YESAYA 45
45
I Pue mampantongko i Koresi
45:1-8
1I Pue mampilisimo i Koresi mewali mokole;
siʼa ndapakanoto da manganangi waʼa banca,
siʼa ndapakanoto da manganangi waʼa mokole.
I Pue mangalokaka siʼa waʼa baa-baa ngkota,
bereʼe mau sambaʼa anu da tedampo,
ndatoʼo i mPue ri siʼa,
2“Yaku da mampatokaka siko jayamu;
buyu pai pongku ntana da kupalene,
waʼa dampo tambaga da Kuposoki,
pai waʼa singkuagi besi da Kupuʼa.
3Siko da kuwaika
aga-aga anu tesambuni,
da naka nuincani kaya-kunya Pue, Pue Ala nto Isaraeli
anu mampeboomo siko ri toʼomu.
4Siko kupeboo pai kuwaika siko lanti,
mau bareʼe nuincani Yaku.
Kusongka siko da mampelae Isaraeli watua-Ku,
maka tau seʼe banca anu Kupilisi.
5Yakumo Pue bereʼe anu ntaninya,
Yaku Pue Ala Anu Sambaʼa-mbaʼa.
Siko roomo kuparewani,
mau bareʼe nuincani Yaku.
6Pura-pura setu Kuwianaka
da naka ungka ri pebetea rata ri kasoyoa
pura-pura tau da mangaincani ka-Yakunya Pue,
bereʼe anu ntaninya waʼanya poso Yaku.
7Yakumo anu mampapewali rema pai yangi,
Yaku anu mampareʼe rasi pai rugi.
Yakumo Pue anu mawianaka pura-pura setu.
8Ungka ri yangi da Kupatudu penangi ewa uja,
tana mekunganga mantarima,
nepa napatuwu katelapasaka;
Yaku Pue anu mawianaka painaka tepewali.”
I Pue mangkuasai sambawo lino pai madedewaka sejara
45:9-19
9 #
Yes. 29:16, Rom. 9:20 Marugimo tau anu mombebali pai anu mampapewali siʼa;
siʼa ewa kura tana anu maewa tau anu mampomoncu.
Ara tana mapuyu da mompeoasi ri topomoncu,
“Siko nunjaa nupowia?”
Ara kura tana da mantoʼoka tau anu mampowia bareʼe loʼe?
10Marugimo tau anu mantoʼoka tau tuʼanya,
“Wenu painaka yaku ndapoana ewanceʼi taʼanya?”
11 Pue, Pue Ala Magali pue nto Isaraeli mantoʼo,
“Peoasimo ri Yaku kono tempo anu nepa da rata.
Paikanya neʼe nupeoasi kono waʼa ana-Ku,
bara mampokau Yaku da mawianaka bara nunjaa.
12Yakumo Pue anu mampapewali lino,
pai mampareʼe tolino anu mampeari.
Ri kakuasa-Ku kubini yangi,
pai mancongka eo,
wuya pai waʼa betuʼe.
13Yakumo anu maʼiowaka i Koresi,
da mangawianaka tinako ndayaku,
pai mampapekakore kamonco.
Yaku da mangalene pura-pura jaya anu da napoliu.
Siʼa da mangawali baresi kota-Ku Yerusale
pai da mangalapasaka waʼa ntau-Ku anu ndatawani,
bareʼe ndasaro pai ndabayari.”
I Pue anu makuasa mangantoʼo.
14I Pue mangantoʼo ri Isaraeli,
“Potumpumo waʼa bangani ntana Masiri pai rasi Sudani.
Waʼa nto Seba anu makoje mewali taumu;
tau seʼe da melinja ntana mantonda siko seʼi palenya ndapungu.
Tau seʼe mombukotu meʼuru pai mangaʼaku,
‘i Pue Ala monco kojo mayunuki siko,
bereʼe Pue ntaninya waʼanya podo Sira!
15Pue Ala anu mancorepaka Isaraeli
inceʼemo Pue Ala anu bareʼe mampatongawa koro-A.
16Pura-pura tau anu mantaʼa turuki lamoa;
ndapakaea pai ndapetikodi.
17Paikanya Isaraeli ndasorepaka i mPue;
katesorepakanya da masae temponya.
Komi bareʼe ndapakaea pai ndapetikodi
rantani masae-sae.”
18I Pue anu malaburu yangi,
Siramo Pue Ala!
Sira anu mampapewali pai mampapotaʼa lino,
mampakaroso toa mekakore.
Sira mampapewali kareʼe anu soa-soa,
paikanya kareʼe anu ndapeari.
Sira anu mangantoʼo,
“Yakumo Pue, bereʼe anu ntaninya.
19Bareʼe kupesambunika mantoʼo pau,
bara podo rahasia.
Yaku bareʼe mampokau tau-Ku Isaraeli
da mampepali yaku ane bereʼe yowenya.
Yaku, Pue mangantoʼo anu monco,
pai mampapaincani nunjaa anu monco.”
Pue Anu Makuasa pai waʼa lamoa nto Babeli
45:20–46:13
20Ndatoʼo i mPue, “Ndipompasambakamo pai ndikamaʼimo sangkani-ngkani
komi pura-pura anu telapasaka ungka ri oyo waʼa banca!
Tengomo waʼa ntau anu malulu kaju turuki lamoa,
pai mekakai ri waʼa lamoa
anu bareʼe nakoto moncorepaka.
21Toʼomo kara-karamu pai imbamo petondoni ngkamonconya.
Mbolimo tau seʼe da mogombo sangkani-ngkani.
Isema anu mampobambarika inceʼe
pai mampapaincanika ungka ipiamo?
Ara banya Yaku Pue?
Bereʼe pue ntaninya waʼanya Yaku.
Yakumo Pue Ala anu monco pai toponcorepaka,
bereʼe ntaninya podo Yaku!
22Ee, waʼa ntau anu mampeari lino,
ndipewalili ri Yaku da naka komi ndasorepaka,
maka podo Yaku Pue Ala, bereʼe anu ntaninya.
23 #
Rom. 14:11, Plp. 2:10-11 Yaku roomo mojanji, pai janji-Ku bereʼe anu apa;
mamposabi koro-Ku ngkalio-Ku Yaku montando koro;
sambaʼa-sambaʼa tau anu mombukotu ri suara-Ku,
mompau ri basanya ngkalionya
mojanji da todo ri Yaku.
24Waʼa ntau anu mangantoʼo,
‘Kayoa pai karoso podo ungka ri Pue Ala kamaʼinya!’
Pura-pura tau anu mampobanciika Yaku,
da maʼi ri Yaku pai da mangarata ea mata.
25Paikanya muli i Yako da ndasore-paka,
pai tau seʼe da mangaunde Yaku, Pue.
