ಅಪೊ.ಕ್ರಿ 22
22
1ಎಂಕುಲೆ ಸಹೋದ್ರೆರೇ ಬೊಕ್ಕ ಪಿತೃಲೆ, “ಇತ್ತೆ ಯಾನ್ ನಿಕ್ಲೆಗ್ ಪನ್ಪಿ ಪ್ರತಿವಾದೊನು ಕೇನ್ಲೆ.” 2ಆಯೆ ಇಬ್ರಿಯ ಭಾಷೆಡ್ ಪಾತೆರುನೆನ್ ಕೇನ್ನಗ ಅಕುಲು ಬೊಕ್ಕಲಾತ್ ಶಾಂತ ಆಯೆರ್.
3“ಯಾನ್ ಯೆಹೂದ್ಯೆ ಕಿಲಿಕ್ಯದ ತಾರ್ಸುಡು ಪುಟ್ಟುದಿನಾಯೆ, ಆಂಡ ಈ ಊರುಡೇ ಎಲ್ಯಡ್ದ್ ಮಲ್ಲ ಆತಿನಾಯೆ, ಗಮಾಲಿಯೇಲನ ಪಾದದಲ್ಪ ಎಂಕ್ಲೆ ಪಿತೃಲೆನ ನ್ಯಾಯಕಟ್ಟ್‌ದ ಪೂರ ಗೇನೊನು ಸೂಕ್ಷ್ಮಾದ್ ಪಡೆವೊಂದಿನಾಯೆ ಯಾನ್ ಆದುಲ್ಲೆ. ನಿಕುಲು ಇನಿ ದೇವೆರೆ ವಿಚಾರೊಡು ಅಭಿಮಾನಿಲು ಆದುಪ್ಪುನಂಚೆನೇ ಯಾನ್ ಅಭಿಮಾನಿ ಆದಿತ್ತೆ. 4ಈ ಮಾರ್ಗೊನು ಕೈಕೊನೊನಾಕುಲೆನ್ ಯಾನ್ ಭಂಗ ಕೊರೊಂದಿತ್ತೆ. ಅಂಜೊವುಲೆಗ್ಲಾ ಪೊಂಜೊವುಲೆಗ್ಲಾ ಕೋಳ ಪಾಡ್ಪಾದ್ ಅಕ್ಲೆನ್ ಸೆರೆಮನೆಗ್ ಪಾಡೊಂದಿತ್ತೆ. ಅಕ್ಲೆನ್ ಕೆರಿಯೆರೆಗ್ಲಾ ಪಿರ ಜಾರಂದೆ ಭಂಗ ಕೊರೊಂದಿತ್ತೆ. 5ಉಂದೆಕ್ಕ್ ಪ್ರಧಾನಯಾಜಕೆರ್‌ಲಾ ಹಿರಿಸಭೆತಾಕುಲುಲಾ ಸಾಕ್ಷಿ ಆದುಲ್ಲೆರ್. ಅಂಚಾಯಿನೆಡ್ದ್ ಯಾನ್ ದಮಸ್ಕೊಡುಪ್ಪುನ ಸಹೋದ್ರೆರೆಗ್ ಕಾಕಜಿನ್ ದೆತ್ತೊಂದು ಅಡೆಗ್ ಪೋತಿನಾಕಲೆನ್ ಕೋಳ ಪಾಡ್ದ್ ಶಿಕ್ಷೆ ಕೊರಿಯೆರೆ ಅಂದ್‌ದ್ ಯೆರೂಸಲೇಮುಗು ಕನವೊಡು ಅಂದ್‌ದ್ ಪಿದಾಡಿಯೆ.
