PAIMBA 31
31
Pampesawaki to Mijea
31:1-12
1I Pue mompau ri Musa ndatoʼo, 2“Pesawakimo to Mijea ua kajaʼa mpowianya ri to Isaraeli. Ane roo setu nepa da mate siko.”
3Natoʼo i Musa ri waʼa nto Isaraeli, “Ndipompatikalimo da moʼiwali, komi da mampoʼiwalika to Mijea da mawianaka popahuku i mPue ri tau seʼe. 4Salemba-salemba to Isaraeli da ndipatoka sancowu tau anu maroso da moʼiwali.”
5Da ndipilisimo sancowu tau ri salemba-salemba to Isaraeli, poromunya sampuyu pai radua ncowu tau anu tokamo da moʼiwali. 6Naʼiowaka i Musa tau seʼe moʼiwali napoyunuki i Pinehasi ana tadu mpanyomba Eleasari. I Pineha mangkeni waʼa mparewa magali pai surupeta anu da mewali petondoni mpeʼiowaka. 7Silulu pai songka i mPue ri Musa, napoʼiwalikamo nto Isaraeli to Mijea, pura-pura tuama ndapepate, 8tesua alima mokole nto Mijea, inceʼemo: i Ewi, i Reke, i Suri, i Horu pai i Reba. I Bila ana i Beori woʼu ndapepate.
9Natawani waʼa nto Isaraeli waʼa mbeʼa pai waʼa ananggodi nto Mijea, waʼa aga-aga pai waʼa mpinatuwu ntau seʼe ndapamuru. 10Waʼa ngkota pai waʼa ngkema ntau seʼe pura-pura ndatunju. 11Roo setu nateomo waʼa nto Isaraeli pura-pura anu napamuru setu, tesua waʼa mpinatuwu pai waʼa ntawani, 12nakeni ntau seʼe ri Musa pai tadu mpanyomba Eleasari pai ri waʼa nto Isaraeli. Ri tempo setu ntongo mokema ri rato Moabi, ri wiwi ngKoro Yarade, mosu ri kota Yeriko.
Pewalili surodado nto Isaraeli
31:13-24
13Mesuwumo i Musa, i Tadu mpanyomba Eleasari ungka ri raya ngkema sangkani pai waʼa ntadulako nto Isaraeli masuncu waʼa ncurodado nto Isaraeli. 14Napokarau i Musa waʼa ntadulako ncurodado sangkani pai waʼa ncurodado anu nepa mewalili ungka ri poʼiwali setu. 15Natoʼoka tau seʼe, “Ara wenu painaka komi mantuwuri waʼa mbeʼa setu? 16#Pai. 25:1-9 Ara banya waʼa mbeʼa saretumo anu napokau i Bila mangkanarasi to Isaraeli ri Peori da mampalaika i Pue! Pai incetumo anu mampareʼe rugi ri waʼa ntau i Pue! 17Mewali, seʼi-seʼi ndipepatemo pura-pura ananggodi tuama pai pura-pura weʼa anu banyamo anaweʼa. 18Paikanya waʼa mbeʼa anu ntongo anaweʼa bareʼepa naepe koro ntuama, inceʼe nditimamo galami. 19Pai komi anu roomo mampepate tau bara anu maisumo watangkoro ntau mate ndikaroo-roo riunya ri sambaliku mpokema papitu ndeme kasaenya. Ri eo anu katatogo pai kapapitu komi pai waʼa mbeʼa anu nditawani setu da mawianaka upacara pompakagali. 20Pura-pura rengko pai parewa anu ndapowia ungka ri pela mpinatuwu, pela ngkaju pai ungka ri wuyu mbula sangaya-ngaya da ndapakagali.”
21Ungka lairia natoʼo i Tadu mpanyomba Eleasari, waʼa ntau anu nepa mewalili ungka ri poʼiwali setu, “Seʼimo podede padika anu ndawai i mPue ri Musa. 22-23Wuwunya anu bareʼe nakoni apu, ewa wuyawa, salaka, tambaga, besi, tima mabuya pai maeta, sangaya-ngaya da ndapakagali mampoliu apu. Ungka lairia waʼa mparewa setu sangaya-ngaya da ndapakagali pai ue mpoʼupacara pompakagali naka neʼemo wali ngkakarika muni. Pura-pura parewa ntaninya anu da nakoni apu sangaya-ngaya da ndapakagali pai ue upacara pompakagali. 24Ri eo anu kapapitu da ndibusu rengkomi, nepa da magali muni komi, pai mayamo mesua ri raya ngkema.”
