YAKOBU 2
2
Neʼe mampilisi tau
2:1-13
1Ee waʼa ngkasangkompo! Komi waʼa ntau anu meaya ri Yesu Kerisitu, Sira Pueta Anu Meawa, komi neʼe mampilisi tau podo mampeole lionya. 2Maka ane jela ri potobumi ambaʼa tau anu koreʼe mosinci wuyawa, pai madolidi porengkonya, pai jela woʼu sambaʼa tau anu kaasi-asi moseo-seo porengkonya, 3pai da meruu ndipantubunaka tau anu madolidi porengkonya. Da nditoʼoka siʼa, “Ndipotundamo komi ri gadera anu madolidi seʼi.” Paikanya ri tau kaasi-asi nditoʼoka, “Siko pekakoremo ri njau,” bara “Potundamo ri joia seʼi siko.” 4Ane ewanceʼe powiami, kamonconya komi mampaposisalamo tau malulu ponawa-nawami anu majaʼa.
5Neʼe ndikalingani, ee waʼa ngkasangkompo anu kupotowe! Waʼa ntau anu ndatoʼo kaasi-asi pai meaya ri lino seʼi, inceʼe anu ndapilisi i mPue Ala mewali tau koreʼe ri peaya ndaya. Waʼa ntau seʼe anu da mampotumpu poparenta anu ndajanji mPue Ala ri waʼa ntau anu mampotowe Sira. 6Paikanya komi jamampetikodi tau kaasi-asi, ntanoka waʼa ntau koreʼemo anu da mangkeni komi ri suara ntopobotusi. 7Tau seʼemo anu mampetikodi toʼo anu tetubunaka anu nditarima ungka ri Pue Ala!
8 #
Tad. 19:18
Waʼa mpowiami da ndapomonco ane ndiwianaka songka mPoparenta i mPue Ala anu lau ndaʼuki ri Sura Magali seʼi, inceʼemo, “Potowemo kasitaumu ewa pampotowemu koromu ngkaliomu.” 9Paikanya ane komi mampaposisala tau podo malulu pangkita matami, komi masalaa, pai tongawamo komi maewa songka i mPue Ala. 10Maka tau anu malewamo sanjaya ri songka mPue Ala, posokinya malewamo pura-pura songka i mPue Ala. 11#Pa. 20:13, 14, Paw. 5:17, 18 Maka Sira anu mantoʼo, “Neʼe mosalara,” sira seʼe anu mantoʼo, “Neʼe mepepate.” Mewali ane komi bareʼe mosalara, paikanya mepepate inceʼe seʼe maewa songka. 12Mewali ndipompaumo pai ndipolengkomo ewa tau anu da ndabotusi malulu padika i mPue Ala anu da mancorepaka tolino. 13Maka i Pue Ala bareʼe da mantuju kapande ndaya ri tau anu bareʼe pande mporaya. Paikanya kapande ndaya inceʼe meruu ngkarosonya pai popahuku!
Peaya pai powia
2:14-26
14Ee waʼa ngkasangkompo! Nunjaa yowe pompau ntau anu mantoʼo, “Yaku reʼe peayaku,” ane bareʼe natuju ri powianya? Ara da nakoto mpeaya ndaya anu ewanceʼe da mancorepaka siʼa? 15Ane rapanya reʼe sambaʼa kasangkompo anu sampepeaya bereʼe rengkonya pai bareʼe gana pangkoninya sandeme-sandeme. 16Nunjaa yowenya ane ndatoʼoka siʼa, “Porengkomo naka maramu pai pangkonimo!” – ane bareʼe nuwaika nunjaa anu da napoyoweka ri katuwunya? 17Ewanceʼe woʼu peaya ndaya ane bareʼe ndapatongawa ri powia, peaya ndaya anu ewanceʼe bereʼe yowenya.
18Bara da reʼe anu mantoʼo, “Reʼe tau anu meonda ri peaya ndayanya pai reʼe woʼu anu meonda ri powianya.” Da kusonoka tau setu, “Koisa tujuka yaku ewambeʼi peaya ndayamu anu bareʼe mepatongawa ri powiamu pai yaku da mantuju peaya ndayaku anu kupatongawa ri powia.” 19Ara banya ndiayamo kaʼi Pue Alanya podo sambaʼa? Waʼa inosa majaʼa seʼe naaya pai kandende-ndende nakeni ngkaeka ndaya ntau seʼe! 20Komi tengo gaga! Ara sangadi da kutujuka komi, kabareʼenya reʼe yowenya mampotumpu peaya ndaya anu bareʼe ndatuju ri powia? 21#Pal. 22:1-14 Ndipeolemo tau piamota i Burahima. Sira ndatarima i mPue Ala ua powia-A, ri ndapampanyombaka ana-A i Saki ri Pue Ala, ndapapombolemo ri wawo lampaʼani. 22Ireʼi tongawamo nepa da monco peaya ndaya ane ndatuju ri powia. 23#Pal. 15:6, 2 Taw. 20:7, Yes. 41:8 Inceʼe silulu pai anu naʼuki Ncura Magali ewaseʼi, “I Burahima meaya ri Pue Ala, pai ua peaya ndayanya setu siʼa ndatarima i mPue Ala ewa sambaʼa tau anu mawianaka pepokono i mPue Ala.” Inceʼe puʼunya pai ndapantoʼo, “Sira bale i mPue Ala.” 24Seʼi-seʼi tongawamo, tau anu ndatarima i mPue Ala ua powianya banya podo ua kareʼe mpeaya ndayanya.
25 #
Yos. 2:1-21
Ewanceʼe seʼe i Rahabu sambaʼa weʼa anu bareʼe tumoro. Siʼa ndatarima i mPue Ala ua powianya, anu mampolinggona pai mancambunika ri banuanya waʼa nto Isaraeli anu njoʼu padaso, pai mantulungi tau seʼe mantujuka jaya mpegolili anu ntaninya.
26Ewa katedikanaka ngkoro ane belau inosa, mate. Ewanceʼemo woʼu peaya ane bareʼe mepatongawa ri powia, mate.