ಪೌಲುನ ಪರಿವರ್ತನೆ ತೆರಿಪಾವುನವು
(ಅಪೊ.ಕ್ರಿ 9:1-19; 26:12-18)
6“ಯಾನ್ ಪ್ರಯಾಣ ಮಲ್ತೊಂದು ದಮಸ್ಕದ ಕೈತಲ್‌ ಬನ್ನಗ ಸುಮಾರ್ ಮಧ್ಯಾಹ್ನದ ಪೊರ್ತುಡು ಪಕ್ಕನೆ ಬಾನೊಡ್ದು ಒಂಜಿ ಮಲ್ಲ ಬೊಲ್ಪು ಎನ ಸುತ್ತಲಾ ಮಿಂಚಿಂಡ್. 7ಯಾನ್ ನೆಲಕ್ ಬೂರಿಯೆ. ಅಪಗ, ‘ಸೌಲಾ, ಸೌಲಾ, ಎಂಕ್ ದಾಯೆಗ್ ಭಂಗ ಕೊರ್ಪ?’ ಅಂದ್‌ದ್ ಎನಡ ಪನ್ಪಿ ಪಾತೆರೊನು ಕೇಂಡೆ. 8ಐಕ್ ಯಾನ್, ‘ಕರ್ತವಾ, ಈ ಏರ್?’ ಅಂದ್‌ದ್ ಕೇನ್ನಗ ಆಯೆ ಎನಡ, ‘ಈ ಭಂಗ ಕೊರ್ಪಿನ ನಜರೇತ್‌ದ ಯೇಸು ಯಾನೇ,’ ಪಂಡ್ದ್ ಪಂಡೆ 9ಎನಡೊಪ್ಪ ಇತ್ತಿನಾಕುಲು ಬೊಲ್ಪುನು ತೂಯೆರ್ ಅತ್ತಂದೆ ಎನಡೊಪ್ಪ ಪಾತೆರಿನಾಯನ ಸ್ವರೊನು ಕೇಂಡಿಜೆರ್. 10ಅಪಗ ಯಾನ್, ‘ಕರ್ತವಾ, ಯಾನ್ ದಾದ ಮಲ್ಪೊಡು?’ ಅಂದ್‌ದ್ ಕೇನ್ನಗ ಕರ್ತವೆ, ‘ಎಂಕ್ ಈ ಲಕ್ಕ್‌ದ್ ದಮಸ್ಕದ ಉಲಯಿ ಪೋಲ, ಈ ಮಲ್ಪೊಡಾಯಿನ ಬೇಲೆ ಅಲ್ಪ ನಿಕ್ಕ್ ತೆರಿದ್ ಬರು,’ ಅಂದ್‌ದ್ ಪಂಡೆ. 11ಆ ಬೊಲ್ಪುದ ಪ್ರಭಾವೊಡ್ದು ಎಂಕ್ ಕಣ್ಣ್ ತೋಜಂದಿನೆಡ್ದ್ ಎನಡೊಪ್ಪ ಇತ್ತಿನಾಕುಲು ಎನನ್ ಕೈ ಪತ್ತ್‌ದ್ ದಮಸ್ಕದ ಉಲಯಿ ಲೆತ್ತೊಂದು ಪೋಯೆರ್.
12“ಅಲ್ಪ ಒರಿ ನ್ಯಾಯಕಟ್ಟ್‌ಲೆಗ್ ಸರಿಯಾದ್ ನಡಪುನ ಸದ್ಭಕ್ತೆ ಊರುದ ಯೆಹೂದ್ಯೆರೆಡ ಎಡ್ಡೆಂತಿನಾಯೆ ಅಂದ್‌ದ್ ಪುದರ್ ಪಡೆತಿನಾಯೆ ಅನನೀಯೆ ಪನ್ಪಿನಾಯೆ 13ಎನ ಕೈತಲ್‌ ಬತ್ತ್‌ದ್ ಉಂತುದು, ‘ಸಹೋದರೆ ಆದುಪ್ಪು ಸೌಲು ನಿಕ್ಕ್ ಕಣ್ಣ್ ತೋಜಡ್,’ ಅಂದ್‌ದ್ ಪಂಡೆ. ಪಂಡಿನಪಗನೆ ಎಂಕ್ ಕಣ್ಣ್ ತೋಜ್ಂಡ್. ಯಾನ್ ಆಯನ್ ತೂಯೆ. 14ಐಡ್ದ್ ಬೊಕ್ಕ ಆಯೆ ಪಂಡಿನಿ, ‘ನಮ ಪಿತೃಲೆ ದೇವೆರ್ ತನ ಚಿತ್ತೊನು ಈ ತೆರಿಯೊನೆಕ್ಕ್‌ಲಾ ಆ ನೀತಿವಂತನ್ ತೂಪಿನೆಕ್ಕ್‌ಲಾ ಆಯನ ಬಾಯಿಡ್ದ್ ಪಾತೆರೊನು ಕೇನುನೆಕ್ಕ್‌ಲಾ ನಿನನ್ ನೇಮಕ ಮಲ್ತ್‌ದೆ. 15ಈ ತೂತಿನ ಬೊಕ್ಕ ಕೇಂಡಿನ ಸಂಗತಿಲೆಗ್ಲಾ ಮಾತ ನರಮಾನಿಲೆ ಎದುರು ಸಾಕ್ಷಿಯಾದುಪ್ಪೊಡು. 16ಇತ್ತೆ ಈ ದಾಯೆ ತಡ ಮಲ್ಪುವ? ಲಕ್ಕ್‌ದ್ ಕರ್ತವ ಪುದರ್‌ನ್ ಅರಿಕೆ ಮಲ್ತ್‌ದ್ ನೀರ್‌ಡ್ ದೀಕ್ಷಾಸ್ನಾನ ಮಲ್ತೊಂದು ನಿನ ಪಾಪೊಲೆನ್ ದೆಕ್ಕೊನ್ಲಾ,’ ಅಂದ್‌ದ್ ಪಂಡೆ.
