2 SEMUELI 3
3
1Moʼiwali mpaliu waʼa ntau i Saulu pai waʼa ntau i Daudi, paikanya tongawa i Daudi kakomaroso-roso, pai waʼa ntau i Saulu kakomalente-lente.
Waʼa ana i Daudi anu tuama
3:2-5
2Karoo-roo i Daudi ri Heberoni, ndapoanamo aono ananya tuama, malulu posuncu mpampoana ewaseʼi:
i Amino inenya i Ahinoa ungka ri Yisirieli.
3i Kileabi, inenya i Abigai, bemba i Naba ungka ri Karameli.
i Abisalo, inenya i Maʼaka ana i Mokole Talamai ungka ri Gesuri.
4i Adonia, inenya i Hagi
i Sepaca, inenya i Abitali.
5i Yitera, inenya i Egela.
Ananya tuama anu aono setu paka ndapoana i Heberoni.
I Abineri mompasambiramo pai i Daudi
3:6-21
6Bareʼepa tepoda poʼiwali waʼa ntau anu melulu ri Daudi pai waʼa ntau anu melulu ri muli i Saulu, napari-pari i Abineri da naka meaya kojo ri siʼa waʼa ntau anu melulu ri Saulu setu.
7Mewali ri anu sandeme Isibose mentuluri i Abineri mowongo-wongo pai bemba piara i Saulu anu mampotoʼo i Risipa ana i Aya. 8Madonge petuluri setu, maʼai kojo kajaʼa ndaya i Abineri, natoʼo, “Ara ndisarumaka yaku mantalikusimo i Saulu, sambiramo pai to Yahuda? Ungka pontepuʼunya yaku todo mepoʼinaya ri papami i Saulu, pai waʼa ntinanya sangkani pai waʼa yununya. Yaku roomo mampelae pueku painaka bareʼe naleʼo i Daudi manganangi. Paikanya mau ewanceʼemo, komi mampakaea pai mampetikodi yaku ua weʼa! 9-10#1 Sem. 15:28 Aginya yaku mantulungi i Daudi, pai lawi roomo ndajanji i mPue ri siʼa, da mangantima kamokole seʼi ungka ri pale i Saulu pai waʼa mulinya, ne da ndalanti i Daudi mewali mokole ri to Isaraeli pura-pura pai Yahuda. Mbolimo i Pue Ala, mampepate yaku anu bareʼe kuwianaka janji i mPue Ala ri Daudi setu.” 11Pompau i Abineri setu bareʼe nakoto Isibose mompau mau sanjumi, maka maekanya ri Abineri.
12Ungka lairia napokaumo i Abineri tau ndeku mampomberataka i Daudi, anu ri tempo setu njau ri Heberoni, tau anu ndapokau setu mamparata pau ungka ri Abineri, ewaseʼi, “Isema kamonconya anu anu da mamparenta sambawo ntana seʼi? Da ndipareʼemo pojanji pai yaku, yaku tikalimo da mantulungi komi pueku, da naka pura-pura to Isaraeli sambali pai komi pueku!”
13Mesono i Daudi, natoʼo, “Madago!” Petumbuka i Abineri patuuku seʼi, “Kupokono da mampareʼe pojanji pai siko, paikanya reʼe perapiku anu da nubangani, inceʼemo: ane maʼimo siko momberata pai yaku sangaya-ngaya da nupayunu i Mikali ana i Saulu.” 14#1 Sem. 18:27 Roo setu napokau i Daudi, tau njoʼu mampomberataka Isibose, mangkeni patuu ewaseʼi, “Da nupapewalilika yaku i Mikali rongoku ri yaku, maka siʼa roo kuoli, kubayarika saatu to Pelisiti.” 15Inceʼe painaka napokau Isibose tau njoʼu mantima i Mikali ungka ri langkainya anu mampotoʼo i Palitieli ana i Laisi. 16Palai i Mikali nalulu mpaliu i mPaliteli seʼi motumangi, karata ntau seʼe ri kota Bahuri, natoʼo i Abineri ri Palitieli, “Pewailimo siko neʼemo nululu!” Inceʼe painaka mewalilimo i Palitieli bareʼemo melulu.
17Roo setu mogombo i Abineri pai waʼa ntau tuʼa nto Isaraeli, natoʼo i Abineri, “Masaemo ndipampodaraya i Daudi da mewali mokolemi. 18Mewali kuepe-epe seʼi tempo anu madago. Neʼe ndikalingani pojanji i mPue ri Daudi, ka-Siranya da mampake i Daudi mancorepaka tana nto Isaraeli ungka ri pale nto Pelisiti pai ungka ri pale waʼa iwalinya.” 19I Abineri mogombo woʼu pai waʼa ntau tuʼa nto Benyami, roo setu nepa njoʼu siʼa ri Heberoni momberata pai i Daudi mampetumbu kabotu gombo nto Benyami pai waʼa nto Isaraeli setu.
20Karata i Abineri pai taunya ruampuyu mampoberataka i Daudi ri Heberoni, napareʼe i Daudi posusa mampokawongko karata ntau seʼe. 21Roo setu metompa i Abineri seʼi natoʼo, “Ndiwaimo yaku da malai da mampalele samalele Isaraeli da naka mompasambali pai komi pueku. Tau seʼe da mantarima komi pueku ewa mokole, pai ane ewanceʼe komi pueku da mamparenta samalele ntana seʼi silulu pai tinako ndayami pueku.” Nawaimo i Daudi i Abineri malai pai natoʼoka bareʼe dareʼe tau anu majaʼati siko.
