ಅಪೊ.ಕ್ರಿ 5
5
ಅನನೀಯೆ ಬೊಕ್ಕ ಸಪ್ಫ್ಯೆರ
1ಅನನೀಯೆ ಪನ್ಪಿನಾಯೆ ಒರಿ ನರಮಾನಿ ತನ ಬೊಡೆದಿ ಸಪ್ಫೈರನ ಒಪ್ಪಿಗೆಡ್ದ್ ಒಂಜಿ ಜಾಗ್‌ನ್ ಮಾರಿಯೆ. 2ಆಂಡ ಮಾರ್ದ್ ಬತ್ತಿನ ಕಾಸ್‌ಡ್ದ್ ಒಂತೆ ಪಾಲ್‌ನ್ ಮಾತ್ರ ಅಪೊಸ್ತಲೆರೆನ ಕಾರ ಮುದೆಲ್‌ಡ್ ದೀಯೆ. ಒಂತೆ ಕಾಸ್‌ನ್ ಗುಟ್ಟುಡು ದೀಯೆ. ಆಯನ ಬೊಡೆದಿಗ್ಲಾ ಗೊತ್ತಿತ್ತ್ಂಡ್. 3ಅಪಗ ಪೇತ್ರೆ, “ಅನನೀಯಾ, ಈ ಆ ಕಂಡದ ಕ್ರಯೊಡ್ದು ಒಂಜಿ ಪಾಲ್ ಗುಟ್ಟುಡು ದೀದ್ ಪರಿಶುದ್ಧಾತ್ಮನ್ ಮೋಸ ಮಲ್ಪುಲೆಕ್ಕ ಸೈತಾನನ್ ನಿನ ಉಡಲ್‌ಡ್ ದಾಯೆಗ್ ದಿಂಜಾದ. 4ಆ ಆಸ್ತಿ ಮಾರುನೆಡ್ದ್ ದುಂಬು ನಿನ್ನವು ಆದಿತ್ತ್ಂಡ್‌ತ್ತಾ, ಮಾರ್ದ್ ಬತ್ತಿನ ಕಾಸ್‌ಲಾ ನಿನಡನೇ ಇತ್ತ್ಂಡತ್ತಾ? ಈ ಬೊಡ್ಚಾಂದಿನ ಕಾರ್ಯೊನು ನಿನ ಉಡಲ್‌ಡ್ ದಾಯೆಗ್ ಮಲ್ತೊಂಡ? ಈ ಸುಳ್ಳು ಪಂಡಿನಿ ನರಮಾನಿಲೆಗ್ ಅತ್ತ್ ದೇವೆರೆಗ್.” ಅಂದ್‌ದ್ ಪಂಡೆ. 5ಈ ಪಾತೆರೊನು ಅನನೀಯೆ ಕೇಂಡಿನಪಗನೇ ಬೂರ್ದು ಪ್ರಾಣ ಬುಡಿಯೆ. ಕೇಂಡಿನಾಕುಲೆಗ್ ಮಾತೆರೆಗ್ಲಾ ಬಾರಿ ಪೋಡಿಗೆ ಪತ್ತ್ಂಡ್. 6ಅಪಗ ಜವನ್ಯೆರ್ ಲಕ್ಕ್‌ದ್ ಆಯನ್ ಕುಂಟುಡು ಸುತ್ತುದು ಪಿದಯಿ ಪೋದು ಕೌಂತೆರ್.
7ಸುಮಾರ್ ಮೂಜಿ ಗಂಟೆ ಆಯಿ ಬೊಕ್ಕ ಆಯನ ಬೊಡೆದಿಗ್ ನಡತಿನ ಸಂಗತಿ ತೆರಿಯಂದೆ ಉಲಯಿ ಬತ್ತಲ್. 8ಪೇತ್ರೆ ಆಲೆನ್ ತೂದು, “ನಿಕುಲು ಆ ಜಾಗ್‌ನ್ ಮಾರ್ದಿನಿ ಈತೇ ಕಾಸ್‌ಗಾ,” ಅಂದ್‌ದ್ ಕೇನ್ನಗ ಆಲ್, “ಅಂದ್, ಈತೆಕ್ಕೇ,” ಅಂದ್‌ದ್ ಪಂಡಲ್.
