Rommi 6
6
Axiné no Akìthí, Khristo no Aküxü
1Tishiaye, ningu ye kiu pìní kea? Küpükini alau shi kighishe penike ghenguno ningu ye axiné shiauve kepu keshea? 2Khilemu tishimoe! Ningu ye axiné lo thive kemiqo ke; ningu ye kíshi no axiné lo xü aní kea? 3Momu nongu ye ningu khunoqo no baptiz shikeu vechewo Khristo Jisü gholo küqhaluva keno pa kìthí gholo baptiz shi küqhaluva kepi mütha keshea? 4Tighenguno ningu ye baptiz shikeu vechewo pa gholo thive no qho küqhavae, tishi keu vechewo Apù juküvü vechewo akìthí lono Khristo xüputhuve keu toi, ningu ghí aküxü kithé xülu peniye ke.
5Kughengu tsalá ningu no pa kithí kimihi shi pa gholo küqhaluve aye, ningu ghí mütsüqhei no pa no xülekuthu shive keu toi pa gholo küqhaluve nani. 6Kughengu ningu no ithi akeu no ningu küxü aqau ye pa gholo yedaküqhavae, tishianguno axiné no qhasü pe achekeu phimpi hu ye shipühave peniye ke, eno ningu ye axiné qüaxe shipemove niye ke— 7kughengu khunoqo no Khristo gholo thiküqhavea keno panongu ye axiné lono khaqhiphevea.
8Ike ningu no Khristo gholo thiküqhave aye, ningu ghí pa gholo xü nani kepi pülü cheni. 9Kughengu ningu no ithi akeu no Khristo ye akìthí lono xüputhuvea ke ghenguno, pa ye akiniù thikithe müla nani; akìthí ye pa shou aküka kühavae. 10Pa no thikeu kìthí ye axiné lo ghuthukhavi ghenguno thivae; ikemu pa no xü akeu küxü ye Alhou juküvü ghenguno xüani.
11Tihutoi, nongu ye axiné lo thive kemi kemu Khristo Jisü lono Alhou gholo xü akemi shi nongu likhi nongu kihilo. 12Tighenguno axiné pelo ophimpi thiveniküau qhasü pesü küsakügha kümlà shinishi keu gholu pe kevilo. 13Nongu phi-au lakhimu pesü küsaküghaw küghaküsü shi ghi axiné lau ikhiphe tsü kevilo, ikemu tishini ke züqhulo akìthí lono aküxü shive kemiqo toi olikhi oküxü pesü Alhou lau ikhiphe pe tsülo; eno ophi-au eno omulo kükümsü kümtsü pesü achipiumikucho küghaküsü lakhi toi ikhiphe pe pa tsülo. 14Axiné ye nongu mipeu shimae, kughengu nongu ye ayeza qholo kumo no küpükini qholo xü anike.
Achipiumikucho Qüaxemiqo
15Tishiaye ningu ye kiu pìní kea? Ningu ye ayeza qholo kumo no küpükini qholo anike ghenguno axiné shi aní keshea? Khilemu tishimoe! 16Kughou nongu no nongu likhi nongu pesü khiuala lau aghokulu shi aqüaxemi shi ikhiphe pe tsüveni keno, nongu ye nongu no agholu chekeuw aqüaxemiqo kepi mütha keshea? Tiye nongu no axiné khikhi akìthí lo sawu cheni keno tipau qüaxe shi aghina, aghokulu khikhi achipiumikucho lo sawu cheni keno tipau qüaxe shi aghí namu ke. 17Ikemu Alhou shikimthi ani, kughengu nongu no axiné qüaxemiqo shi ache namu nongu ye nongu mulo lono ipeghino akükütsü jeli apasü shi nongu tsü keqo ikhilu no tipau ghokulu shiluvea ke. 18Nongu ye axiné lono kuqhophevae eno achipiumikucho qüaxemi shiluvae.
19Timi lhoaye lo tomo-chhimo keu achekeu nongu gholo akeu ghenguno ni ye tsalakipe küxüw kichekipiye peitha ani. Nongu no nongu likhi nongu pesü mithekumo ngò küsakügha qüaxe shi ikhiphe pe tsü cheke toi, itehi ye nongu likhi nongu pesü achipiumikucho qüaxemi shi ikhiphe pe tsülo eno tishi keu vechewo akimthe küxü lo xülo. 20Kughou nongu no axiné qüaxemi shi akeno, nongu ye achipiumikucho ghaküsü lono kuqhopheve no acheke. 21Thime khipaqo ghenguno itehi ye nongu nokujo ani keno tipaqo lau no kiu alá shilu kea? Thime tipaqo ye ashekha lo akìthí ke. 22Ikemu itehi ye nongu ye axiné lono kuqhopheve no Alhou qüaxemiqo shivae, nongu no alá shilu keu hu no akimthe lo sawu cheni, eno ashekha lo tiye lhokta küxü ithulu cheni. 23Kughengu axiné jume ye akìthí ke, ikemu Alhouʼw kümsá ghò ye ningu Mipeu Jisü Khristo lono lhokta küxü ke.
ప్రస్తుతం ఎంపిక చేయబడింది:
Rommi 6: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
