Kututika 9
9
Malwa a mutanu
Lufu lwa bimuna
1Nyambi ya Ngula wambile kuli Moshesha ngayi, “Yanga kuli Fwalo ukamutongweze ngayi Nyambi ya Ngula, Nyambi wa Bahebelu ukwamba nehe ngayi, ‘Yitabilisha bantu bami baye bakandemeshe. 2Ndi ukukana kubetabilisha ngayi baye, 3mona, liboko lya Nyambi ya Ngula likakuwila na wulweli wawukalu ha bimuna byobe nimwabyo, bambishi na bambongolo bobe na makamela na zingombe na bambelele na bampongo. 4Pe kami nika tapulula mukati ka bimuna bya Baishalela na nobyo bya Baengepita, kami kowa hinge shimuna wa Baishalela ukafwa.’”
5Nyambi ya Ngula, nemiki kukatenda eshe ku shikati sha mutena wa nzona. 6Oho kwashile Nyambi ya Ngula watendele ngonehe ambile, bimuna nimwabyo bya Baengepita byafwile, ngoboni bimuna bya Baishalela kowa hinge umo wafwile. 7Pe Fwalo wepwile ebye byatendiwile, mona, kowa hinge umo ku bimuna bya Baishalela unafu, hinge noho Fwalo mutima wendi wakaluhile, kaliha wetabilishile bantu ngayi baye.
Malwa a mutanu na amo
Manzunge
8Niho Nyambi ya Ngula ambile kuli Moshesha na Aloni ngayi, “Kundulenu mutoko wa maboko akwinzala waha ngaanze, pe Moshesha uka fukumuna mutoko hayilu kumbili ya Fwalo. 9Pe niwo ukafukumukila mu litunga nimwalyo lya Engepita kwinga lukungu lwa kulembuka. Pe nimwako lukafukumukila lukaleta manzunge awa akafutuka kwinga mambongola akekala ha bantu naha bimuna.”
10 #
Kuh 16:2. 10 Nohobene ba Moshesha na Aloni ba kundwile mutoko na kwimana kumbili ya Fwalo. Moshesha wawufukumwinine muyilu, pe waletele manzunge awa afutukile kwinga mambongola ha bantu naha bimuna. 11Pe Bakamalele kaliha batweshele kwimana kumbili ya Moshesha ndaba ya manzunge bekalile nawo, ngonehe Baengepita bamina nimwabo. 12Ngoboni Nyambi ya Ngula wakaluhishile mutima wa Fwalo, kami kaliha wetabilishile ngayi baye, ngonehe eshe ambile Nyambi ya Ngula kuli Moshesha.
Malwa a mutanu na abili
Likandavula
13Niho Nyambi ya Ngula ambile kuli Moshesha ngayi, “Ukameneke lumenemene ukaye na kuliwana na Fwalo, pe uka mutongweze ngayi, ‘Nyambi ya Ngula, Nyambi ya Bahebelu ukwamba nehe ngayi, yitabilisha bantu bami baye bakandemeshe. 14Shikati shino nikutuma malwa amanene, kaliha ha babilolo bobe naha bantu bobe tuhu, ngoboni nikashushwila kumo na nobe ngayi mwanga mulimuke ngayi kowa umo wafweka Ami muno mu litunga. 15Shinga ndi natandubwile liboko lyami na kukukama na bantu bobe na wulweli shinga mwalobelelakale, 16#Lom 9:17. ngoboni ha shuma eshe nakulehe ngayi uyoye, ngayi nimoneshe ngovu zami kukwobe, mwanga lizina lyami litumbalale hano hanci nimwaho. 17Hinge noho ushili kuliyemeza na kukanisha bantu bami ngayi baye. 18Haya yuvwililenu, nzona ha shikati shino nikalokesha mvula wa likandavula wakwinga hinga atanga ku moneka mu Engepita kubalika ku kutatika kwa litunga. 19Haya panika ndayano za ha bimuna byobe na byuma nimwabyo ebye uli nabyo ha munkanda. Biyakiwe mu bishawashawa, ndaba bantu nimwabo na bimuna ebye bikashala ha munkanda bya kubula kukoweziwa, oho bikalokiwa ku likandavula bikafwa.’” 20Niho babilolo ba Fwalo baya batinine lizu ambile Nyambi ya Ngula, baletele bandungo babo na bimuna byabo kwiza mu ku yuwama ku bishawashawa. 21Hinge noho, bamina kaliha bayuvwilile ebye Nyambi ya Ngula ambile, pe bashiyile bandungo babo na bimuna byabo ha munkanda ha kayelele.
22Niho Nyambi ya Ngula ambile kuli Moshesha ngayi, “Olwela liboko lyobe kuyilu, ngayi mwanga kwize likandavula mu litunga nimwalyo lya Engepita, ha bantu na ha bimuna naha mbuto nimwayo ya mumafuba.” 23Nohobene Moshesha wolwele liboko lyendi na muwana kuyilu, pe Nyambi ya Ngula watumine mishika na likandavula na lumuni lwashulukile hanci. Nyambi ya Ngula walokeshele mvula wa mamanya mu Engepita. 24Kwekalile likandavula na mishika na kumwesha liyilu nimwalyo. Likandavula wanenehele shikuma hinga kwatanga kwikala mvula wanoho mu Engepita kubalika ku kutatika kwa litunga. 25Likandavula lya cancwele byuma nimwabyo byekalile ha kayelele mu litunga nimwalyo lya Engepita, ha bantu nimwabo naha bimuna. Pe likandavula lyacancwele mbuto nimwayo ya mumafuba, pe lyapokwezele mitondo nimwayo. 26Mbalila yaku Ngosheni oku kwekalile Baishalela, niko tuhu kwabulile mvula wa likandavula.
27Niho Fwalo ehanine ba Moshesha na Aloni pe wambile ngayi, “Shikati shino nabipishi. Nyambi ya Ngula Kubipisha wufwako. Ami na bantu bami tunabipishi. 28Lombelenu kuli Nyambi ya Ngula. Twakwangakale na yino mishika yayinene na likandavula! Nikamitabilisha ngayi muye, kwikala muno kami mufwako.”
29Moshesha wambile kukwendi ngayi, “Nafuma tuhu mulukena, nikolola maboko wami na kulombela kuli Nyambi ya Ngula. Mishika yika mwena, kowa likandavula kami likekalako, mwanga mulimuke ngayi kati lino litunga linengi lya Nyambi ya Ngula. 30Ngoboni nikulimuka ngayi obe na babilolo bobe shilolokale mutine Nyambi ya Ngula.”
31(Kami katatalanzenze na mbale byapokozokele ndaba mbale ya hokelenga shawangu na katatalanzenze kami kahengwilenga shawangu. Luku lwa kufweka ngo ncongamincale. 32Ngoboni loto kaliha yapokozokele ndaba yahokanga kukotokela.) 33Moshesha washiyile Fwalo, watutikile mu lukena. Wolwele maboko na kulomba kuli Nyambi ya Ngula, pe mishika na likandavula na mvula byaketukile. 34Ngoboni oho Fwalo amonene ngayi mishika na likandavula byaketukakale, wabipishile kami. Niye na babilolo bendi bakaluhishile mitima ngonehe mwaka. 35Nohobene Fwalo kaliha wetabilishile Baishalela ngayi baye, ngonehe shiya Nyambi ya Ngula atongwezele Moshesha.
ప్రస్తుతం ఎంపిక చేయబడింది:
Kututika 9: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
