YOSUA 9
9
Waʼa nto Gibeo mambambasi i Yosua
9:1-27
1Bambari kono waʼa mpenangi nto Isaraeli tolelemo ri waʼa mokole anu njau ri tondo kasoyoa ngKoro Yarade- ri buyu mongkodo, ri puʼu buyu mongkodo, pai ri rato ri santuntu wiwi nTasi ri Tongo rantani rata ri Buyu Libano anu ri tondo utara inceʼemo waʼa mokole nto Heti, Amori, Kanaʼa, Perisi, Hewi pai Yebusi. 2Pura-pura mokole setu mogombo mompasambaʼa-mbaʼa maungku i Yosua pai waʼa nto Isaraeli.
3Paikanya waʼa nto Gibeo ungka ri banca nto Hewi nadongemo kono powia i Yosua ri waʼa nto Yeriko pai waʼa nto Ai. 4Nabotusi ntau seʼe da mangambambasi i Yosua, naʼulaya ntau seʼe waʼa ngkaru anu marontomo, pai waʼa kandu-kandu anggoro anu majaʼamo taʼanya anu ndapowia ungka ri pela ri kalide ntau seʼe. Nepa napatoka roti anu mangau pai kebongonamo. 5Nepa napake ntau seʼe rengko anu masia-siamo pai talupa anu marontomo pai anu mbotambamo. 6Ewanceʼe napampowia ntau seʼe nepa njoʼu momberata pai i Yosua ri kareʼe mpokema ntau seʼe ri Giligali, nepa natoʼoka siʼa pai waʼa nto Isaraeli, “Kami seʼi nepa jela ungka ri tana lawa da maʼi mampareʼe pojanji pai komi.”
7 #
Pa. 23:32, 34:12, Paw. 7:2 Paikanya natoʼo nto Isaraeli, “Nunjaa yowenya kami da mampareʼe pojanji pai komi? Bara podo mosu-mosu ungka ireʼi kareʼe mpearimi.”
8Natoʼo ntau seʼe, “Mabuya raya mami da mawianaka nunjaa ntano anu ndisongkaka kami.”
Meoasi i Yosua ri tau seʼe natoʼo, “Isema komi seʼi? pai ungka ri tana mbeʼi?”
9Mesono tau seʼe natoʼo, “Kami rata ungka ri tana anu lawa mpodago ungka ireʼi, pue, maka kadongemo kono i mPue Ala anu ndipanyomba. Kadongemo pura-pura anu ndapowia ri tana Masiri, 10#Pai. 21:21-35 pai nunjaa anu ndawianaka ri radua mokole nto Amori anu reʼe ri tondo pebetea ngKoro Yarade inceʼemo i Sihoni mokole ri Hesiboni sangkani pai i Ogo mokole ri Basani anu meari ri Asitaro. 11Kami seʼi napokau waʼa ntadulako pai pura-pura bangani ngkota mami, tau seʼe mampatokaka kami baku ri pelinja mami maʼi ireʼi mampomberataka komi, kami rata mangantoʼoka komi, kami da mewali palilimi. Inceʼe painaka kami merapi kapuru ndayami da mampareʼe pojanji pai kami. 12Koisa ndipewule, roti baku mami seʼi. Ri tempo mpalai mami roti ntongo maramu-ramupa. Paikanya seʼi ndipeole mangaumo pai kebongonamo. 13#2 Sem. 1:18 Pai waʼa kandu-kandu anggoro seʼi ntongo dawoʼupa ri tempo mpalai mami nepa kabangani; paikanya seʼi-seʼi ndipeolemo! Masia-siamo. Rengko mami, talupa mami majaʼamo ua kalawa mpelinja mami seʼi.
14Natarima waʼa nto Isaraeli sakodi pangkoni waʼa nto Gibeo setu, pai bareʼemo napeoasi ntau seʼe riunya ri mPue kono inceʼe. 15Napareʼemo i Yosua pojanji mpobale pai waʼa nto Gibeo setu, pai mojanji bareʼe da mampepate tau seʼe. Waʼa ntadulako nto Isaraeli woʼu mojanji da mangabangani pojanji setu.
16-17Paikanya tongawa ri katatogo ndemenya ungka ri pampareʼe pojanji setu, ratamo to Isaraeli ri waʼa ngkota nto Gibeo, inceʼemo Kepira, Beero pai Kiria-Yeari ri daera ntau setu. Nepa ndaincani kareʼe nto Gibeo setu bareʼe lawa ungka ri Giligali. 18Paikanya waʼa nto Isaraeli bareʼe maya mampepate tau seʼe, maka waʼa ntadulako nto Isaraeli roomo montandokoro ri tau seʼe mamposabi toʼo i mPue Ala pue nto Isaraeli. Pura-pura to Isaraeli manggantali waʼa ntadulako ntau seʼe kakononya inceʼe. 19Paikanya mesono waʼa ntadulako setu, “Bareʼemo maya ndisosoi, maka kami roomo montandokoro mamposabi toʼo i mPue Ala pue nto Isaraeli. Seʼi-seʼi kita bareʼe maya mampowia jaʼa ri tau seʼe. 20Kita bareʼe maya mampepate tau seʼe maka kita roomo mojanji, pai ane kita malewa janji, kita da ndahuku i mPue Ala. 21Mewali, ndipapaliumo naka tuwu tau seʼe, paikanya kita pura-pura da mampapewali tau seʼe, da mawesoka kita kaju, da mantombuka kita ue.” Ewanceʼemo pontotoraka waʼa ntadulako setu.
22Nepa ndapeboosi waʼa nto Gibeo setu mancuaraki i Yosua, natoʼo i Yosua, “Wenu painaka komi mambambasi kami nditoʼo tanami lawa mpodago, ntanoka seʼi podo mosu-mosu? 23Ua ewanceʼe powiami, i mPue Ala da mangahuku komi. Bancami bareʼe da bali-bali mewali watua, topombeso kaju pai toponombu ue ri Banua mPue Ala pueku.”
24Mesono tau seʼe natoʼo, “Painaka ewanceʼe powia mami maka kadongemo i mPue Ala puemi setu mampokaumo i Musa pomokaua setu, da mangawaika komi samalele ntana seʼi pai da mampepate pura-pura tau banganinya ri tempo ndiparampa tana seʼi. Maeka kojo raya mami boi ndipepate kami, inceʼe painaka kapowia pura-pura setu. 25Seʼi-seʼi kami reʼe ri dodo mpale ngkuasami. Ndipowiamo ri kami nunjaa anu malulu pangkitami madago.” 26Ewaseʼi pabotusi i Yosua: siʼa mantuwuri waʼa ntau setu, bareʼe nawai to Isaraeli da mampepate tau seʼe. 27Paikanya tau seʼe da napapewali watua – topombeso kaju, toponombu ue ri waʼa nto Isaraeli pai anu da ndapake ri lampaʼani mpanyomba ri mPue. Rantani wawaseʼi tau seʼe ntongo mawianaka tetala setu ri tampa anu ndapakanoto i mPue da kareʼe mpanyomba ri sira.