9ಅಪಗ ಪೇತ್ರೆ ಆಲೆಗ್, ನಿಕುಲು ಇರ್ವೆರ್‌ಲಾ ಕರ್ತವನ ಆತ್ಮೊನು ಪರೀಕ್ಷೆ ಮಲ್ಪೆರೆ ದಾಯೆಗ್ ಮನಸ್ ಮಲ್ತೊಂಡರ್? ತೂಲ, ನಿನ ಕಂಡನಿನ್ ಕೌಂತುದಿನಾಕುಲು ಬತ್ತ್‌ದ್ ಬಾಕಿಲ್‌ಡ್ ಕಾರ್ ದೀತೆರ್, ನಿನನ್ಲಾ ತುಂಬೊಂದು ಪೋಪೆರ್ ಅಂದ್‌ದ್ ಪಂಡೆ. 10ಅಪಗನೆ ಆಲ್ ಆಯನ ಕಾರ್‌ದ ಕೈತಲ್‌ ಬೂರ್ದು ಪ್ರಾಣ ಬುಡಿಯಲ್. ಆ ಜವನ್ಯೆರ್ ಉಲಯಿ ಬತ್ತ್‌ದ್ ಆಲ್ ಸೈತ್‌ದುಪ್ಪುನೆನ್ ತೂದು, ಆಲೆನ್ ತುಂಬೊಂದು ಪೋದು ಕಂಡನಿನ ಬರಿಟ್ಟೇ ಕೌಂತೆರ್. 11ಇಡೀ ಸಭೆಕ್ಲಾ ಉಂದೆನ್ ಕೇಂಡಿನಾಕುಲೆಗ್ ಮಾತೆರೆಗ್ಲಾ ಬಾರೀ ಪೋಡಿಗೆ ಪುಟ್ಟುಂಡು.
ಗುರ್ತೊಲು ಬೊಕ್ಕ ಕಾರ್ನಿಕೊಲು
12ಉಂದತ್ತಂದೆ ಅಪೊಸ್ತಲೆರೆ ಕೈಡ್ದ್ ಮಸ್ತ್ ಗುರ್ತೊಲು ಕಾರ್ನಿಕೊಲು ಜನೊಕುಲೆ ಮದ್ಯೊಡು ಆವೊಂದಿತ್ತ್ಂಡ್ ಬೊಕ್ಕ ಮಾತೆರ್ಲಾ ಒಗ್ಗಟ್ಟಾದ್ ಸೊಲೊಮೋನನ ಮಂಟಪೊಡು ಕೂಡೊಂದಿತ್ತೆರ್. 13ಬಾಕಿದ ಜನೊಕುಲೆಡ್ ಒರಿಯಗ್ಲಾ ಅಕ್ಲೆ ಒಟ್ಟುಗು ಕೂಡೊನಿಯೆರೆ ಧೈರ್ಯ ಇತ್ತ್‌ಜಿ. ಆಂಡಲಾ ಜನೊಕುಲು ಅಕ್ಲೆನ್ ಬಾರೀ ಪುಗರೊಂದಿತ್ತೆರ್. 14ಆಂಡ ನನಲಾ ಏತೋ ಜನ ಅಂಜೊವುಲುಲಾ ಪೊಂಜೊವುಲುಲಾ ಕರ್ತವಡ್ ನಂಬಿಕೆ ದೀಪಿನಾಕುಲಾದ್ ಸಭೆಕ್ ಸೇರೊಂದಿತ್ತೆರ್. 15ಇಂಚಾದುಪ್ಪುನಗ ಜನೊಕುಲು ಸೀಕ್‌ದಾಕುಲೆನ್ ಜೋಳಿಗೆಡ್ಲಾ ಪಜೆಟ್ಲಾ ದೀದ್ ಪೇತ್ರೆ ಮಾರ್ಗೊಡು ಪೋವೊಂದುಪ್ಪುನಗ ಆಯನ ನಿರೆಲಾಂಡಲಾ ಅಕ್ಲೆನ ಮಿತ್ತ್ ಬೂರಡ್ ಅಂದ್‌ದ್ ಅಕ್ಲೆನ್ ಮಾರ್ಗದ ಬರಿಕ್ಕ್ ಲೆತ್ತೊಂದು ಬರೊಂದಿತ್ತೆರ್. 16ಯೆರೂಸಲೇಮುದ ಸುತ್ತ ಉಪ್ಪುನ ಊರುದ ಜನೊಕುಲು ಸೀಕ್‌ದಾಕುಲೆನ್ಲಾ ದೆವ್ವೊಲೆ ಉಪದ್ರ ಇತ್ತಿನಾಕುಲೆನ್ಲಾ ದೆರ್ತೊಂದು ಗುಂಪುಗುಂಪಾದ್ ಬರೊಂದಿತ್ತೆರ್, ಮಾತೆರ್ಲಾ ಗುಣ ಆವೊಂದಿತ್ತೆರ್.
