Ezekieli 39
39
1Na ive, mwana womundu, profeta ku Goga, u vole, Mwami Nyasaye a vola ndi: Henza, mbeye musigu ku ive, O Goga, munene wa Roshu, na Mesheki, na Tubali: 2na nda ku girunkannya inyima, nokukwimirira, nda ku leta wanegire kutwula ku viheri vya kasikasini; nda ku leta udze ku vigulu vya Israeli; 3na nda kuya ubuta bubwo bu twule mmukono gugwo mmosi, nemibano gyigyo nda gyagulula gyi twule mmukono gugwo mulungi. 4Ive u la gwa ku vigulu vya Israeli, ive, neviduma vivye vyosi, navandu va veye halala nive: nda ku haana ku manyonyi getsing'ano tsyosi aga litsanga inyama, noku tsinyama tsyomwigendanyama u duke kulibwa. 5U la gwa mwilimiru ku bulavu; kigira inze mmali kuvola yaga, Mwami Nyasaye a vola. 6Nda hila umuliru ku Magoga, noku vosi ava menyanga nemirembe mu visulu; navo va la manya inze mbeye Yahova. 7Na nda mannya lieta lyange litakatifu mu avandu vange Israeli; kandi si nda bugirira lieta lyange litakatifu lyononnywe kandi mba: na tsihiri tsi la manya inze mbeye Yahova, Mutakatifu wa Israeli. 8Henza, inkuva yiyi yidzanga, nayo i la kolwa, Mwami Nyasaye a vola; yili nilyo lidiku lya nda vola amakuva galyo. 9Ava menyanga mu madala ga Israeli va la tsia kyova, na va la lomba miliru gyevyuma vyobulwani nokuvisamba, tsingavo netsikuti, nobuta, nemibano, na matimu, netsisaka, va la lomba miliru gyevindu yivyo mihiga gyitano na gyiviri; 10va luhe va vule kutsia kuvugula tsinku mmulimi, kinga kutenya tsinku mmulitu; kigira va la lomba miliru gyevyuma vyobulwani; va la va hamba avahambe yavo ava li ni va va hamba avahambe, nokunuula yavo ava li ni va va nuula, Mwami Nyasaye a vola.
11Na ga la va ku lidiku yilyo, nda ha Goga bugono bwevilindwa mu Israeli, livona lya yavo ava vitanga ku luvega lwevugwe lwenyanza: nevilindwa vi ligalira yavo ava vitanga, va vule kuvita: na va la ta Goga ha zana nobunyingi bwavandu veve; navo va la li gulika Livona lya Hamon Goga. 12Na inyumba ya Israeli i la va mu li ta yavo imyeli gyitano na gyiviri, va duke kutakasa kivala. 13Yee, avandu vosi avekivala yikyo va la va ta; inkuva yeyo i la va likuminywa kuvo mu lidiku lya ndidzominywa, Mwami Nyasaye a vola. 14Navo va lahula avandu vemiyinzi gya kazozo, ava li vita hagati hekivala, na halala na yavo avavitira mukyo, va te avatigala habulavu ku kivala yikyo, va ki takase: inyima yekiheri kyemyeli gyitano negyiviri va lenya. 15Navo ava vitanga mu kivala va la vita hagati hakyo; lwa mulala a lola kigumba kyomundu, a la singeridza kilolero ahimbi nakyo, kuduka yavo ava tedzanga va luhe va ki te mu livona lya Hamon Goga. 16Kandi Hamona li la va lieta lyelidala. Ni ndiyo va la takasa kivala.
17Na ive, mwana womundu, Mwami Nyasaye a vola ndi: Volera amanyonyi getsing'ano tsyosi, netsinyama tsyosi tsyomwigendanyama, Mwevungidze halala, mudze; mu vugane halala tsimbega tsyosi, mudze mu kihaanwa kyange kya nziitira mwinye, yee, ki veye kihaanwa kinene ku vigulu vya Israeli, mu duke kulia inyama nokunwa masahi. 18Mu la lia inyama yavobunyali, nokumba masahi gavanene velirova, na gama gondi makole, na gavana vamagondi na getsimbuli, na getsigiriki, vyosi vi veye vinetu vya Bashan. 19Na mu la lia amaguta mu luhe mwigute, nokunwa masahi mu luhe mu hambike, agekihaamha kyange kya nziitiye mwinye. 20Na mu liguta ha meza yange tsiparasi namagari gobulwani, navobunyali, na vosi avobulwani Mwami Nyasaye a vola.
21Na nda singeridza ubukumibwange hagati he tsihiri, netsihiri yitsyo tsyosi tsi la lola likalaga lyange lya nkoli, nomukono gwange gwa mbiki kuvo. 22Na ndiyo inyumba ya Israeli i la manya inze mbeye Yahova Nyasaye wavo, kutwula ku lidiku yilyo nokutsitsagil'la. 23Na tsihiri tsi la manya inyumba ya Israeli yadikidzwa kutsia mbutugwa kigira ubudamano bwavo; kigira va kola amahyolo ku inze, na nda visa mmoni mwange kuvo: ma nda va vika mu makono gavasigu vavo, navo va gwa ku kivavi vosi. 24Kuli ububi bwavo kuli amahyolo gavo nda va kolera ndiyo; nda visa mmoni mwange kuvo.
25Kigira yaga Mwami Nyasaye a vola: Kalunu ndirannya kandi lyadikidzwa lya Yakobo, nokuvererera inyumba yosi ya Israeli; na nda kendekira lieta lyange litakatifu. 26Navo va la ginga tsisoni tsyavo, namahyolo gavo gosi aga va hyola ku inze, lwa va li menya nemirembe mu kivala kyavo avene, na si ha la va ho nomundu kali mulala wokuvatihidza; 27lwa mmala kuvaleta kandi kutwula mu avandu, nokuvavungidza va twule mu vivala vyavasigu vavo, nokutakaswa hagati havo imbiri wetsimoni tsyetsihiri tsinyingi. 28Navo va la manya inze mbeye Yahova Nyasaye wavo, kigira nda vadikidza va tsie mbutugwa hagati hetsihiri, kandi mmali kuvavungidza virane mu kivala kyavo; si nda leka yo mulala kuvo kandi mba; 29kandi si nda visa mmoni mwange kuvo kandi mba; kigira mmali kutsuka Roho wange ku inyumba ya Israeli, Mwami Nyasaye a vola.
ప్రస్తుతం ఎంపిక చేయబడింది:
Ezekieli 39: MBE
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©Bible Society of Kenya, 1967
