1 Korinto 12
12
Pndungus Bgihur Utux
1Mtswai, ini ku sruwa ini namu klai ka quri bnege Bgihur Utux. 2Klaun namu, mseediq namu icil qnlhangan ciida we psrdilun maadis ani knuwan pthmuku tikung uka hrenang mnoda smseman namu nanak smnegul. 3Maanu so kiya de mpgkela ku yamu. Wada slgelu Bgihur Utux we uka ka maha rmengo: “Syusun ta ka Yesu.” Nasi uxe mnoda Bgihur Utux we uka seediq dehuk rmengo “Bukung ka Yesu.”
4Ani ini pntena ka pndungus we ida mntena 1 ka Bgihur Utux pdungus na mege. 5Kkregal ka qqpahun we ida 1 ka Bukung sqeepah ta. 6Ani ini pntena ka qqeepah we ida 1 ka Utux Baro qmeepah kana ani maanu meeniq kana seediq. So maha niqan rrihan seediq. 7Tqtaan Bgihur Utux ka txtaxa heyi seediq we kiya ka grrihun kana seediq. 8Mooda Bgihur Utux betaq mangal kari knkela ka duma seediq. Duma na seediq we ida moda 1 Bgihur Utux mangal kari niqan tunux. 9Duma na uri we ida mooda 1 Bgihur Utux mangal snhiyan. Duma na uri we mooda 1 ba Bgihur Utux maangal pndungus na pkmalu mnarux. 10Duma na we biqan beyax qeepah pnskraya qneepah Utux. Duma we ggarang kari. Duma we ppsaanak utux. Duma we rrengo kari utux. Duma we ppsaalu kari utux. 11Kana nii we ida pneyah 1 ba ida mntena ka Bgihur Utux qmeepah kana ma moda lnglungan na nanak maasu txtaxa heyi.
Egu Cida ka 1 Heyi
12Mntena so 1 ka heyi ma egu ka cida na. Ani egu ka cida heyi we ida 1 ba heyi. Mntena so nii ka Kiristo uri. 13Ani ta seediq Yudaya, seediq Hellenis, tnqliyan, seediq mtraguh we Bgihur Utux ka sptgaya ta psino ma 1 ta seediq. Kiya de kana ta we wada ta mangal Bgihur Utux nii.
14Ado heyi we uxe 1 ba cida, egu cida. 15Nasi rmengo ka papak: “Uxe ku baga ka yaku. Maanu so kiya de ini ku eniq heyi.” Ani mesa we ida ga heyi. 16Nasi rmengo ka birac: “Uxe ku doriq ka yaku. Maanu so kiya de ini ku eniq heyi.” Ani mesa we ida ga heyi. 17Nasi doriq ka kana 1 seediq we mpeeyah inu ka qqbahang? Nasi birac ka kana 1 seediq we mpeeyah inu ka smkenux. 18Kiya de saya ka Utux Baro we mooda heya nanak ma wada na psaun ckceka heyi ka cida. 19Nasi 1 cida ka kana de ga inu ka heyi da ho? 20Bale ba we egu cida ka heyi. Kiya de ida 1 ba ka heyi. 21Ini tduwa rmengo baga ka doriq: “Uxe ku ka isu.” Ini tduwa rmengo papak ka tunux: “Uxe ku ka isu.” 22Uxe wano kiya, ani muuwic bale ka cida heyi nii kesun we ida asi ka niqan. 23Ini sprui mita ka cida heyi nii kesun lmngelung we rnahun smparu mita. Uxe malu taan ka cida nii kesun lmngelung we rnahun pkmalu taan. 24Malu taan ka cida we ani ini kesi psmalu. Kiya de Utux Baro we pttkuun na pggaluk ka kana cida heyi. Kiya de niqan ini na tuku ka cida we rnahun na mege smbleyaq. 25So kiya de uxe ppsaanak heyi ma ppgaalu daha ka txtaxa cida 26Nasi mqraqil ka 1 cida we msuupu mqraqil ka kana cida. Nasi spruun mita ka 1 cida we msuupu mqaras ka kana cida.
27Yamu we heyi Kiristo, niqan ta cida ka txtaxa. 28Kiya de Utux Baro ge, wada na phyegan pssliyan we plaale we snkgulan, tg2 de mpgeela kari, tg3 de mptgesa, dungal we mpqeepah pnskraya qneepah Utux, mpkmalu mnarux, mdayo seediq, mpqlahang ma mprengo kari utux. 29Uxe maha so snkgulan kana, mpgeela kari, mptgesa ma qmeepah pnskraya qneepah Utux? 30Uxe kana ka niqan pndungus pkmalu mnarux ma rmengo kari utux ma psaalu kari utux peni? 31Kdrumuc ba mesa tgparu pndungus.
Gnaalu
Kiya de pgkela mu yamu ka rmabang ba malu elu.
ప్రస్తుతం ఎంపిక చేయబడింది:
1 Korinto 12: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020