ಪಿದಯಿದ ಜನೊಕುಲೆಗ್ ಸುವಾರ್ತೆ ಸಾರಿಯುನ ಲೆಪ್ಪು
17“ಐಡ್ದ್ ಬೊಕ್ಕ ಯಾನ್ ಯೆರೂಸಲೇಮುಗು ಪಿರ ಬತ್ತ್‌ದ್ ದೇವಾಲಯದುಲಯಿ ಪ್ರಾರ್ಥನೆ ಮಲ್ತೊಂದುಪ್ಪುನಗ ದರ್ಶನೊಡು ಕರ್ತವನ್ ತೂಯೆ. 18ಆಯೆ ಈ, ‘ಆಯಿನಾತ್ ಬೇಗ ಯೆರೂಸಲೇಮುಡ್ದು ಪಿದಾಡ್ದ್ ಪೋಲ. ಎನ ವಿಚಾರೊಡು ಈ ಪನ್ಪಿನ ಸಾಕ್ಷಿನ್ ಅಕುಲು ತರಕೊನಯೆರ್,’ ಅಂದ್‌ದ್ ಪಂಡೆ. 19ಐಕ್ ಯಾನ್, ‘ಕರ್ತವಾ,’ ‘ಮಾತ ಸಭಾಮಂದಿರೊಲೆಡ್ ನಿನ ಮಿತ್ತ್ ನಂಬಿಕೆ ದೀತಿನಾಕುಲೆನ್ ಯಾನ್ ಸೆರೆಮನೆಕ್ ಪಾಡ್ದ್ ಹಾಕಾವೊಂದು ಇತ್ತೆ ಪನ್ಪಿನೆನ್ ಅಕುಲು ತೆರಿದೆರ್; 20ಬೊಕ್ಕ ನಿನ ಸಾಕ್ಷಿ ಆದುಪ್ಪುನ ಸ್ತೇಫನನ ನೆತ್ತೆರ್ ಗುತ್ತಿನಪಗ ಯಾನ್ಲಾ ಕೈತಲ್‌ ಉಂತುದು ಒಪ್ಪಿಯೊಂದು ಆಯನ್ ಕೆರ್ತಿನಾಕುಲೆನ ಕುಂಟುಲೆನ್ ಕಾತೊಂದಿತ್ತೆ,’ ಅಂದ್‌ದ್ ಅಕ್ಲೆಗ್ ಗೊತ್ತುಂಡು. 21ಆಂಡ ಈ, ‘ಪೋಲ,’ ‘ಯಾನ್ ನಿನನ್ ದೂರೊಗು ಪಿದಯಿದ ಜನೊಕುಲೆ ಕೈತಲ್‌ ಕಡಪುಡ್ವೆ,’” ಅಂದ್‌ದ್ ಪಂಡೆ.
22ಈ ಪಾತೆರದ ಮುಟ್ಟ ಅಕುಲು ಕೇನೊಂದಿತ್ತೆರ್; ಐಡ್ದ್ ಬೊಕ್ಕ ಆಯನ ಪಾತೆರೊಗು ಕೆಬಿ ಕೊರ್ಪಿನೆನ್ ಉಂತಾದ್, “ಆಯನ್ ಕೆರ್ಲೆ, ಆಯನ್ ಭೂಮಿಡ್ದ್ ದೆತ್ತ್ ಪಾಡ್ಲೆ, ಇಂಚಿ ನರಮಾನಿಗ್ ಜೀವದ ಅವಕಾಶೊನು ಕೊರಿಯೆರೆ ಬಲ್ಲಿ.” 23ಅಂಚ ಅಕುಲು ಕಲ್ಕೊಂದು ಅಕ್ಲೆನ ಕುಂಟುಲೆನ್ ದಕ್ಕೊಂದು ಧೂಳು ರಟ್ಟಾವೊಂದು ಇತ್ತೆರ್. 24ವಾ ಕಾರಣೊಡ್ದು ಆಯನ ವಿರೋಧಾದ್ ಬೊಬ್ಬೆ ಪಾಡ್ವೆರ್ ಅಂದ್‌ದ್ ಸಹಸ್ರಾಧಿಪತಿ ಗೊತ್ತು ಮಲ್ಪೆರೆ ಬೋಡಾದ್ ಆಯನ್ ಕೋಟೆದ ಉಲಯಿ ಕನತ್‌ದ್ ಚಾಟಿಡ್ ಪೆಟ್ಟ್ ಪಾಡ್ದ್ ಆಯಡ ಕೇನೊಡು ಅಂದ್‌ದ್ ಅಪ್ಪಣೆ ಕೊರಿಯೆ. 25ಅಕುಲು ಪೌಲುನು ಬಗ್ಗಾದ್ ಬಲ್ಲ್‌ಡ್ ಕಟ್ಟ್‌ನಗ ಆಯೆ ತನ ಕೈತಲ್‌ ಉಂತುದಿನ ಶತಾಧಿಪತಿಡ, “ರೋಮಾಪುರತ್ತ ಮೂಲದಾಯೆ ಆದುಪ್ಪು ನರಮಾನಿನ್ ನ್ಯಾಯವಿಚಾರಣೆ ಮಲ್ಪಂದೆ ಚಾಟಿಡ್ ಹಾಕಾವುನವು ನ್ಯಾಯನಾ?” ಅಂದ್‌ದ್ ಕೇಂಡೆ.