ಅಪೊಸ್ತಲೆರ್ ಸೆರೆಮನೆಟ್
17ಆಂಡ ಪ್ರಧಾನಯಾಜಕೆಲಾ ಆಯ ಒಟ್ಟುಗು ಇತ್ತಿ ಸದ್ದುಕಾಯೆರ್ ಮತಾಭಿಮಾನಿಲು ಮಾತೆರ್ಲಾ ಲಕ್ಕ್‌ದ್ ನಂಜಿಡ್ ದಿಂಜಿದ್ 18ಅಪೊಸ್ತಲೆರೆನ್ ಪತ್ತ್‌ದ್ ಊರುದ ಸೆರೆಮನೆಟ್ ಪಾಡಿಯೆರ್. 19-20ಆಂಡ ಕರ್ತವನ ದೂತೆ ರಾತ್ರೆಡ್ ಸೆರೆಮನೆತ ಬಾಕಿಲ್‌ನ್ ಜತ್ತ್‌ದ್ ಅಕ್ಲೆನ್ ಪಿದಯಿ ಕನತ್‌ದ್, “ನಿಕುಲು ದೇವಾಲಯೊಡು ಉಂತುದು ಈ ಪೊಸ ಜೀವನದ ಮಾತ ವಿಷಯೊನು ಜನೊಕುಲೆಗ್ ಪೋದು ಪನ್ಲೆ.” ಅಂದ್‌ದ್ ಪಂಡೆ. 21ಅಕುಲು ಈ ಅಪ್ಪಣೆನ್ ಕೇಂಡ್ದ್ ಬೊಲ್ಪು ಆವೊಡ್ಡನೇ ದೇವಾಲಯೊಗು ಪೋದು ಬೋಧನೆ ಕೊರಿಯೆರ್. ಇಂಚಿಡ್ದ್ ಪ್ರಧಾನಯಾಜಕೆಲಾ ಆಯನ ಒಟ್ಟುಗು ಇತ್ತಿನಾಕುಲುಲಾ ಬತ್ತ್‌ದ್ ಹಿರಿಸಭೆಟುಪ್ಪುನ ಮಾತ ಇಸ್ರಾಯೇಲ್ಯೆರೆ ಮಖ್ಯಸ್ಥೆರೆನ್‌ ಕೂಡಾದ್ ಅಪೊಸ್ತಲೆರೆನ್ ಲೆತ್ತೊಂದು ಬರಿಯೆರೆ ಸೆರೆಮನೆಗ್ ಕಡಪುಡಿಯೆರ್. 22ಈ ಅಧಿಪತಿಲು ಸೆರೆಮನೆಗ್ ಬತ್ತ್‌ದ್ ತೂನಗ ಅಪೊಸ್ತಲೆರ್ ಇಜ್ಜಾಂದಿನೆನ್ ತೂದು, ಪಿರ ಬತ್ತ್‌ದ್ ಹಿರಿಸಭೆತ್ತ ನಾಯಕೆರೆಗ್ ತೆರಿಪಾಯೆರ್. 23ಸೆರೆಮನೆತ ಬಾಕಿಲ್ ಬದ್ರೊಡು ಮುಚ್ಚಿದಿತ್ತ್‌ಂಡ್, ಬಾಕಿಲ್‌ಗ್ ಬೀಗ ಪಾಡ್ದ್‌ಲಾ ಇತ್ತ್ಂಡ್. ಜೈಲ್ ಕಾಪುನಾಕುಲು ಬಾಕಿಲ್‌ದ ಕೈತಲೇ ಉಂತುದಿನೆನ್ಲಾ ತೂಯ. ಆಂಡ ಬಾಕಿಲ್ ಜತ್ತ್‌ದ್ ತೂನಗ ಉಲಯಿ ಒರಿಲಾ ತೋಜಿಜೆರ್ ಅಂದ್‌ದ್ ಪಂಡೆರ್. 