadulako ncombori nto Gilea, ana i Makiri, makumpu i Manase, ana i Yusupu, njoʼu mangkoho i Musa pai waʼa ntadulako ntaninya. 2#Pai. 27:7 Natoʼo ntau seʼe, “Komi mantila tana ndapokau i mPue ri waʼa nto Isaraeli malulu jaya mpoʼundi. Ndapokau woʼu komi mawaika tana panta ri kasangkompo mami i Selapeha inceʼemo ri waʼanya anu weʼa. 3Paikanya anu da ndaendo ane tau seʼe setu mampolangkai tuama ungka ri lemba ntaninya, tana ntau seʼe da napotumpumo lemba setu. Ane ewanceʼe tana anu tesua ri lemba mami da makuramo. 4Ri Taʼu Pampapewalili, ri tempo setu pura-pura aga-aga anu roo ndapobalu da ndapapewalili muni ri tumpunya, tana waʼa anaweʼa i Selapeha da napatumpumo waʼa langkai ntau seʼe, painaka tana setu bareʼemo teimba ri lemba mami.”
5Ungka lairia naparata i Musa ri to Isaraeli padika i mPue seʼi, “Nunjaa anu natoʼo waʼa muli i Yusupu setu monco, 6pai inceʼe puʼunya ndatoʼo i mPue, waʼa anaweʼa i Selapeha maya mampolangkai isema ntano tuama anu napokono ntau seʼe, podoia tuama anu sambaʼa-mbaʼa lemba pai tau seʼe. 7Tana panta nto Isaraeli da teimba ri lembanya. 8Sambaʼa-sambaʼa weʼa anu mampotumpu tana panta ri raya sambaʼa lemba nto Isaraeli sangaya-ngaya da mampolangkai tuama anu ri lemba ntau seʼe. Ane ewanceʼe pura-pura to Isaraeli da mampotumpu tana panta ungka maʼi ngkai ntau seʼe, 9rantani tana panta bareʼe da telimba-limba ungka ri lemba sambaʼa njoi lemba ntaninya. Salemba-salemba to Isaraeli da mampotumpu tana pantanya ngkalionya.”
10-11Mewali silulu pai padika i mPue anu ndatoʼo ri Musa, waʼa ana i Selapeha anu alima weʼa setu, inceʼemo i Mahila, i Tirisa, i Hogela, i Mika pai i Noa da mampolangkai kasangkomponya anu mosupa tondoka papanya. 12Tau seʼe mampolangkai tuama ri lemba muli i Manase, ana i Yusupu. Inceʼe painaka tana panta ntau seʼe, da napotumpu ntau ungka ri banca mpapanya.
13Ewanceʼemo podede mpadika anu ndapakanoto i mPue ri to Isaraeli mampoliu i Musa, sindara tau seʼe njaupa ri rato Moabi ri wiwi Koro Yarade, mosu ri kota Yeriko.
