1 Korinto 11
11
1So pnuyu mu Kiristo we yamu uri puyu kenan.
Moda Bubung Tunux Tthmuku
2Tmdahu ku yamu. Ado ani maanu we ini namu chungi yaku ma ga namu ndwaun dmoi ka kari gnarang mu yamu. 3Kiya de, pkela ku yamu: Kiristo we tunux rseno. Rseno we tunux mqedil. Utux Baro we tunux Kiristo. 4Dmurun ma gmarang kari ka rseno we nasi mubung tunux de gisu pqsiqa tunux na. 5Kiya de dmurun ma gmarang kari ka mqedil we nasi ini bubung tunux de gisu pqsiqa tunux na. Ado ririh mntena wada kmugus tunux. 6Nasi ini bubung tunux ka mqedil we asi tapi kana ka snuunux. Nasi daha ngalan qsqaun ka smeqic snuunux ma kmugus tunux we asi ka mubung tunux. 7Ini tduwa mubung tunux ka rseno, ado hnyegan ma knledax Utux Baro ka dheya. Kiya de knledax rseno ka mqedil. 8Pnlaale, ado uxe pneyah mqedil ka rseno, pneyah rseno ka mqedil. 9Uxe mqedil ka ssmalu rseno, rseno ka ssmalu mqedil. 10Maanu so kiya de quri snkgulan baro, mqedil we asi ka niqan pnskraya tthei psbeyax meniq tunux na. 11Kiya de muyu ta pnsramal Utux Baro, mqedil we ini tduwa uka rseno. Rseno uri we ini tduwa uka mqedil. 12Ado mqedil we pneeyah rseno. Rseno we mnoda mtuting peeyah mqedil. Kiya de pneyah Utux Baro ka kana ani maanu.
13Lngelung nanak! Ini bubung tunux dmurun Utux Baro ka mqedil we malu ho? 14Uxe ta gaga nanak tmgesa ita peni, nasi bbaro snuunux ka rseno we qqsiqa na ho? 15Kiya de nasi bbaro snuunux ka mqedil we knledax na kiya. Ado bbaro snuunux na we bnege na mqedil ririh bubung tunux na. 16Kiya de nasi migin mpspaux kari ka ani ima we uka so nii bnkegan pssliyan nuUtux Baro we uka uri.
Smeeliq Uqan Bukung
17Mprengo ku so nii we uxe ku ka tmdahu yamu. Ado pnssliyan namu we ini pkmalu yamu ma krinah pkuuka ririh yamu. 18Plaale, meyah msseli ka pssliyan namu we psaanak namu mesa ka qbhangan mu. So nii we snhiyun mu tikuh. 19Meniq ckceka namu ida maha niqan ka noda psaanak smalu tqpuuh, kiya de maha ptuura seediq mnoda pseengan. 20Msseli namu ciida we ida uxe namu nii meekan nhdean uqan Bukung 21Ado mekan ciida we plaale mekan uqun daha nanak ka knkingal heyi. So nii we muure ka duma ma bsukan ka duma. 22Uka sapah ssaun namu mekan ma mimah peni? Uxe uri we sbciqun namu qmita ka pssliyan nuUtux Baro ma spsiqa namu seediq uka ani maanu ho? Mprengo ku ba maanu yamu meniq oda so nii? Quri so nii we tndhuun maku ho? Uxe maku tndhuun!
Pheyu Uqan Mrtaso
23Ado wada mu sgarang yamu we nangal mu peeyah qbsuran. Kiya de bbrigun keeman ciida ka Yesu Bukung we mangal pang ma 24bobo mqaras dmnurun de gbingun na ma rmengo: “Nii we heyi mu ririh yamu sqada mu. Maha namu lmngelung yaku we dai ka nii.” 25Bobo mnekan de mntena dungal mangal pngerah mahan ma rmengo: “Pngerah mahan nii we bgurah pnsdhegan mnoda dara mu. Mimah namu ani knuwan, uxe namu cchungi kenan we dai ka nii.” 26Maanu so kiya de ani knuwan mekan namu pang nii ma mimah namu pngerah mahan nii we ririh namu pgkela hnqilan bukung betaq meyah ciida.
Psbrinah Lmngelung ita Nanak
27Kiya de ani ima ka ini mnuglengu mekan pang ma mimah pngerah mahan nBukung we ida kesun wada smeliq heyi ma dara Bukung. 28Kiya de asi ka bobo psbrinah lmngelung heya nanak ka seediq we kika uqi pang ma mahi pngerah mahan nii. 29Ado mekan ma mimah ka seediq, nasi ini psaanak mangal so heyi Bukung mekan ma mimah ka seediq we ririh nii maangal qnquwan noda heya nanak. 30Ado ckceka namu we hbaro ka ga muuwic ma ga mnarux. Ida hbaro ka wada mhuqil uri da. 31Kiya de nasi ta dehuk lmngelung ita nanak we uxe tana pkdraun. 32Kiya de psgeegun ta Bukung ciida we kiya ka mseru ita ka Bukung. Kiya de so ta uxe ppsuupu bobo dxeral ngalan niqan qnquwan noda.
33Maanu so kiya de, mtswai mu, meyah namu msseli meekan namu ciida we nduwa ba mttara. 34Nasi muure ka ani ima we uqi sapah han. So nii we uxe maangal qnquwan noda ppseli namu ciida. Quri duma na ooda we psnetur mu meyah ku ciida.
ప్రస్తుతం ఎంపిక చేయబడింది:
1 Korinto 11: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020