24ದೇವಾಲಯದ ಅಧಿಪತಿಲಾ ಪ್ರಧಾನಯಾಜಕೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ಗಲಿಬಿಲಿ ಆದ್ ಉಂದೆಡ್ದ್ ನನ ದಾನೆ ಆಪುಂಡಾ ಅಂದ್‌ದ್ ಪೋಡಿಯೆರ್. 25ಅಪಗ ಒರಿ ಬತ್ತ್‌ದ್, “ತೂಲೆ, ನಿಕುಲು ಸೆರೆಮನೆಟ್ ದೀತಿನ ಆ ಜನೊಕುಲು ದೇವಾಲಯೊಡು ಉಂತುದು ಜನೊಕುಲೆಗ್ ಬೋಧನೆ ಮಲ್ತೊಂದುಲ್ಲೆರ್,” ಅಂದ್‌ದ್ ಅಕ್ಲೆಗ್ ತೆರಿಪಾಯೆ. 26ಅಪಗ ಮುಖ್ಯಸ್ಥೆ ಅಧಿಪತಿ ಒಟ್ಟುಗು ಪೋದು ಅಪೊಸ್ತಲೆರೆನ್ ಲೆತ್ತೊಂದು ಬತ್ತೆ. ಆಂಡ ತನ್ಕುಲೆಗ್ ಜನೊಕುಲು ಕಲ್ಲ್ ದಕ್ಕೆರ್ ಅಂದ್‌ದ್ ಪೋಡಿದ್ ಬಲಾತ್ಕಾರ ಮಲ್ತ್‌ಜೆರ್.
27ಅಕ್ಲೆನ್ ಲೆತ್ತೊಂದು ಬತ್ತ್‌ದ್ ಹಿರಿಸಭೆತ ದುಂಬು ಉಂತಾಯೆರ್. ಪ್ರಧಾನಯಾಜಕೆ ಅಪೊಸ್ತಲೆರೆಗ್ ಪನ್ಪೆ 28ನಿಕುಲು ಈ ಪುದರ್‌ಡ್ ಬೋಧನೆ ಕೊರಿಯೆರೆ ಬಲ್ಲಿ ಅಂದ್‌ದ್ ಎಂಕುಲು ನಿಕ್ಲೆಗ್ ಅಪ್ಪಣೆ ಕೊರ್ತ ಅತ್ತಾ ಆಂಡಲಾ ನಿಕುಲು ಯೆರೂಸಲೇಮುನು ನಿಕ್ಲೆನ ಬೋಧನೆಡ್ದ್ ದಿಂಜಾಯರ್, ಬೊಕ್ಕ ಆ ನರಮಾನಿನ ನೆತ್ತೆರ್‌‌ಗ್ ಎಂಕುಲೇ ಜವಾಬ್ದಾರೆರ್ ಅಂದ್‌ದ್ ನಿಕುಲು ಪನೊಂದುಲ್ಲರ್ ಅಂದ್‌ದ್ ಪಂಡಿನೆಕ್ಕ್, 29ಪೇತ್ರೆಲಾ ಬಾಕಿದ ಅಪೊಸ್ತಲೆರ್‌ಲಾ, “ಎಂಕುಲು ನರಮಾನಿಲೆಡ್ದ್ ಹೆಚ್ಚ್ ದೇವೆರೆಗ್ ಒಳಗಾದುಪ್ಪೊಡು. 30ನಿಕುಲು ಮರತ ಕಂಬೊಗು ನೇಲಾದ್ ಕೆರ್ತಿನ ಯೇಸುನು ಎಂಕ್ಲೆ ಪಿತೃಲೆನ ದೇವೆರ್ ಲಕ್ಕಾಯೆ. 