YOSUA 22
22
Waʼa ntau anu ungka ri lemba ri pebetea mewalili ri kareʼenya
22:1-9
1Ungka lairia napeboo i Yosua waʼa ntau anu ungka ri lemba i Rube, i Gati pai santila ungka ri lemba i Manase anu ungka ri pebetea ngKoro Yarade, 2#Pai. 32:20-32, Yos. 1:12-15 nepa natoʼoka tau seʼe, “Komi roomo mawianaka pura-pura anu napesongkaka i Musa pomokau i mPue setu ri komi. Pai komi woʼu mampedongeka pura-pura songkaku. 3Sangkasae seʼi bareʼe ndipapaliuka waʼa ngkasangkompomi to Isaraeli anu ntaninya mombetoto ngkalionya. Ri gori ngkamonconya ndilulumo waʼa ncongka i mPue Ala puemi. 4Mewali, silulu pai pojanji i mPue Ala puemi ndawaimo kaʼuono ri waʼa ngkasangkompomi to Isaraeli anu ntaninya. Mewali seʼi-seʼi ndipewalilimo ri tanami ri tondo pebetea ngKoro Yarade setu anu nawaika komi i Musa dagalami owi. 5Pai komi da titimama mepoʼinaya ri waʼa mpadika anu napesongkaka i Musa ri komi inceʼemo: Potowemo i mPue Ala puemu, da ndilulu pepokono-A, mepoʼinaya ri waʼa ncongka-A, todo ri Sira pai ndipanyombamo ri Sira ri kaliogu ndayami pai ri gori pangkoto ntanoanami.” 6-9Ungka lairia napapoiwo tau seʼe nepa napapalai mewalili ri wilaya ntau seʼe pai natotoraka natoʼo, “Seʼi-seʼi komi koreʼe mewalili mangkeni waʼa mpinatuwu, salaka, wuyawa, tambaga, besi pai rengko. Waʼa aga-agami setu da nditilaka woʼu waʼa ntau ntaninya anu salemba-lemba pai komi.” Malaimo kojo waʼa nto Rube, to Gati pai to Manase anu ungka ri tondo pebetea ngKoro Yarade, mampalaika waʼa nto Isaraeli anu ntaninya, tau seʼe malai ungka ri Silo tana Kanaʼa ndeku ri tana ntau seʼe ngkalionya ri daera Gilea. Tau seʼe mampeari tana setu silulu pai songka i mPue mampoliu i Musa.
(Sampotila radua ungka ri lemba i Manase mantarima ungka ri Musa, tana anu tondo ri pebetea ngKoro Yarade, pai sampotila radua woʼu ungka ri lemba i Manase mantarima tana ungka ri Yosua inceʼe tana anu tondo ri kasoyoa ngKoro Yarade sangkani-ngkani pai waʼa lemba nto Isaraeli anu ntaninya.)
Lampaʼani anu mosu ri Koro Yarade
22:10-34
10Jabutu jela ri Geliloti, waʼa nto Rube, to Gati pai to Manase anu tondo ri pebetea ngKoro Yarade – tau seʼe ntongo tondo ri kasoyoa ngKoro Yarade – nawangu ntau seʼe sambaʼa lampaʼani anu bangke pai meawa mosu koronya. 11-12Tedongemo ri waʼa nto Isaraeli anu ntaninya, pai napantoʼo ntau seʼe, “Waʼa nto Rube, to Gati pai to Manase anu tondo ri pebetea mawangumo lampaʼani ri Geliloti mosu ri Koro Yarade kono ri tana anu ri daerata!” Mompasambaka tau seʼe ri Silo da njoʼu mampoʼiwalika waʼa lemba nto Isaraeli anu tondo ri pebetea ngKoro Yarade setu.
13Nepa napokau ntau seʼe i Pinehasi ana i nTadu mPanyomba Eleasa da njoʼu ri to Rube, to Gati pai to Manase anu ri Gilea tondo ri pebetea ngKoro Yarade. 14Simpoyunu pai i Pinehasi njoʼu woʼu tau sampuyu waʼa nto pombawanaka nto Isaraeli – sambaʼa tau ungka ri sambaʼa-sambaʼa lemba anu reʼe tondo ri kasoyoa ngKoro Yarade, waʼa ntau setu inceʼemo waʼa ntadulako ri oyo ntau ri salemba setu. 15Jelamo kojo tau seʼe ri lemba i Rube, i Gati pai i Manase ri daera Gilea. 16#Paw. 12:6 Tau seʼe mompau mamponcaru ngkoroka pura-pura tau i mPue ri waʼa nto Rube, to Gati pai to Manase, natoʼo, “Wenu painaka ndipowia anu majaʼa seʼi ri Pue Ala pue nto Isaraeli? Ndipangawangumo lampaʼani ngkaliomi komi maewamo i mPue! Komi bareʼemo mepoʼinaya ri waʼa ncongka-A! 17#Pai. 25:1-9 Bareʼemo ndiendo kasalaata owi ri Peori? Tempo setu kita ndahuku i mPue pai juʼa lele, neʼe ndipesaru-saru kakitanya seʼi tau i mPue ngkalio-A! Rantani seʼi-seʼi ntongo taepepa kaparinya. Ara bareʼepa gana inceʼe? 18Pai seʼi-seʼi komi da mantalikusi woʼu i Pue? Ane sandeme seʼi komi maewa i Pue, iraneo Sira da mangkarausi pura-pura to Isaraeli. 19Ane daerami seʼi karika bareʼe sintinaja da kareʼe mpanyomba ri Pue, ndipelimbamo ri maʼi ri daera i mPue njairia kanjau Kema i mPue. Ndiperapimo santila daera mami, paikanya neʼe komi da maewa i Pue, bara maewa kami ua ndiparangani woʼu sambaʼa lampaʼani ntaninya, seʼi reʼemo lampaʼani i mPue Ala pueta. 20#Yos. 7:1-26 Neʼe ndikalingani, i Akani ana i Sera anu bareʼe malulu songka i mPue kakononya waʼa aga-aga anu sangaya-ngaya da ndagero, ewambeʼimo pewalinya? Pura-pura to Isaraeli ndahuku! Anu masalaa podo i Akani, paikanya anu mate banya podo siʼa ngkalionya!”
