Kututika 21
21
Nyinkalo ya bandungo
(Ndayano 15:12-18)
1Nyambi ya Ngula watongwezele Moshesha kufundiziza Baishalela mazu awa ngayi, 2#Bal 25:39-46. “Ndi ukalanda ndungo wa Kahebelu, ukakutendela milimo myaka mutanu na umo, pe mu mwaka wa mutanu na yibili wakakuma ukamulubule nahiya tuhu kwakubula kumuyumbila shimina. 3Ndi wengile muzike oho wamulandile, ukaya ninkayendi. Ngoboni ndi wekalile na mukazendi oho wamulandile, ukaboka na mukazendi.” 4Ndi hekulyendi wamushimbilile mbuyama, pe ha kumubelekela bana babalume hinge ba bambuyama, pe mbuyama na bana bendi bakenga bahekulyendi, pe mulume ukaya ninkayendi. 5Ndi ndungo ukamba shintwantwa ngayi nakolwo hekulyami na mukazami na bana bami kushinga kulubuka nifwako, 6pe hekulyendi ukamuleta ku mwanya wakulemeshela Nyambi, ku shipana hinge ku shikwiliti na kumutubwilako litu lyendi. Pe wukenga ndungo yendi mu kuyoya kwendi nimwako.
7“Muntu ukulandisha mwanendi wa mbuyama kwinga ndungo, pe kukamulubula ufwako ngonehe bandungo babalume. 8Ndi nalandishiwi ku muntu ou ukushinga ngayi enge mukazendi, kami ndi kumushinga ufwako, pe nafwanini kumwitabilisha ngayi akuliziwe kuli tatiyendi. Hekulyendi kutwesha kumulandisha ku lipukwenda ufwako ndaba unamwikalishi shibi. 9Kami ndi mulume ukulanda ndungo wa mbuyama na kumupana kuli mwanendi wa mulume ngayi amuyeke, ukamwikalika ngo mwanendi wa mbuyama. 10Ndi kami mulume ukushimba mbuyama wawubili, uku fwanina kupana mukazendi wa mwaka byakulya na bya kuvwala ngonehe biya atambwilenga na nyinkalo iya ekalilenga nayo mwaka. 11Ndi kumutendela byuma ebye wufwako, pe ukamulubula nahiya tuhu na kubula ku tambulaho ndando.
Ndayano habya mishunga
12 #
Bal 24:17. “Ou nimwendi ukukama muntu pe ha kufwa, ukazihiwa naniye kami. 13Ngoboni ndi shinengi sha mapuza kami niye kaliha wafunga kumuziha, pe nikamuyinikila kumbalila oku aku fwanina kupanzila uya muntu 14Ngoboni ndi muntu ukuziha minendi na ku fungasho, hinge ndi unatinini ku kaala kami ngayi akayoyeleko, mufumishenu ku kaala kami, ngayi mwanga afwe.
15“Ou nimwendi ukukama tatiyendi hinge ndi mandiyendi ukazihiwa.
16“Ou nimwendi ukuhukula muntu, hinge kumulandisha, hinge kumuheta, ukazihiwa. 17Ou nimwendi ukutukana tatiyendi hinge ndi mandiyendi ukazihiwa.
18“Ndi bantu ba kulwa pe wumo ha kupuha minendi limanya hinge kumukama na nkoni yendi, ngoboni kumuziha ufwako, kukashushuliwa ufwako. Ngoboni ndi uya muntu wakamiwa uli mu shibinzilo, 19kami ndi ha kupinduka na kutwesha kwendela ha mukombo, pe uya wamukama ndele akamuyumbile ncuungu ha kumanisha shikati shendi na kumulama hantu noho akapolelela.
20“Ndi muntu ukutola shitondo na kukama ndungo yendi wa mulume hinge wa mbuyama, pe ndungo akufwila hoho, uya muntu ukashushuliwa. 21Ngoboni ndi ndungo kufwa ku mutena umo hinge abili ufwako, hekulyendi kukashushuliwa ufwako. Ndaba linengi likona lyendi.
22“Ndi balume bamo ba kulwa pe ba kulemeka mbuyama uli na livumo, pe livumo likufuma, ngoboni niyemwine kulemana shikuma ufwako, ou unamulemeke ukayumbishiwa ngonehe omu akushingila mukokwendi, pe ukayumba ngonehe bakaketula bakakuyata. 23Ngoboni ndi uya mbuyama ukulemana, kashushwilo kakenga kuhingisha wumi ku wumi, 24#Bal 24:19-20; Nday 19:21; Mat 5:38. liho ku liho na liyewe ku liyewe na liboko ku liboko na liwulu ku liwulu, 25libyabya ku libyabya na shitombo ku shitombo na libenga ku libenga.
26“Muntu ukukama ndungo yendi wamulume hinge wa mbuyama, pe ha kumutiba liho, uya muntu ukalubula ndungo yendi ha liho lyendi. 27Ndi ukamushokola liyewe, pe ukalubula uya ndungo ngayi yikenge ncuungu ya ku liyewe lyendi.
28“Ndi nkunzi ukuziha muntu ha kumuyaha lishengo, pe uya nkunzi ukapuhiwa mamanya, pe nyama yendi kukaliwa yifwako, ngoboni mwine wendi kukashushuliwa ufwako. 29Ndi nkunzi wonzelanga kulwisha bantu, pe bakutongweza hekulyendi ngoboni niye kumukoweza na kumu shinka ufwako, pe uya nkunzi ha kuziha mulume hinge ndi mbuyama ha kumuyaha lushengo, pe nkunzi ukapuhiwa mamanya, mwine wendi kami ukazihiwa. 30Ngoboni ndi mwine wendi banamwitabilishi kuyumba ndando ya kukuliza wumi wendi, uku fwanina kuyumba ndando ngonehe bana mwimikili. 31Ndi nkunzi nazihi ndumbana hinge ndi kankanga, bakamuyata na ndayano zimo. 32Ndi nkunzi nazihi ndungo wa mulume hinge ndi wa mbuyama, mwine wendi ukayumbila hekulya ndungo makumi ahatu a mali a muwayawaya a shiliva, pe nkunzi ukapuhiwa mamanya na kumuziha.
33“Muntu ukukaba hinge ukukabulula liteke na kulishiya lyanyahamine, hinge ndi ukukaba liteke na kubula kulibuwa, pe nkunzi hinge mbongolo hakuwilamo, 34uku fwanina kuhingisha shimuna. Wukayumba mali kuli mwine wendi, pe shimuna wakufwa ukenga wendi. 35Ndi nkunzi wa muntu ha kuziha nkunzi waminendi, obo bantu babili bakalandisha nkunzi wamumi pe bakalitapila mali, ha shimuna wakufwa kami bakalitapila nyama. 36Ngoboni ndi shinalimukiwi ngayi nkunzi wonzelanga kulwishanga bimuna bimina, pe hekulyendi ndi wabulanga kumukoweza shiwahe na kumu shinka, pe ukayumba nkunzi wamumi pe uya shimuna wakufwa ukenga wendi.
ప్రస్తుతం ఎంపిక చేయబడింది:
Kututika 21: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