31ಇಸ್ರಾಯೇಲ್ಯೆರೆಗ್ ಪಶ್ಚಾತಾಪೊನ್ಲಾ ಪಾಪ ಪರಿಹಾರೊನ್ಲಾ ಕೊರಿಯೆರೆ ಬೋಡಾದ್ ದೇವೆರೆ ತನ್ನ ಬಲತ್ತ ಕೈಡ್ದ್ ಮಿತ್ತ್‌ದ ಸ್ಥಾನೊಗು ಏರಾದ್ ಆಯನ್ ನಾಯಕೆಲಾ, ರಕ್ಷಕೆಲಾ ಮಲ್ತೆ. 32ಈ ಕಾರ್ಯೊಲೆಗ್ ಎಂಕುಲು ಸಾಕ್ಷಿಲು; ದೇವೆರ್ ತನ್ಕ್ ಒಳಗಾದುಪ್ಪುನಾಕುಲೆಗ್ ಕೊರಿ ಪರಿಶುದ್ಧಾತ್ಮೆಲಾ ಸಾಕ್ಷಿ ಆದುಲ್ಲೆ,” ಅಂದ್‌ದ್ ಪಂಡೆರ್.
33ಯೆಹೂದ್ಯ ನಾಯಕೆರ್ ಉಂದೆನ್ ಕೇಂಡ್ದ್ ಭಯಂಕರ ಕೋಪೊಡು ಅಕ್ಲೆನ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್; 34ಆಂಡ ಮಾತ ಜನೊಕುಲೆಡ್ ಮಾನ ಪಡೆತಿನ ನ್ಯಾಯಶಾಸ್ತ್ರಿಯಾಯಿನ ಗಮಲಿಯೇಲ್ ಪನ್ಪಿನ ಒರಿ ಪರಿಸಾಯೆ ಹಿರಿಸಭೆಟ್ಟ್ ಲಕ್ಕ್‌ದ್ ಈ ನರಮಾನಿಲೆನ್ ಒಂತೆ ಪೊರ್ತು ಪಿದಯಿ ಕಡಪುಡೊಡು ಅಂದ್‌ದ್ ಅಪ್ಪಣೆ ಕೊರಿಯೆ. 35ಐಡ್ದ್ ಬೊಕ್ಕ ಹಿರಿಸಭೆತಾಕುಲೆಗ್ ಎನ ಇಸ್ರಾಯೇಲ್ ಸಹೋದ್ರೆರೇ, ನಿಕುಲು ಈ ನರಮಾನಿಲೆಗ್ ಎಂಚಿನ ಮಲ್ಪೆರೆ ತೂಪರ ಆ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. 36ಉಂದೆಡ್ದ್ ದುಂಬು ಥೈದೆ ಪನ್ಪಿನಾಯೆ ಒರಿ ಇತ್ತೆ. ತಾನ್ ಬಾರೀ ಮಲ್ಲ ಜನ ಅಂದ್‌ದ್ ಲಕ್ಕ್‌ದ್ ಆಯನ ಪಕ್ಷೊಗು ನಾಲ್ನೂದು ಜನ ಸೇರೊಂಡೆರ್, ಆಯನ್ ಕೆರಿಯೆರ್, ಬೊಕ್ಕ ಆಯ ಪಕ್ಷದಾಕುಲು ಪಂಡ್ದ್ ಇತ್ತಿನಾಕುಲು ಮಾತೆರ್ಲಾ ದಿಕ್ಕ್ ಪಾಲ್ ಆಯೆರ್. 