26ಶತಾಧಿಪತಿ ಈ ಪಾತೆರೊನು ಕೇಂಡ್ದ್ ಸಹಸ್ರಾಧಿಪತಿ ಕೈತಲ್‌ ಪೋದು, “ಈ ದಾನೆ ಮಲ್ಪೊಡಂದ್‌ದ್ ಎನೊಂದುಲ್ಲ? ಈ ನರಮಾನಿ ರೋಮಾಪುರತ್ತ ಮೂಲದಾಯೆ,” ಅಂದ್‌ದ್ ತೆರಿಪಾಯೆ.
27ಅಪಗ ಸಹಸ್ರಾಧಿಪತಿ ಪೌಲುನ ಕೈತಲ್‌ ಬತ್ತ್‌ದ್, “ರೋಮಾಪುರತ್ತ ಮೂಲದಾಯೆನಾ? ಎಂಕ್ ಪನ್ಲ,” ಅಂದ್‌ದ್ ಆಯನ್ ಕೇಂಡೆ ಆಯೆ, “ಅಂದ್,” ಪಂಡೆ.
28ಐಕ್ ಸಹಸ್ರಾಧಿಪತಿ, “ಯಾನ್ ದಿಂಜ ಕಾಸ್ ಕೊರ್ದು ಈ ಹಕ್ಕ್‌ನ್ ದೆತ್ತೊಂಡೆ,” ಅಂದ್‌ದ್ ಪನ್ನಗ, ಪೌಲೆ, “ಯಾನಾಂಡ ಮೂಲದಾಯೆ ಆದ್ ಪುಟ್ಟಿನಾಯೆ ಆದುಲ್ಲೆ,” ಪಂಡೆ.
29ಆಯನ್ ಪೆಟ್ಟ್ ಪಾಡ್ದ್ ಕೇನಿಯೆರೆ ಬೈದಿನಾಕುಲು ಅಪಗನೆ ಆಯನ್ ಬುಡ್ದು ಬುಡಿಯೆರ್. ಅವು ಅತ್ತಂದೆ ಆಯನ್ ರೋಮಾಪುರತ್ತ ಮೂಲದಾಯೆ ಅಂದ್‌ದ್ ಸಹಸ್ರಾಧಿಪತಿಗ್ ತೆರಿದ್ ಬನ್ನಗ ಪೌಲುನು ಕಟ್ಟ್‌ದ್ ಪಾಡ್ದಿನಾಯೆ ತಾನೇ ಅಂದ್‌ದ್ ಪೋಡಿಯೊಂಡೆ.
ಪೌಲು ಹಿರಿಸಭೆತ ಎದುರು
30ಪೌಲುನ ಮಿತ್ತ್ ಯೆಹೂದ್ಯೆರ್ ವಾ ತಪ್ಪು ಎನ್ನುವೆರ್ ಪನ್ಪಿನ ವಿಚಾರೊಡು ನಿಜವಾಯಿನ ಸಂಗತಿನ್ ತೆರಿಯೊಡು ಅಂದ್‌ದ್ ಸಹಸ್ರಾಧಿಪತಿ ಮನದಾನಿ ಆಯನ ಕೋಳ ದೆತ್ತ್‌ದ್ ಪ್ರಧಾನಯಾಜಕೆರೆನ್ಲಾ ಹಿರಿಸಭೆತಾಕುಲೆನ್ಲಾ ಸೇರ್ದ್ ಬರಿಯೆರೆ ಅಪ್ಪಣೆ ಕೊರ್ದು ಪೌಲುನು ಲೆತ್ತೊಂದು ಪೋದು ಅಕ್ಲೆನ ದುಂಬು ಉಂತಾಯೆ.
ప్రస్తుతం ఎంపిక చేయబడింది:
ಅಪೊ.ಕ್ರಿ 22: ತುಳು
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
New Life Literature
