Kututika 27
27
Kaala ka kuhokeshela Zinkombela
(Kututika 38:1-7)
1Ukabaze kaala ka mutondo wa mumbambangoma. Kakenge ka kwezekela hamo, mashentimita 229 mu wutali na mashentimita 229 muwipi na mashentimita 137 mu mwimo wako. 2Pe ukabaze ncengo ku zinkomi nimwazo zinaa za kaala. Nizo zikenge shuma shimo na kaala, pe nimwabyo bikafwikiwe na lubemba. 3Kami ukatende binzoyo bya kukundwila mutoko na mafwosholo na zindonga za kukunama na tuhanto na binzoyo bya kukalila mundilo. Byuma ebye nimwabyo bikatendiwe na lubemba. 4Kami ukafule luhalo lwa lubemba, ukayakeko mahuzi anaa aku kulikila a lubemba ha zinkomi za luhalo olwe. 5Ukayake luhalo ku nceto ya mubalo wa kaala ngayi mwanga lukakumine hakatikati ka kaala. 6Ukabaze mibanda ya ku kulikila ya mutondo wa mumbambangoma na kuyifwika na lubemba, 7pe yikengiziwe mu mahuzi ku mbalila na mbalila ya kaala oko kakakulikiwa. 8Ukatende kaala ha maleenge, kakenge ka mpako mukati. Ukatendesho ngonehe shiya nakufundizizile oho nakutongwezele ha lipili.
Shipango sha Ntanda ya Shikungulukilo
(Kututika 38:9-20)
9Ukazingwilisheko shipango ku Ntanda ya Shikungulukilo, shikenge sha miwumbo ya makwiza amawahe a kulelema. Kumbalila ya ku mabukubuku kukekale miwumbo ya mamita 46. 10Shikemanine ha zimpangwa makumi abili za lubemba na tupona twazo twa lubemba makumi abili. Ngoboni tuhanto twazo na mikambo yayo bikafuliwe ha shiliva. 11Ukatende shuma shimo ku mbalila yaku ncelele ya shipango. 12Ku mbalila yaku mponci kukekale makwiza a miwumbo ya mamita 23 mu wutali, hamo na zimpangwa likumi na tupona likumi. 13Ku menginino aku mbalila yaku mushamuko shipango shikenge sha mamita 23. 14Ku mbalila yimo yaku menginino kukekale mu wumbo wa mamita mutanu na zimpangwa zihatu na tupona tuhatu. 15Pe kumbalila yamina kami kukekale mu wumbo wa mamita mutanu na zimpangwa zihatu na tupona tuhatu. 16Ku menginino kukekale mu wumbo wa mamita mutanu na anaa mu wutali wa makwiza amawahe a kulelema akutungila hamo na wutonge wa wuhombo nawa kufumbuluka nawa kufubila, akutowanisha mabalamabala. Ukemanine ha zimpangwa zinaa zikekale mu tupona tunaa. 17Zimpangwa nimwazo za shipango zikangungikiwe na mbangilo za shiliva na tuhanto twazo tukenge twa shiliva na tupona twazo tukenge twa lubemba. 18Shipango mu wutali washo shikenge mamita 44 na muwipi mamita 22 namu mwimo washo kupitakana mamita 2.2. Miwumbo yikatungiwe ha makwiza amawahe a kulelema na tupona twa lubemba. 19Bingwalingwali nimwabyo bya kutendesha Ntanda na zimpimpi nimwazo za Ntanda naza shipango bikafuliwe ha lubemba.
Mwa kulamina Mimuni
(Balevi 24:1-4)
20Nyambi ya Ngula watongwezele Moshesha ngayi, “Fundiziza Baishalela ngayi mwanga bakaletenga mazi amawahe a olive akuyengula akumunikisha mimuni mwanga yikamunikiwenga mazolo na mazolo. 21Aloni na bana bendi bakayakenga lyeyeko lya mimuni mu Ntanda ya shikungulukilo, ha munkanda wa shibaamba eshe shikekala kumbili ya Likwati lya Kulimama. Mimuni yikabangenga ku meho wami kubalika mazolo kutwala naku lumenemene. Eze ndayano zikalamiwenga ku Baishalela ku bihemunwino byabo nimwabyo.”
ప్రస్తుతం ఎంపిక చేయబడింది:
Kututika 27: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
