Rommi 15
15
1Ningu khunoqo no aküpülü lo muto ani keno miqemilei kemi no ikiqive kelo xaqhetsü moayesa ke thono nilikhi nipulou shi akepu kumoe. 2Ningu kümtsü no ningu kisüghümiqo kivipu eno panoqo shiqhepuku nikeu ghenguno panongu pulou shitsü moayesa ke. 3Khristo ghí pa likhi pa pulou shimo ke, kughengu Kuchoyesü lo ishi yèpüani: “Timi no nongu thaigha keqo ye ishou ikughivae.”#15:3 Leshe 69:9 4Thime hitoi keqo no ningu shika niye püzüu no Kuchoyesü lo yèpe qhivae. Eno Alhouʼw pikiqhi shikupu niye ningu no kutuukulu shi khe akelo Kuchoyesü no lajupu ningu tsü eno shikumto cheni.
5-6Nongu pelo amlo lakhi eno asütsa lakhi lono Alhou eno ningu Mipeu Jisü Khristo pa Pù juküvü shilu penike ghenguno kutuukulu eno shikumto tsü chekeu Lhou pelo Khristo Jisü toi nongu dolo akükümsü lakhi lono xülu penike kuphutsü peniu.
7Tishiaye Alhou juküvüpu shipe nike ghenguno Khristo no nongu ikhilu ketoi nongu ghí lakhi no lakhi ikhilulo. 8Alhou no apù-asǘqo lau piqhipüa keu ye kuchou kepi piye nike ghenguno Khristo ye Jewmiqo lau aqemi lakhi toi ighi kepi kümsülulo. 9Tilikhi kumo no Khristo ye Jewkumomiqo pelo Alhouʼw kimiyekini ghenguno Alhou juküvü shipe niye ighike. Kughengu Kuchoyesü lo ishi yèpüani:
“Tighenguno Jewkumomiqo gholo no ino osheni;
ino oje sheqhe ale pheni.”#15:9 2Sam 22:50; Leshe 18:49
10Itaghi ishi pipüani,
“Nongu Jewkumomiqo, paw timiqo gholo alovishelo.”#15:10 Zaki 32:43
11Eno itaghi,
“Nongu Jewkumomi kümtsü Ampeu sheqhelo;
shiaye jeli kümtsü pelo pa sheqhe pelo.”#15:11 Leshe 117:1
12Eno itaghi Isaiah no pi,
“Jesse kughuko lo lakhi ipeghi nani,
pa ye shiyeqo shou ayè penike ipeghi nani;
Jewkumomiqo no pa shou lajupu qhi nani.”#15:12 Isa 11:10
13Nongu no pa shou pükhübe ake toi, lajupu tsü chekeu Lhou pelo alokiqi eno alokughuno chhitoi nongu shepichhi tsüpeniu, tishi keu lono nongu pelo Aghungú Kimthe küká vechewo lajupu qochililu apeniu.
Paul no Jewkumomiqo lau Mülà keu
14Athiküzümi eno achelimiqo, ino mütsüqhei ithi akeu no nongu ye akivipu no chhitoi ani, akighithi kutomo ani eno shitsa shi lakhi no lakhi shikalu nanie. 15Tishiaghimu ni ye ighono akumtoshi thime hami püzüu nongu lau yève keqo hu itaghi pikithe niye ani, kughengu Alhou no küpükini itsü keu vechewo 16ni ye Jewkumomiqo lau Khristo Jisü qeu lakhi ke. Pa no Alhou tsakiviu pe asheshu penikeu chine kümlà ipichetsü ke, tishianguno Jewkumomiqo pelo Aghungú Kimthe no shikimtheve no Alhou no ikhikulupu kümlagho shilu peniye ke.
17Tighenguno ni ye Alhou kümlà lo Khristo Jisü lono akijivilei acheni. 18Ino pi eno müla keu vechewo Khristo no Jewkumomiqo pelo Alhou ghokulu lo saighilu penikeu lo tokulu shilu keu nguno alau kütau kiumu pimoe. 19Panongu ye amichipu ngo akümzapu küká eno Alhou Ghungú küká vechewo pütsaqhilu ke. Ike Jerusalem lono homüxa süsü Illyricum kutólo ni ye Khristo tsakiviu kümtsü pe asheshuvae. 20Ni ye a-a khilehi no Khristo je chimla aphi keno tilehi atsakiviu pe kütsü nikeu no pülhapuju ikimiji shi acheni. Ni ye kütami khuala no aboqha qhave aghí keu shou shipukuni shichemo ke. 21Kuchoyesü lo ishi pipüani:
“Khunoqo vilo pa ghili pi miphi keno tipaqo no pa ithulu nani,
eno khunoqo no pa ghili chilu miphi keno tipaqo no vethalu nani.”#15:21 Isa 52:15
22Ino nongu lau ighi nikeu kumunuve akeu ye atsakiviu pesü hipaqo lau asheshu akeu ghenguno ke.
Paul no Rome Xuju nike Kughu
23Ikemu itehi ye hipa qhalo ighenguno mülà kepu-a kühavae, eno ni ye ampe kushuwa lono nongu xuju nishiqhiyi ighivea kehu 24ni ye Spain lo wuche kikije nongu xuju niye kughu ani. Ino nongu kathasü wu kikije lono nongu sasü kusholu no atüqhüdo kitila nongu gholo aloinoluve kethiu nongu pelo ikuphu tsüpe no ighüzüla lo wuni ke lakuju shi anie. 25Ikemu itehi ye, ni ye Ampeuʼw timiqo kümlapù ghenguno Jerusalem lo wuchea. 26Kughengu Macedonia eno Achaia lo küpülümiqo ye Jerusalem lo Ampeuʼw timiqo gholo kumlhomiqo kuphu nike amlokiqi shi akümlagho qhakütsü ke. 27Panongu ye tishini keu lo amlokiqi shike, eno kuchou lo ye panongu ye kumlhomiqo kuphu moayesa kepu shi ake. Kughengu Jewmiqo no aghungú lo kükümgha pesü Jewkumomiqo lau küsaje aghí aye, Jewkumomiqo ghí panonguw ashi lo kükümghaqo pesü Jewmiqo lau küsaje keu ye àküzǘ ke. 28Ike ino akümlà hipau shiqhive püzü Jerusalem lo kumlhomiqo no akukuphu ithuluve keu mütsümisheive kethiu no Spain lo wu nani eno ino tilau wu kikije nongu xuju nani. 29Kughou ino nongu lau ighini keno, ni ye Khristo lau no ighi keu kükümgha kinikulu shi pesü ighino nongu sasü küsaje nani kepi mütsümishei ani.
30Athiküzümi eno achelimiqo, ningu Mipeu Jisü Khristo eno Aghungúʼw kikimiye vechewo ino nongu lau hi qhüiniju ani: Igholo kutubo ghi Alhou vilo ighenguno tamo no inikhu tsü alo. 31Judea lo pülümo kemiqo lau no isüsho tsü penike inikhu tsülo. Eno akukuphu pesü Jerusalem lo wuche keu lo tilehi Ampeuʼw timiqo pelo no puloniqhiyi shi akümlagho ikhilu penike ghenguno inikhu tsülo. 32Tipathiu no Alhou pulou shi aghí no ni ye alokivishi nongu lau ighino nongu gholo ngolu keu vechewo aghüthipüxülu kepu shi nani. 33Alokughuno tsü chekeu Lhou no nongu kümtsü gholo apeniu. Amen.
ప్రస్తుతం ఎంపిక చేయబడింది:
Rommi 15: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