I Abineri ndapepate
3:22-30
22Butu tepalai pinca i Abineri, ratamo i Yoabi pai waʼa ntau i Daudi anu nepa mewalili ungka ri pangaʼe, sangkani pai aga-aga anu sondo napamuru ntau seʼe. 23Napetumbumo ntau ri Yoabi, kamaʼimo i Abineri momberata pai i Mokole Daudi, pai siʼa ndapapewalili madago-dago. 24Madonge pompetumbu ntau setu, njoʼumo i Yoabi momberata pai mokole, natoʼo, “Ewambeʼi powiami seʼi Mokole? I Abineri maʼimo momberata pai komi Mokole. Wenu painaka siʼa ndipapalai madago-dago? 25Sangaya-ngaya ndiincani Mokole, kamaʼi i Abineri setu podo maʼi mambambasi komi Mokole, da napaincani ewambeʼi katedikanakata pai songkami Mokole.”
26Ungka lairia napalaika i Yoabi i Daudi, nepa napokau tau bara tesangkuja malulu waka i Abineri. Palai waʼa ntau anu napokau i Yoabi setu, narata ntau seʼe i Abineri mosu ri tibubu Sira, napoyunu muni ntau seʼe i Abineri. Powia i Yoabi setu bareʼe naincani i Daudi. 27Jabutu rata i Abineri i Heberoni, nasale i Yoabi siʼa njoʼu ri sambalikunya mosu ri baa-baa ngkota, mokira-kira i Yoabi da mampau sangaya anu rahasia pai Abineri. Tongkarasaka najalo i Yoabi i Aniberi ri komponya liu-liu mate. Ewanceʼe powia i Yoabi mampepate i Abineri mampesawaka kapate ntuaʼinya i Asaeli anu napepate i Abineri. 28Butu nadonge i Daudi pewalinya ewanceʼe, mompau siʼa, natoʼo, “Ndaincani i mPue, yaku pai waʼa mpaliliku bareʼe tesua ri pampepate i Abineri setu. 29Tuarapa i Yoabi sangkani pai waʼa ntinanya da ndahuku i ua pampepatenya i Abineri setu. Mbolimo ri raya ncombori i Yoabi pai mulinya popalapi-lapi bareʼe bali-bali da reʼe tau anu najunju ntangga anu maʼai kojo, bara tuama anu malente koronya bara anu mate ri tongo mpombetoto, pai anu da mapari katuwunya ua kapareʼenya gana pangkoninya.”
30Ewanceʼe powia i Yoabi pai tuaʼinya i Abisai, mampesawaki i Abineri, maka i Abineri mampepate i Asaeli tuaʼi ntau seʼe ri tempo mpombetoto ri Gibeo.
Pampotaumate i Abineri
3:31-39
31Ungka lairia nasongka i Daudi i Yoabi pai waʼa ntaunya da naka nasiati bajunya, pai da mampake rengko ngkasusa ndaya pai da mangkukuousi kapate i Abineri. Pai ri tempo mpangkeni watangkoro i Abineri da ndadayo, i Mokole Daudi ngkalionya anu melinja mantondari tau anu mampoaju yumu. 32Ewanceʼe ndapadayo watangkoro i Abineri ri Heberoni, maʼai potumangi i Mokole pai waʼa mpalilinya ri suara dayo i Abineri. 33Roo setu moenta-enta i Daudi ri potumanginya, natoʼo,
“Ara da sintinaja i Abineri da mate ewa tau tengo?
34Seʼi bareʼe ndapungu palenya, pai bareʼe woʼu ndarante witinya.
Siʼa mate najalo mpale ntau majaʼa pai bereʼe puru ndayanya.”
Inceʼe painaka pura-pura palilinya kakomaʼai-ai napantangisi i Abineri.
35Sandeme setu mombesawani tau mangkanarasi i Daudi da naka mangkoni mau podo sakodi. Paikanya montandokoro i Daudi, natoʼo, “Mbolimo i Pue Ala mampepate yaku, ane rapanya mangkoni yaku ri sandeme seʼi ri kabareʼepanya soyo reme!” 36Menaa raya waʼa mpalilinya madonge pompau i Daudi setu. Pai lawi mewalimo kabiasa ntau seʼe, mampokawongko nunjaa anu napowia i Mokole Daudi. 37Powia i Daudi sandeme setu narata ndayamo waʼa mpalilinya pai pura-pura to Isaraeli, kabareʼenya napokono i Daudi pampepate i Abineri setu. 38Mompau i Daudi ri waʼa ntau anu mayunuki siʼa, natoʼo, “Ara bareʼe ndiincani sandeme seʼi kamate sambaʼa tadulako bangke nto Isaraeli? 39Mau yaku seʼi sambaʼa mokole anu ndapilisi i mPue Ala, paikanya kuepe malente. Maka waʼa ana i Seruya setu masii gaga. Bareʼe kukoto mancongka tau seʼe. Tuarapa i Pue da mangahuku waʼa ntau majaʼa setu, silulu pai waʼa mpowia ntau seʼe!”
