Kututika 36
36
1“Nyambi ya Ngula unapana Mbezalela na Oholiyaba na bantu bamina bamanono, bawutungu na kanangatima, aba balimuka kutenda byuma nimwabyo bikushingiwa kutendesha ku Ntanda ya Shizila. Bakatenda byuma nimwabyo ngonehe Nyambi ya Ngula abatongwezele.”
Bantu ba kuleta zintupu zazingi
2Moshesha wehanine Mbezalela na Oholiyaba na bantu nimwabo bawutungu aba apanine Nyambi ya Ngula ngana na naba balukukile mitima mu kuyavwa. Moshesha wabatongwezele kubalika kutenda milimo. 3Niho batambwile kukwendi ntupu nimwayo eye baletele Baishalela mu kutendesha ku Ntanda ya Shizila. Ngoboni Baishalela bazaminine kuletela Moshesha zintupu zabo lumenemene na lumenemene. 4Niho bantu bawutungu, aba batendelenga mulimo, bayile 5na kutongweza Moshesha ngayi, “Bantu bali na kuleta byabingibingi na kupitakana bya ku fwanina ku milimo eye Nyambi ya Ngula atutongwezele.”
6Nohobene Moshesha watumine lizu mu munkungwa nimwamo ngayi, “Hinga mwitabilisha mulume hinge mbuyama kuleta kami mukungwila waku Ntanda ya Shizila.” Nohobene bantu bemikiwile kuleta zintupu zamina, 7ndaba ebye baletele byengile byabingi mu kumanisha milimo nimwayo na ku shalaho.
Ntanda ya Shikungulukilo
(Kututika 26:1-37)
8Pe hakati ka nobo bantu batendelenga oyo milimo, hekalile bantu bamanono shikuma batendelenga ntanda ya shikungulukilo. Yatendiwile ha makwiza likumi amawahe, a kulelema akupohela hamo na wutonge wawuhombo na wakufumbuluka na wakufubila, akutangiwa na bifwekesha bya makelumbi. 9Likwiza na likwiza lyengile lya mamita 13 mu wutali na mashentimita muwipi 183. Nimwalyo lyengile lya kwezekela hamo. 10Niho batungile hamo makwiza mutanu kwinga mu wumbo umo, pe batendele kami shuma shimo na makwiza amina mutanu. 11Batendele kami zinkobo za wuhombo kunkumo ya mu wumbo na mu wumbo. 12Bayakile zinkobo makumi mutanu ha mu wumbo wakutatika na zinkobo makumi mutanu ha mu wumbo wawubili ngayi ziliyahikize. 13Niho bafulile kami tuhanto makumi mutanu twa ngolinde, pe banungile miwumbo yibili na tuhanto pe wengile mu wumbo umo.
14Niho batendele makwiza likumi na limo a wushako wa bampongo kwinga mu wumbo wa kufwika ntanda. 15Likwiza na likwiza lyengile lya mamita 14 mu wutali na mashentimita 183 muwipi, nimwawo engile akwezekela hamo. 16Niho batungilile makwiza mutanu kwinga shibaamba shimo na makwiza amina mutanu na limo kwinga shibaamba shamina. 17Pe bayakile zinkobo makumi mutanu ha nkumo ya mu wumbo wakutatika na zinkobo makumi mutanu ha nkumo ya mu wumbo wamina. 18Pe bafulile tuhanto makumi mutanu twa lubemba twa kumangisha ha kununga miwumbo yibili, nohobene ngayi mwanga winge mu wumbo wumo. 19Niho banyukilileko kami bitembe byamina bibili bya kufwika ha ntanda, shimo sha bitembe bya bikungwe bya bambelele bya kulomba kufubila na shamina sha bitembe bya bitutunga bya kunyuka shiwahe sha kufwika ha munkanda wayo.
20Niho abazile kami maleenge akwimika a mutondo wa mumbambangoma aku ntanda. 21Lileenge na lileenge lyengile mamita anaa mu wutali na mashentimita 69 muwipi, 22hamo na tupilikisho tubili ngayi maleenge mwanga aliwanike hamo. Maleenge nimwawo ekalile na tupilikisho. 23Wabazile maleenge makumi abili aku mbalila ya mabukubuku, 24pe batendele kami tupona makumi anaa twa shiliva twa kuya ku nceto ya maleenge, tupona tubili twa ku nceto ya lileenge na lileenge twa ku kwatisha tupilikisho twalyo tubili. 25Pe kami babazile maleenge makumi abili aku mbalila yaku ncelele ya ntanda, 26na tupona makumi anaa twa shiliva, tupona tubili ku nceto ya lileenge na lileenge. 27Pe kunyima ya ntanda, ku mbalila yaku mponci, babazile maleenge mutanu na limo. 28Babazile kami maleenge abili amu zinkomi kunyima ya ntanda. 29Awa maleenge amu zinkomi awanikiwile ku nceto na kuyilu. Pe awa maleenge abili amu zinkomi zibili nisho atendiwile munzila eye. 30Nohobene kwekalile maleenge mutanu na ahatu hamo na tupona twawo likumi na mutanu na kamo twa shiliva, tubili ku nceto ya lileenge na lileenge. 31Pe babazile kami mbangilo za mutondo wa mumbambangoma likumi na mutanu, mikambo mutanu za ku maleenge ku mbalila yimo ya ntanda, 32pe kami mutanu za ku maleenge aku mbalila yamina na mikambo mutanu za ku maleenge aku mponci kunyima ya ntanda. 33Mukambo wa hakati wakumine kunkumo na kunkumo ya ntanda hakati ka maleenge. 34Pe bafwikile maleenge na ngolinde na kufulilako mahuzi a ngolinde akukwata mbangilo. Eze mbangilo kami zafwikiwile na ngolinde.
35Utungile shibaamba sha makwiza amawahe a kulelema, akupohela hamo na wutonge wawuhombo, wakufumbuluka na wakufubila. Niho bashitangile shiwahe na bifwekesha bya makelumbi. 36Pe babazile zimpangwa za mutondo wa mumbambangoma zinaa za ku kwatisha shibaamba na kuzifwika na ngolinde na kuyakako tuhanto twa ngolinde. Niho bafulile tupona twa shiliva tunaa twa ku kwatisha zimpangwa. 37Ku menginino aku ntanda batungilileko kami shibaamba sha makwiza amawahe a kulelema, akupohela na wutonge wawuhombo na akufumbuluka na a kufubila, akutanga mabalamabala. 38Babazilileko kami zimpangwa mutanu, pe bayakileko tuhanto. Bazifwikile hayilu yazo hamo na mbangilo zazo na ngolinde, niho batendele tupona twa lubemba mutanu twaku zimpangwa.
ప్రస్తుతం ఎంపిక చేయబడింది:
Kututika 36: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