Pampotila parewa anu ndapamuru
31:25-54
25I Pue mompau ri Musa ndatoʼo, 26“Siko pai Tadu mpanyomba Eleasari sangkani pai waʼa ntadulako nto Isaraeli da mangaimba pura-pura anu ndapamuru setu, tesua tau ndatawani pai pinatuwu. 27Pura-pura anu ndapamuru setu, da nutila radua da siwia-wia kasondonya, santila gala waʼa ncurodado anu njoʼu moʼiwali pai santila gala nto Isaraeli anu ntaninya. 28Pombai anu tepatani da tilaku, Pue, timamo ungka ri tila waʼa ncurodado, ri raya anu alima atu, madago tawani, madago japi, kalide, bimba bara mbula, sambaʼa da nutima. 29Pura-pura setu waika i Tadu mpanyomba Eleasari, mewali ewa panyomba ri Yaku, Pue. 30Ungka ri santila anu da tila ntau sondo, ri raya anu alima mpuyu timamo sambaʼa, madago tau tawani, madago japi, kalide, bimba pai mbula. Pura-pura setu waikamo to Lewi anu mampasilolongani Kemaku.” 31Nawianaka i Musa pai i Tadu mpanyomba Eleasari silulu pai anu ndasongkaka i mPue.
32-35Ri sambaliku anu lawi roo natima waʼa ncurodado galanya, romu anu ndapamuru setu: 675.000 bimba pai mbula, 72.000 japi, 61.000 kalide pai 32.000 anaweʼa anu bareʼepa maincani tuama. 36-40Santila ungka romunya setu ndawaika waʼa ncurodado, ewanceʼi kategaʼarakanya: 337.500 bimba pai mbula, ndapatani 675 gala i mPue; 36.000 japi, ndapatani 72 gala i mPue; 30.500 kalide, ndapatani 61 gala i mPue; 16.000 anaweʼa anu bareʼepa maincani tuama ndapatani, 32 gala i mPue. 41Pura-pura anu ndapatani setu nawaimo i Musa ri Tadu mpanyomba Eleasari da mampanyombaka ri Pue, silulu pai songka i mPue.
42-46Tila waʼa ntau sondo siwia kamarianya pai tila waʼa ncurodado: 337.500 bimba pai mbula, 36.000 japi, 30.500 kalide, 16.000 anaweʼa anu bareʼepa maincani tuama. 47Silulu pai songka i mPue, natima i Musa sambaʼa tau tawani pai sambaʼa pinatuwu ri raya anu alima mpuyu, nepa nawaika waʼa nto Lewi anu motetala ri raya Kema i mPue.
48Ungka lairia, waʼa ntadulako ncurodado nto Isaraeli anu mawawanaka tau seʼe ri poʼiwali rata madadu i Musa, 49maʼi mantoʼo, “Kapetumbu ri komi, roomo kaimba waʼa ncurodado anu katadulakoni. Tongawa imba ntau seʼe gana-gana bareʼe anu tetaji mau sambaʼa tau. 50Inceʼe puʼunya kami mangkeni waʼa mparewa wuyawa, toga, langke, sinci, jali pai enu anu napamuru ntau seʼe sambaʼa pai sambaʼa. Pura-pura seʼi kawai kapanyombaka ri Pue, da naka sira todo mangabolangi kami.” 51Natarima i Musa pai Tadu mpanyomba Eleasari wuyawa setu pura-pura anu motaʼa parewa anu madolidi. 52Pombai panyomba waʼa ntadulako ncurodado setu mosu radua atu kilo kaneenya. 53Paikanya waʼa ncurodado setu roomo natima tilanya sambaʼa-sambaʼa seʼe ungka ri anu ndapamuru setu. 54Nakenimo i Musa pai Tadu mpanyomba Eleasari wuyawa setu ri Kema i mPue da naka ndakantawi i mPue waʼa nto Isaraeli.
