PAIMBA 27
27
Waʼa ana i Selapena anu weʼa
27:1-11
1I Selapeha mampotumpu alima ananya anu weʼa, inceʼemo: I Mahila, i Noa, i Hogila, i Mika pai i Tirisa. Papa i Selapeha i Heperi, papa i Heperi i Gilea. Papa i Gilea i Makiri, papa i Makiri i Manase, pai papa i Manase i Yusupu. 2Ana i Selapeha anu alima setu njoʼu mancuara i Musa pai Tadu mPanyomba Eleasari, sangkani paiwaʼa ntadulako pai pura-pura tau sondo anu njau tepasambaka ri suara dampo wombo ngKema i mPue. Natoʼo ntau seʼe, 3“Papa mami mate ri pada bone pai sira bareʼe mampotumpu ana tuama. Sira banya yunu i Kora anu meewa ri mPue. Papa mami mate ua salaa ngkalioa. 4Paikanya wenu painaka toʼoa sangaya-ngaya posamo ungka ri banca Isaraeli, podo ua sira bareʼe mampotumpu ana tuama? Ndiwaika kami tana da kapopanta sangkani-ngkani pai waʼa ngkasangkompo mpapa mami.”
5Inceʼe painaka naparata i Musa ri Pue perapi ntau seʼe setu, 6nepa ndatoʼo i mPue ri Musa, 7#Pai. 36:2 “Nunjaa anu natoʼo waʼa i Selapeha setu lawi sintinaja. Mewali ndiwaikamo tau seʼe tana da napopanta sangkani-ngkani pai waʼa ngkasangkompo mpapa ntau seʼe. Panta i Ncelapeha sangaya-ngaya da ndapantaikamo waʼa ananya anu weʼa. 8Toʼokamo to Isaraeli, ane reʼe sambaʼa tuama mate pai bereʼe ananya tuama, tananya pantanya da ndatumpuika ananya anu weʼa. 9Ane bareʼe ananya anu weʼa, tana pantanya setu da ndatumpuika kasangkomponya tuama. 10Ane bereʼe kasangkomponya tuama, tananya setu da ndatumpuika kasangkompo mpapanya anu tuama. 11Ane siʼa bereʼe kasangkomponya anu tuama, pai bereʼe woʼu kasangkompo mpapanya anu tuama, tananya setu da napotumpu ntinanya anu mosu mpodago.” Pompakanoto setu da nalulu nto Isaraeli ewa padika anu ndaparata i mPue mampoliu i Musa.
I Yosua ndapilisi masawani i Musa
27:12-23
(Paw. 31:1-8)
12 #
Paw. 3:23-27, 32:48-52 Ndatoʼo i mPue ri Musa, “Pandakemo ri wawo Buyu Abari, ungka ndatiria da nupampapowawo tana anu da kuwaika to Isaraeli. 13Ane roomo nupapowawo, nepa da mate siko ewa tukakamu i Haruni, 14maka ri pada bone Sini komi radua maewamo songka. Sindara ri Meriba tau sondo manggantali yaku, bareʼe ndipokono mampatongawa kuasaku ri suara ntau seʼe kakononya ue setu.” (Inceʼe tepewali ri mata ue Meriba ri Kadesi, ri pada bone Sini).
15Nepa mekakai i Musa natoʼo, 16“Boo Pue Ala, anu mangawai katuwu ri pura-pura anu tuwu, merapi puru yaku, nditujumo tau anu mangkoto da mawawanaka banca seʼi; 17#1 Raj. 22:17, Yeh. 34:5, Mat. 9:36, Mrk. 6:34 sambaʼa tau anu mangkoto da mewali tadulako mpoʼiwali ri tempo mpoʼiwali ntau seʼe. Neʼe ndipapali waʼa ntaumi seʼi, da ewa bimba anu bareʼe mampotumpu topongkambi.”
18 #
Pa. 24:13
Ndatoʼo i mPue ri Musa, “Peboomo i Yosua ana i Nuu. Siʼa sambaʼa tau anu loʼe. Doncomo tanoananya. 19Pokaumo siʼa mekakore ri suara nTadu mPanyomba Eleasari pai tau sondo. Ri suara ntau seʼe pura-pura da nupamparata, kaʼi Yosuanya poncawanimu. 20Pepombaikamo ri siʼa santila kakuasamu, da naka napedongeka nto Isaraeli siʼa. 21#Pa. 28:30, 1 Sem. 14:41, 28:6 I Yosua sangaya-ngaya da merapi totoraka ungka ri Tadu mPanyomba Eleasari, pai i Eleasa sangaya-ngaya da mampeoasi pepokonoku mampoliu Uri pai Tumi. Da ewanceʼe pamponinika i Eleasa i Yosua pai waʼa nto Isaraeli ri mpengaya-ngaya anu da nawianaka ntau seʼe.” 22Nawianaka i Musa silulu pai songka i mPue ri siʼa. Napokau i Yosua mekakore ri suara nTadu mPanyomba Eleasari pai tau sondo. 23#Paw. 31:23 Nepa nadonco tanoana i Yosua, nepa naparata kaʼi Yosuanya poncawaninya, silulu pai anu ndatoʼo i mPue ri siʼa.