37ಆಯಡ್ದ್ ಬೊಕ್ಕ ಖಾನೇಷ್‌ಮಾರಿದ ಕಾಲೊಡು ಗಲಿಲಾಯದ ಯೂದೆ ಲಕ್ಕ್‌ದ್ ಉಂತುದು ಜನೊಕುಲೆನ್ ತನ ಒಟ್ಟುಗು ಸೇರೊನಿಯೆರೆ ಪಂಡೆ. ಆಯೆ ಹಾಳಾದ್ ಪೋಯೆ; ಬೊಕ್ಕ ಆಯ ಪಕ್ಷದಾಕುಲು ಪಂಡ್ದ್ ಇತ್ತಿನಾಕುಲು ಮಾತೆರ್ಲಾ ದಿಕ್ಕ್ ಪಾಲ್ ಆಯೆರ್. 38ಇಂಚಾದುಪ್ಪುನಗ ನಿಕುಲು ಆ ಜನೊಕುಲೆನ ಸುದ್ಧಿಗ್ ಪೋವೊಡ್ಚಿ. ಅಕ್ಲೆನ್ ಬುಡ್ಲೆ; ದಾಯೆಗಂದ್ಂಡ ಈ ಯೋಚನೆ ದೇವೆರೆನ ಅತ್ತಂದೆ ಜನೊಕುಲೆಡ್ದೆ ಆದಿತ್ತ್ಂಡ ಅವು ಹಾಳಾದ್ ಪೋವು; 39ಅವು ದೇವೆರೆಡ್ದ್ ಆದಿತ್ತ್ಂಡ ಅವೆನ್ ಹಾಳ್ ಮಲ್ಪೆರೆ ನಿಕ್ಲೆಡ್ದ್ ಆವಂದ್. ನಿಕುಲು ಒಂಜಿ ವೇಳೆ ದೇವೆರೆಡ ನ್ಯಾಯ ಮಲ್ಪುನಾಕುಲಾದ್ ತೋಜಿದ್ ಬರುವರ್ ಅಂದ್‌ದ್ ಪಂಡೆ.
40ಅಕುಲು ಆಯನ ಪಾತೆರೊಗು ಒಪ್ಪಿದ್ ಅಪೊಸ್ತಲೆರೆನ್ ಲೆಪ್ಡಾದ್ ಹಾಕ್‌ದ್ ಯೇಸುನ ಪುದರ್‌ಡ್ ಪಾತೆರಿಯೆರೆ ಬಲ್ಲಿ ಅಂದ್‌ದ್ ಅಪ್ಪಣೆ ಕೊರ್ದು ಅಕ್ಲೆನ್ ಬುಡ್ದು ಬುಡಿಯೆರ್. 41ಅಪೊಸ್ತಲೆರ್ ಯೇಸುನ ಪುದರ್‌ಡ್ದ್ ಅವಮಾನ ಪಡೆಯೆರೆ ಯೋಗ್ಯದಾಕುಲು ಅಂದ್‌ದ್ ಸಂತೋಷ ಮಲ್ತ್‌ದ್ ಹಿರಿಸಭೆಡ್ದ್ ಪಿದಾಡ್ದ್ ಪೋಯೆರ್. 42ಅಕುಲು ಪ್ರತಿದಿನ ದೇವಾಲಯೊಡ್ಲಾ ಇಲ್ಲ್ ಇಲ್ಲಡ್ಲಾ ಬೋಧನೆ ಮಲ್ತೊಂದು ಕ್ರಿಸ್ತೆ ಆದುಪ್ಪು ಯೇಸುನ ಸುವಾರ್ತೆನ್ ಸಾರೊಂದಿತ್ತೆರ್.
ప్రస్తుతం ఎంపిక చేయబడింది:
ಅಪೊ.ಕ್ರಿ 5: ತುಳು
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
New Life Literature
