YESAYA 26
26
I Pue Ala da mampapenangi waʼa ntau-A
26:1-19
1Ri tempo setu tau da mampongayuka ngayu seʼi ri tana Yahuda:
“Ara marososa kotata,
I Pue Ala ngkalio mawangu bentenya,
ireʼi kita maʼuono.
2Lokamo waʼa baa-baa,
da naka mesua banca anu todo,
banca anu mawianaka pepokono i mPue Ala puenya.
3 Pue, komi anu mawai kaʼuono
pai kalindo ndaya ri tau anu maroso rayanya,
maka siʼa meaya ri Komi.
4Ndipeayamo ri Pue neʼe bali-bali,
maka i Pue Ala bareʼe bali-bali ndapangkariani kita.
5I Pue mampetikodi tau anu mobangke-bangke;
Sira mangagero kota ntau seʼe anu reʼe bentenya
pai mampalene sindali tana.
6Waʼa ntau kaasi-asi pai mapari katuwunya da maija-ijaki.”
7Tau anu mayoa raya da melinja ri jaya anu mayoa,
maka Komi Pue, mangaweteka jayanya.
8Kami mangalulu pobotusimi, boo Pue,
pai mampopea Komi;
ri Komimo peunde mami pai kamawo ndaya mami.
9Tanoanaku mampomawo komi ri ntongo mbengi,
rayaku mampomata-mata komi ri tempo mowuro.
Ane komi mangabotusimo lino,
waʼa bangani lino da mangaincani nunjaa anu monco.
10Sako tau majaʼa ndaporiokoi mpodago,
siʼa bareʼepa mampeguru nunjaa anu monco.
Sako ri tana anu naponinika mpadika sangaya-ngaya majaʼa engkonya,
pai bareʼe naʼaku kuasa i mPue.
11 #
Ib. 10:27
Pue, Komi toka mangahuku iwalimi,
paikanya bareʼe naincani ntau seʼe.
Mbolimo tau seʼe da kangimbe lionya
mangkita ndipampotowe waʼa ntaumi.
Mbolimo tau seʼe da pura opi,
ua popahuku anu ndipatokaka tau seʼe.
12 Pue, Komi da mampakalindo raya mami;
mpengaya-ngaya anu kapotetalaka
Komimo anu mampapewalika kami.
13Kami reʼemo napangkuasai waʼa mpue ntaninya,
paikanya podo komi anu kaʼaku,
boo Pue Ala pue mami!
14Tau seʼe matemo, pai bareʼemo da tuwu muni,
angganya bareʼemo da wali mpembangu.
Maka tau seʼe roomo ndaʼopisaka
pai bareʼemo da ndiendo woʼu.
15Komi anu mampaka teranga-rangani imba mami, waʼa ntaumi, boo Pue,
pai mangarangani kabangke ntana mami, inceʼe
painaka Komi ndabangkei.
16Komi mangahukumo kami;
ri raya ngkapari ndaya kamewalili ri Komi,
pai makakai ri Komi, Pue.
17Ewa weʼa anu moana,
mekakaule seʼi meʼode-ode mantodosaka juʼa,
ewanceʼemo kamo ri suara-Mi, Pue.
18Kami manee koro pai mekakaule majuʼa,
paikanya bareʼe mampoana bara nunjaa-njaa;
bareʼe kakoto mawai katesorepaka ri lino,
pai bareʼe marangani imba ntaunya.
19Waʼa ntau-Mi anu matemo da wali ngkatuwu muni,
wata ngkoro ntau mate da wali mpembangu muni.
Tau anu roo ndadayo ri raya
ntana da membangu pai da manggora-nggora.
Da ewa rini anu mampakadonde lino,
Komi mampatuwu waʼa ntau-Mi anu masaemo kamatenya.
I Pue mangahuku pai mancorepaka
26:20–27:6
20Pesuamo ri raya banuamu, nepa ndinampo wombo. Pesambuni riunya mangalantu naka manda karau ndaya i mPue. 21I Pue da menaʼu ungka ri kareʼe mpearia ri suruga da maʼi mangahuku bangani lino ua salaa ntau seʼe. Pepepate anu nawianaka ntau seʼe ri katesambuninya da ndapatongawa. Tana da mampatongawamo waʼa ntau anu mate ndapepate.