21Ungka lairia mesono waʼa nto Rube, to Gati pai to Manase anu tondo ri pebetea setu, 22“Anu Makuasa inceʼemo i Pue! Anu Makuasa inceʼemo i Pue! Sira maincani wenu painaka kapowia inceʼi! Ane rapanya tinako ndaya mami mampowia inceʼi ua da maewa i Pue bara ua bareʼemo kaaya Sira, mbolimo kami mate iseʼi seʼe! 23I Pue ngkalio-A anu da mahuku kami, ane kami mantinako ndaya da maewa i Pue ua pangawangu mami lampaʼani tila mami da kapampanyombaka panyomba anu ndaʼombasi bara panyomba anu motaʼa pangkoni bara panyomba ngkasimadago ri wawonya. 24Ee waʼa ngkasangkompo banya inceʼe anu katinako ndaya! Kami mangawangu lampaʼani setu, maka ipu raya mami boi ripurinya waʼa mulimi da mompau ri waʼa muli mami natoʼo, ‘Komi bereʼe pokentami bara nunjaa-njaa pai Pue Ala pue nto Isaraeli! 25Peole, Sira madika Koro Yarade seʼi ri oyota inceʼe anu maoyoti komi pai kami waʼa nto Rube, to Gati. Mewali monco kojo komi bereʼe pokentami bara nunjaa-njaa pai Pue!’ Mewali nunjaa anu da mewali ripurinya? Manoto waʼa mulimi da mampapopuʼu waʼa muli mami da mampeʼontoka manyomba ri mPue. 26Mewali, kami mawangu lampaʼani, banya tila mpanyomba anu ndaʼombasi bara tila waʼa mpanyomba mami, 27paikanya mewali patiendo ri kita mpotimali-mali, pai tila waʼa mulita ripurinya, kamonconya kami seʼi manyomba ri Pue ri Kema mpeari-A, mangkeni panyomba anu ndaʼombasi pai waʼa mpanyomba ntaninya pai panyomba ngkasimadago. Ane ewanceʼe waʼa mulimi bareʼe da mantoʼoka muli mami, komi bereʼe pokentami bara nunjaa-njaa pai Pue. 28Mewali, tinakondaya mami inceʼemo: ane rapanya mulimi da mantoʼo ewanceʼe, da mesono muli mami, ‘Peole lampaʼani setu! Tau piamo mami mawangu sambaʼa lampaʼani anu siwia pai lampaʼani i Pue, banya da ndapampanyombaka panyomba anu ndaʼombasi bara waʼa mpanyomba anu ntaninya paikanya da mewali petondoni ri kita mpotimali-mali.’ 29Da ndiayamo, kami bareʼe da maewa i Pue bara da mampeʼontoka manyomba ri Sira, ua pampowia lampaʼani ntaninya, da ndapampanyombaka panyomba anu ndaʼombasi bara panyomba anu motaʼa pangkoni, bara panyomba ntaninya, seʼi reʼemo lampaʼani i mPue Ala pueta ri suara ngKema peari i mPue.”
30Pura-pura anu natotoraka nto Rube, to Gati pai to Manase anu tondo ri pebetea setu nadonge i nTadu mPanyomba Pinehasi sangkani pai tau sampuyu tadulako nto Isaraeli anu tondo ri kasoyoa ngKoro Yarade. Menaa raya ntau seʼe madonge totoraka setu. 31Nepa mompau i Pinehasi ana i nTadu mPanyomba Eleasa natoʼoka waʼa nto Rube, to Gati pai to Manase anu ri pebetea, “Seʼi-seʼi manoto ri raya mami i Pue mangkariani kita, maka komi bareʼe maewa Sira. Komi mancorepaka to Isaraeli ungka ri popahuku i mPue.”
32Roo setu malaimo i Pinehasi sangkani pai tau sampuyu tadulako nto Isaraeli setu. Napalaikamo ntau seʼe to Rube, to Gati setu ri Gilea, tau seʼe mewalili ri Kanaʼa, nepa naparata ntau seʼe anumewali setu ri waʼa nto Isaraeli. 33Menaa raya ntau seʼe madonge bambari setu, painaka naunde-unde ntau seʼe i Pue Ala. Bareʼe napau ntau seʼe tangara ndaya ntau seʼe da mampoʼiwalika to Rube, to Gati da magero tana ntau seʼe.
34Ripurinya natoʼo nto Rube pai to Gati, “Lampaʼani seʼi mewali sabi ri kita pura-pura kaʼi Puenya inceʼe Pue Ala.” Napapotoʼoka ntau seʼe lampaʼani setu “Sabi”.
