Rommi 4
4
Abraham Küpülü pesü Kiche-piye
1Tishiaye ningu pù-asü Abraham ye ashi gholau no pìní aye, Alhou lau achipikalu keu vehu lo kiu phuphelu kea? 2Kuchou lo ye Abraham no akümlà vechewo achipikalu püaghi aye, pa ye qhezakulupu kiuala anie—tishimu Alhou zülo ye qhezakulupu kühae. 3Kughengu Kuchoyesü lo ishi pipüani, “Abraham no Alhou pülüluve, eno tipau no pa ye achipiumikuchomi kepi kihitsüe.”#4:3 Bothu 15:6; ajo 22
4Akümlàmiqo ye ajume pesü aghò lakhi toi ikhilu chemoe ikemu panongu no qelu moayesa keu kiqi lono ikhilu cheni. 5Tishiaghimu, timi khuno no pano kümlà shou pükhübemo püzü Alhou khuu alhou kümthami pelo achipikalu pe chekeu shou pükhübe cheni keno, pa no panongu küpülü vechewo achipiumikuchomi kepi kihitsü cheni. 6Akümlà vechewo no kumo püzü achipiumikuchomi ipi Alhou no kihive tsükeu timi hu ye akümghapue ipi David ghí hitoi pipüani:
7“Khunoqo hebideve keu kipimí qhivetsüa keno,
khunoqo xiné nhavetsüa keno
tipaqo kümghapue.
8Ampeu no khuno xiné khilemu kihikülai tsümoni keno
timi tipano ye akümghapue.”#4:8 Leshe 32:1‑2
9Kükümgha hipau ye aphighüyiko ghave kemi ghengu likhi keo aphighüyiko ghamo kemi ghenguno ghí kea? Ningu no Abraham ye pa küpülü ghenguno pa pesü achipiumikuchomi kepi kihitsü ipi cheni. 10Kiu tüqhüdo lono achipiumikuchomi ipi kihitsü kea? Tiye pa no aphighüyiko ghave kethiu no keo, tipau züu no kea? Tiye aphighüyiko ghave kethiu no kumoe, ikemu tipau züu no ke! 11Eno pa ye aphighüyiko-küghá shimphi züu no aküpülü vechewo achipiumikucho chishida keu michi shi aphighüyiko-küghá ikhilu ke. Tishiaye, pa ye aphighüyiko ghamo namu pülü chekemiqo kümtsü papù ke, tishi keu vechewo panoqo pelo achipiumikuchomi kepi kihi kulupu shipe niye ke. 12Eno tilikhi kumo no Abraham ye aphighüyiko ghave kemi khunoqo no aphighüyiko ghave keu likhi kumo no pa no aphighüyiko ghamphi züu pape chekeu küpülü pukhu nepa lo checheni keno panongu papù ghí ke.
13Abraham eno pa nuli-kughukoqo ye ayeza vechewo pa ye ayeghiqha mheghi kiyighiu shi nani kepi Alhou no piqhipüa keu ighílu ke kumoe, ikemu aküpülü lono achipiumikucho shilu chekeu vechewo no ke. 14Kughengu ayeza shou pükhü chekemi no amheghi kiyighiu shike aye, aküpülü ye akiqi küha eno Alhouʼw pikiqhi ye ameküha keu shiveni cheke, 15kughengu ayeza no Alhou loghu süghi cheni ke. Eno khilehi ayeza küha keno tilehi hekibide kühae.
16Tighenguno, Alhouʼw pikiqhi ye aküpülü vechewo ighi cheni, tishianguno pikiqhi ye küpükini vechewo Abraham nuli-kughukoqo kümtsü lau mütsümishei shilu peniye ke—tiye ayeza papelu chekemiqo lau likhi kumo, ikemu Abraham küpülü toi aküpülü aghí kemiqo lau ghí ke. Abraham ye ningu kümtsü papù ke. 17Kughengu hitoi yèpüani: “Ino opesü shiye kutomo papù lakhi shitsü ke.”#4:17 Bothu 17:5 Alhou zülo Abraham ye ningu papù ke. Abraham no pülü chekeu Lhou ye kithimi aküxü tsü chekeu eno püzüu küha no akeqo lhophe chekeu Lhou ke.
18Lajupu kühamitheve kelomu Abraham ye lajupu lono pülülu ke eno tighenguno pa vilo, “Onuli-kughuko no kutomo shi nani,”#4:18 Bothu 15:5 ipi pipüa keu toi shiye kutomo papù shilu ke. 19Pa küpülü lo miqemileivemo no pa ye kuchou lo ye pa phimpi ye thive ke kumlho shiva kepi ithi ake—kughengu pa ye ampe 100 qhalo shive ke—eno titoi Sarah ghí kitemi shive no anuhami shive ke. 20Tishiaghi namu, Abraham ye pülükümla vechewo Alhouʼw pikiqhi lau no iqeve keu shimo ke, ikemu pa küpülü shikumtoluve no ajekipi pesü Alhou tsüke, 21eno Alhou ye pa no kiu piqhi keno tipau shikulupu küká ani kepi tsaqüi pükhübeluve. 22Hi ghenguno Alhou no “Abraham ye achipiumikuchomi kepi kihitsüe.” 23“Achipiumikuchomi ipi pa kihitsüe” ipikeu tsà ye pa ghengu likhi no yèpüamoe, 24ikemu ningu ghenguno ghí ke. Tiye ningu khunoqo no ningu Mipeu Jisü akìthí lono xüputhuve tsükeu Lhou shou pülübeni keno pa no ningu ghí achipiumikuchomi kepi kihitsü nani. 25Pa ye ningu xinéqo ghenguno akìthí lau ikhiphe pe tsüve ke eno ningu pelo achipikalu penikeu ghenguno xüputhuve ke.
ప్రస్తుతం ఎంపిక చేయబడింది:
Rommi 4: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
