Kututika 16
16
Maana na Bitentu
1Shikungulukilo nimwasho sha Baishalela shafumine ku Elimu, pe ha mutena wa 15 mu ngonda wawubili oho bafumakale mu Engepita bezile ku libelelengwa lya Shini, elye lili mukati ka Elimu na Shinayi. 2Nimwabo balinyengelele hali ba Moshesha na Aloni mu libelelengwa, 3pe bambile kukwabo ngayi, “Twashingile ngayi shinga Nyambi ya Ngula watuzihilile mu Engepita. Kuyo twekalilenga na kulya nyama na mankende na byakulya byamina kwikuta ngonehe twashingililengamo. Ngoboni enu munatulete muno mu libelelengwa mukutupunwisha ku nzala nimwetu.”
4Nyambi ya Ngula wambile kuli Moshesha ngayi, “Haya nili na kumipulumwina byakulya hanci. Bantu ba ku fwanina kututika ha mutena ha mutena kukundula bya kufwanikiza mutena umo pele, mwanga nibezeke nimone ndi bakakonka ndayano zami. 5Ha mutena wa mutanu na wumo, bakakundula kabili ngonehe batendanga shikati nimwasho na kuwahishila shilumweza.” 6Nohobene Moshesha na Aloni bambile ku Baishalela nimwabo ngayi, “Ano mazolo mu kulimuka ngayi wengile Nyambi ya Ngula ou wamifumishile mu Engepita. 7Pe lumenemene mukamona kubyazima kwa wuwahe wa Nyambi ya Ngula, ndaba niye unayuvwu eshe mu kulinyengela hahendi. Etu bayani ngayi mu linyengele kukwetu?” 8Niho Moshesha ambile ngayi, “Nyambi ya Ngula, niye ukamipana nyama ya kulya kumazolo na byakulya ku lumenemene, ngo omu mu kushingila, ndaba unayuvwu kulinyenga kwenu okwe mu kulinyengela hahendi. Etu bayani ngayi mu linyengele kukwetu? Mwa shikuma kulinyenga kwenu kaliha kuli hahetu ngoboni kuli Nyambi ya Ngula.” 9Moshesha wambile kuli Aloni ngayi, “Tongweza shikungulukilo sha bantu ba Ishalela nimwabo beze na kwimana ku meho a Nyambi ya Ngula, ndaba unayuvwu kulinyenga kwabo.” 10Oho Aloni ambilenga ku shikungulukilo nimwasho sha bantu ba Ishalela, nibo batilaminine ku libelelengwa, pe babazumukile tuhu kubyazima kwa wuwahe wa Nyambi ya Ngula kwamonekele mu likumbi. 11Nyambi ya Ngula wambile kuli Moshesha ngayi, 12“Nayuvwu kulinyenga kwa Baishalela. Batongweze ngayi mazolo ba kulya nyama, pe kulumenemene bakawana byakulya nimwabyo ebye bakushinga. Niho mukalimuke ngayi Ami Nyambi ya Ngula, Nyambi yenu.”
13Mazolo litanga lyalinene lya bitentu lyezile na kupupula, byengile byabingi shikuma byafwikile munkungwa nimwawo, kami lumenemene mume wawilile hanci kuzinguluka munkungwa. 14Oho mume wakuhukile ha libelelengwa hekalile shuma shimo shashihehu sha kupapalala, nisho shengile ngo makelengo. 15Oho Baishalela bashimonene balipwile umo na wamina ngayi, “Shishini eshe?”#16:15 Lizina lya byakulya ebye mu Shihebelu ngayi Maana. Ndaba kaliha balimukile ngayi shengile shumangani. Moshesha wambile kukwabo ngayi, “Ebye nibyo byakulya anamipana Nyambi ya Ngula ngayi mulye. 16Eshe nisho shiya Nyambi ya Ngula atutongweza ngayi muntu na muntu akakundule byabingi obyo akutwesha kulya, mukashimba muntu na muntu shibubila. Muntu na muntu ukashimba ebye akushinga kufwanikiza na bantu obo ekala nabo.”
