Ezekieli 28
28
1Likuva lya Yahova lya duka ku inze kandi, kuvola, 2Ive mwana womundu, u volere munene wa Turo, Mwami Nyasaye a vola ndi: Kigira mwoyo gugwo gwegingi, na wa vola, Inze mbeye munyasaye, nzikaye ku intebe ya Nyasaye, hagati hetsinyanza; navutswa u veye mu ndu, si u veye Nyasaye mba, kali ni wa vika mwoyo gugwo kuli mwoyo gwa Nyasaye; 3henza, u veye nobugeeri kuvita Danyeli; si ha veye nelikuva lya viswa kali lilala ku ive; 4wenyoleye ubutugi nobugeeri bubwo nelimanya lilyo, u nyoye ithahabu nefetha mu livikiru lilyo lya akiba; 5u medi ubutugi bubwo kigira ubugeeri bubwo bunene na kigira likirannya, nomwoyo gugwo gu gingiywi kigira ubutugi bubwo; 6kigira yaga Mwami Nyasaye a vola ndi: Kigira ive wa vika mwoyo gugwo kuli mwoyo gwa Nyasaye, 7henza, nda leta avageni ku ive, avokutihidza avetsihiri; na va la somola vivavi vyavo ku bulahi bwobugeeri bubwo, na va la vika ububi ku bung'ering'anu bubwo. 8Va la kwikidza hasi kuduka mbogo; na u la kudza likudza lya yavo aviitwa, mu mwoyo gwetsi nyanza. 9Kuduka kalunu u la vola imbiri wa uyu wiitanga ive, Inze mbe ye Nyasaye? Navutswa u veye mundu, si u veye Nyasaye, mmukono gwa uyu u kwata tsing'oma. 10U la kudza likudza lya avasindi ku makono gavageni: kigira mmali kuvola likuva yili, Mwami Nyasaye a vola.
11Kandi likuva lya Yahova lya duka ku inze, kuvola, 12Ive, mwana womundu, u syomere mwami wa Turo, u mu volere, Mwami Nyasaye a vola ndi: Ive u viki muhuri ku kigero, kizuye ubugeeri, nokudukira mu bulahi. 13Ive wa li mu Edeni, mulimi gwa Nyasaye; ligina sa lilala lyobuguli budinyu lya li kyokwefuma kikyo, lyakanyu, nelyetopazi, nalimasi, neberulo, nasokamu, nejasipi, nesafiro, nezumuradi, nesaridoniki, nethahabu: miyinzi gyevikupangwa vivyo ku lugano lwesuguti, namalere gogo aga li mu ive; vya lombwa kwetegeka ku lidiku lyelilombwa lilyo. 14Ive wa li mukerubi muvake u kunikanga: na inze nda ku vika, nu u luha nu u va igulu wekigulu kitakatifu kya Nyasaye; wa genda genda yiyi na yiyi hagati ha magina gomuliru. 15Wa li mudukiru mu tsinzira tsitsyo kutwula ku lidiku lya wa lombwa, kuduka inyinga bukyamu bwa loleka mu ive. 16Kigira ubunyingi bwelikirannya lilyo va kwizulitsa kirage hagati hoho, na ive wa kola ubwoni: kigira yaga nda ta ive u twule mu kigulu kya Nyasaye kuli kindu kyononywa: na nda ku dividza, ive O mukerubi wokukunika, u twule hagati ha magina gomuliru. 17Mwoyo gugwo gweginga kigira ubulahi bweligondo lilyo; wononnyi ubugeeri bubwo kigira ubung'ering'anu bubwo: mmali kutuula ive hasi; mmali kukwa lira hasi imbiri wavami, va duke kukulola. 18Kigira bunyingi bwobu damano bubwo, mu budamano bwelikirannya lilyo, u mali kwononnya hatakatifu hoho; kigira yaga mmali kutwulidza muliru hagati hoho; gu mali kukusamba, mmali kukukola ive u ve ligoke ku lirova imbiri wetsimoni tsya vosi ava lolanga ive. 19Vosi hagati hetsihiri ava manyi ive va la ku genyera: u gwiye litihidza, na si u la va ho kandi mba.
20Kandi likuva lya Yahova lya duka ku inze, kuvola, 21Ive mwana womundu, henzidza mmoni mumwo ku Sidone, u profete kulyo, u vole, 22Mwami Nyasaye a vola ndi: Henza, mbeye musigu ku ive, O Sidone; nda kuminywa hagati hoho; na va la manya inze mbeye Yahova, lwa mmali kukola likalaga muye, nokuva mutakase muye. 23Kigira nda hila muye ubulwaye, na masahi mu tsinzira tsitsye; na yavo avatwa tsing'oma va la gwa hagati hehe, na kivavi kuye tsimbega tsyosi; na va la manya inze mbeye Yahova. 24Si ha la va kandi nolutavati lu halulanga ku inyumba ya Israeli, kinga lifwa li saliridzanga kuvo vosi ava va kumbiridza, nokuvalega; na va la manya inze mbeye Mwami Nyasaye. 25Mwami Nyasaye a vola ndi: Lwa mmala kuvungidza inyumba ya Israeli kutwula ku avandu va va sa lanywa mu, nokutakaswa muvo imbiri wetsihiri, hene yaho va la menya mu kivala kyavo kya nda ha mutumekiri wange Yakobo. 26Na va la menya nemirembe mukyo; yee, va lombaka tsinyumba, nokusimika milimi gyemizabibu, na va la menya nemirembe, lwa inze mmali kukalaga ku yavo ava va leganga ava va kumbiridza; na va la manya inze mbeye Yahova Nyasaye wavo.
ప్రస్తుతం ఎంపిక చేయబడింది:
Ezekieli 28: MBE
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©Bible Society of Kenya, 1967
