YESAYA 7
7
Sambaʼa nuntu tila i Mokole Ahasi
7:1-9
1 #
2 Raj. 16:5, 2 Taw. 28:5-6 I mokole Ahasi inceʼemo ana i Yota pai makumpu i Usia. Sindara pamparentanya Yahuda mewalimo poʼiwali. I Resi mokole nto Siria pai i Peka ana i Remalia mokole nto Isaraeli, tau seʼe rata maungku kota Yerusale. Paikanya bareʼe naleʼo masuaki kota setu.
2Padonge mokole nto Yahuda surodado nto Siria mesuamo ri tana nto Isaraeli maka lawi tau seʼe mosintuwu, maekamo siʼa sangkani pai bancanya painaka kandende-ndende jamo ewa puʼu ngkaju anu nanjuasi ngoyu.
3Ndatoʼo i mPue ri Yesaya, “Kenimo anamu i Seari Yasubi setu njoʼu mampomberataka i mokole Ahasi. Siko da momberata pai siʼa ri tando njaya ue tondo untunya, ri tampa mpobusu waʼa menatu. 4Toʼoka i mokole, siʼa da tikali mpaliu paikanya neʼe siputo rayanya. Kasengke i mokole Peka pai i mokole Resi pai waʼa ncurodado nto Siria bareʼe bara sangkuja rosonya, bareʼe bara meruu pai ndapampomarugi radua ntompo ayuta anu morangasu. 5Siria mompasambiramo pai to Isaraeli pai mokolenya. 6Tau seʼe da mangaungku Yahuda pai da mangaeka-ekasi waʼa ntaunya da naka mompasambali pai tau seʼe, nepa nalanti ana i nTabeeli mewali mokole.
7Paikanya Yaku, Pue, mangantoʼo inceʼe bareʼe da mewali, 8ua Siria bareʼe bara meruu rosonya pai Damasi indo ngkotanya, pai Damasi bareʼe bara meruu rosonya ungka ri mokole Resi. Ri raya anu onompuyu pai alima ntaʼu, to Isaraeli da tebureka pai bareʼemo da mewali sambaʼa banca. 9To Isaraeli bareʼe bara meruu rosonya ungka ri Samaria indo ngkotanya, pai Samaria bareʼe bara meruu rosonya ungka ri Mokole Peka.
Ane komi bareʼe monco-monco kojo meaya ri yaku, manoto komi bareʼe da ndikoto maewa.”
Petondoni Imanueli
7:10-25
10Reʼe woʼu nuntu i mPue anu ntaninya rata ri Ahasi: 11“Perapimo da naka i Pue Ala puemu mawaika siko sangaya petondoni, bara petondoni ungka ri lino kareʼe ntau mate anu ri aranya bara ungka ri yangi anu ri wawonya.”
12Mesono i Ahasi, natoʼo, “Yaku bareʼe kupokono mamperapi petondoni. Yaku bareʼe da mampebutuka i Pue.”
13Inceʼe painaka mompau i Yesaya natoʼo, “Ane ewanceʼe, pedongeka ee muli i Mokole Daudi! Ara bareʼepa gana nupangaʼuji kayombu ndaya ntolino, painaka da nuʼuji woʼu kayombu ndaya i mPue Ala pueku? 14#Mat. 1:23 Seʼi-seʼi i Pue ngkalio-A anu mawai petondoni ri siko; sambaʼa anaweʼa da manee koro da napoana sambaʼa ana tuama anu ndapapotoʼoka Imanueli. 15Ane bangke-bangkemo siʼa da nakotomo monawa-nawa ngkalionya, ri tana setu da gana-ganamo katuwu. 16Maka ri kabareʼepanya rata tempo setu, radua ncuo tana anu naparenta waʼa mokole anu nupokaeka setu da ndapalaika soa-soa.
17I Pue mampokau mokole nto Asuri, nepa siko sangkani paibangani ncomborimu sangkani pai waʼa mpalilimu da mampomberataka waʼa reme-reme ngkapari, inceʼepa woʼu anu meruu ngkajaʼa pai anu ndiepe ri katepogaʼa Isaraeli pai Yahuda.
18-19Ri tempo setu Pue da mampeboo to Masiri pai to Asuri, nepa da maʼi banca radua setu da ewa kakantompu-ntompu yale pai uani anu mangkantompusi waʼa ngoyo ungka ri buyu anu tindo pai oyo waʼa roka mbatu. Tau seʼe da mangkapusi pura-pura yopo ndui pai juku-juku pada.
20I Pue da mangasaro mokole nto Asuri da naka napowia to Isaraeli ewa powia nto popakou mangkou pura-pura wuyua ri woʼo pai pura-pura wuyu ngkoro.
21Ri tempo setu ane sambaʼa tau mamporewu mau podo sambaʼa japi anu mangurapa pai pai mbula radua, 22susu anu napareʼe mpinatuwu setu meruumo tila waʼa ntau anu totaʼa ri tana setu. Monco kojo, tau seʼe mangainu susu pai juyu.
23Ri tempo setu waʼa bonde anggoro anu ndapomuyaka anggoro salimpu-salimpu seʼe sancowu mpuʼu pai anu ndaolika sancowu doi salaka, da nakantuwusi yopo ndui. 24Tau anu njoʼu njairia sangaya-ngaya da mangkeni gorosi mpana pai mata mpana, maka juku-juku tana setu nakaʼuwi yopo ndui. 25Pai buyu mongkodo anu biasa ndapojamaa, bukemo woʼu pai yopo ndui, painaka bareʼemo nataha ntau njoʼu njairia. Tana setu jamo moyowe mewali tampa mpangande japi pai bimba.”