17Baishalela batendele noho, bamo ba kundwile amengi bamina twani. 18Oho bawafwanikizile, obo ba kundwile amengi kaliha bekalile na amengi shikuma, kami obo ba kundwile amashe, kaliha bekalile na amashe shikuma. Muntu na muntu wakundwile ngo ndilo yendi. 19Moshesha wambile kukwabo ngayi, “Hinga kwikala muntu umo wakushiyako bya nzona.” 20Ngoboni bamo babulile kuyuvwilila kuli Moshesha, bashiyileko shipabu shawo. Oho kwashile lumenemene anukile ku bola na kwinzala mapila. Pe Moshesha wabakalihilile.
21Muntu na muntu wakundwile ngo kushinga kwendi lumenemene na lumenemene, ngoboni oho watatumukile mutena, owo ashalile hanci anyangumukile. 22Ha mutena wa mutanu na wumo ba kundwile byakulya kabili, ku muntu na muntu. Niho bakulwane nimwabo ba shikungulukilo bezile mu kutongwezako Moshesha eshe banatende bantu. 23Pe Moshesha wambile kukwabo ngayi, “Eshe nisho Nyambi ya Ngula atutongweza ngayi, nzona wukenga Mutena Wakukatala wa shizila, mutena wakufunguliwila kukwendi. Yohenu ebye mukushinga kuyoha, kami telekenu ebye nimwabyo mukushinga kuteleka. Nimwabyo bikushalaho biku fwanina kukoweziwila ku nzona.” 24Babikoweze ngonehe abatongwezele Moshesha kukuma ku mutena wumina, nibyo byabulile ku bola hinge kwikala na mapila mukatikabyo. 25Moshesha wambile ngayi, “Lyenubyo lelo, ndaba lelo unengi mutena wakukatala wakufunguliwila kuli Nyambi ya Ngula, kami kukawana byakulya ha munkanda wa ntanda mufwako. 26Mu ku fwanina kukundula byakulya ku matena mutanu na wumo, ngoboni ku mutena wa mutanu na abili, ou wunengi mutena wakukatala, kowa bikekalako.”
27Pe ha mutena wa mutanu na abili bantu bamo bayile mu kukundula byakulya, ngoboni babulile kuwanabyo. 28Niho Nyambi ya Ngula ambile kuli Moshesha ngayi, “Bikati binga enu bantu mu kukana kwombatala ndayano zami na mazu wami? 29Anukenu ngayi Ami Nyambi ya Ngula, Ou wunamipana mutena wakukatala, nisho shuma shiya ha mutena wa mutanu na wumo nikamipana byakulya bya matena abili. Bantu nimwabo bekale oku bekalanga ha mutena wa mutanu na abili, kowa muntu wa kushiya ntanda yendi.” 30Nohobene bantu babulile kutenda mulimo ha mutena wa mutanu na abili.
31 #
Kul 11:7-8. Bantu ba Ishalela batumbile byakulya ebye ngayi maana, ndaba byafwekele ngo mbuto ya kutuba yayishe, wutobe wawo ngonehe mankende a mapapi akuvuba na wushi. 32Kami Moshesha wambile ngayi, “Eshe nisho Nyambi ya Ngula atutongwezele ngayi tukowezeko maana amo ngayi mwanga tukongele bazukulyetu kumbili. Kami bakatweshe ku mona byakulya ebye atupanikile ngayi tulile mu libelelengwa, oho atututwishile mu Engepita.” 33#Bah 9:4.Moshesha wambile kuli Aloni ngayi, “Tola ntesho, wuyakemo maana malita abili, pe wuyitenteke ku meho a Nyambi ya Ngula mu kuyikowezela bazukulyetu.” 34Niho Aloni atentekelewo kumbili ya Likwati lya kulimama, mwanga akongiwe, ngonehe Nyambi ya Ngula alayelele Moshesha. 35#Yosh 5:12.Pe Baishalela balile maana myaka makumi anaa, hantu noho bakumine ku litunga lya Kenaani oku bazikile. 36(Malita abili akulingana na shitika sha likumi lya efwa.)
ప్రస్తుతం ఎంపిక చేయబడింది:
Kututika 16: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
