Rommi 14

Miqemilei kemi eno Akumtomi

1Nongu gholo aküpülü miqemilei kemi salu tsülo, eno kütsalalu kepu shi aghí namu panoqo sasü kütsala kevilo. 2Timi khami ye aküpülü vechewo kiu-kiumu chulu nani ipi cheni, ikemu kütami khuu aküpülü miqemilei keno, pa ye ayetsüniqo likhi chu aghiluvi. 3Ikemu timi khuu no achuqupu kümtsü chu cheni keno pa ye achuqupu le chekemi thaigha kepu kumo, eno khuu no achuqupu le cheni keno pa ye kümtsü chu chekemi shou küghathabe kepu kumo, kughengu Alhou ye panongu ikhiluve ake. 4No ye khuu keno kütami qemi shou küghathabeni kea? Aqemiqo ye amikucho keo amikucho kumo keno panongu mipeu likhi no xatha nani ke. Eno panongu ye amikucho shi nani, kughengu Ampeu no panoqo pelo amikuchou shilu pe nani.

5Timi khami ghengu ye atsala hami no atsala kütau nguno akimtheu kepi kümsü cheni; kütami ghengu ye atsala kümtsü aphiphi kepi kümsü cheni. Pütüta no alikhi akükümsü lo mutotoi shiluve kepue. 6Khuno no atsala hami ye akimchi kepi ikhilu cheni keno panongu ye Ampeu gihu ghi ikhilu cheni. Ashi chu chekemi ghí Ampeu gihu ghi chu cheni, kughengu panongu no Alhou shikimthi tsü cheni; eno ashi chu chemo kemi ghí Ampeu gihu ghi ashi le cheni, kughengu panongu ghí Alhou shikimthi tsü cheni. 7Kughengu ningu khumu pütüta ghengu likhi no xü chemoe, eno ningu khumu pütüta ghengu likhi no thive chemoe. 8Ningu no xü aye, Ampeu ghenguno xü anie; eno ningu no thive aye, Ampeu ghenguno thini. Tighenguno ningu no xüna thi namu, ningu ye Ampeuʼw ke. 9Hipau kimiji ghenguno Khristo ye kithimi eno küxümi kinikujo shou Ampeu shilu penike ghenguno thive no xüchilethuve ke.

10Tishiaye nongu ye kushiye nongu thiküzümi momu nongu chelimi shou küghathabe cheni kea? Nongu ye kushiye panongu thaigha ghi peitha cheni kea? Kughengu ningu kümtsü Alhouʼw küghakütha lakhü zülo puthugho nani ke. 11Kuchoyesü lo ishi yèpüani:

“Ampeu no pi, ‘Ni ye xüani keke

timi kümtsü no izülo qhoqhünhe nani;

eno timi kümtsü no ni ye Alhou kepi shuphe nani.’ ”#14:11 Isa 45:23

12Ike ningu lüthü lakhi-khi no pütüta shélo Alhou lau kihikülai tsü kepu shi nani.

13Tighenguno ningu lakhi no lakhi shou küghathabe chekeu taveni nolo. Tishini ke züqhulo athiküzümi momu achelimi pelo axiné lo ikiqive pemo nikeu momu shokukho kepu kiumu qhitsümo nikeu küxü xü nikeu xakütha shilulo. 14Ino ithi akeu eno Ampeu Jisü lono mütsümishei vethalu akeu ye, thime kiumu pa likhi pa kutoshi ye mithemo keu kumoe. Ikemu tsalá khiuala no thime hami ye mithemo kepi kümsü cheghí aye timi tipau ghenguno thime tiye mithemo keu shivae. 15Tsalá nono kiuala chu keu ghenguno othiküzümi momu ochelimi pukhu küpüsüpu shive aye, no ye kikimiye lono xü anike kumovae. Ochuqu pelo timi khuu ghenguno Khristo thive keno tipau shipüsave pe kevilo! 16Tishiaye timi pelo nono akivi ipi kümsü chekeu ye küsakügha kepi pipüsa pe kevilo. 17Kughengu Alhou kükaqha ye kuchu-kusho vehu kumoe, ikemu tiye achipiumikucho, aloino keu, eno Aghungú Kimthe vechewo alokivi ke. 18Eno khuno no hipau ghola lono Khristo qeni keno Alhou mulokiqipu eno timi lopu shilu anike.

19Tighenguno ningu ye kiu no alokiqi eno shikumto kilé keu süghi cheni keno tipau shini ke ghenguno thowkha lo pükapütsa mülà ani nolo. 20Alhou no kiu mülà pepüani keno achuqupu ghenguno tipau kütsave pe kevilo. Achuqupu kümtsü akimthe ke, ikemu timi lakhi no kütami pelo püsükukhove pe kepu chuqu kiu-kiumu chu keu ye achipi kumoe. 21Othiküzümi momu ochelimi pelo püsükukhove pemo kepu shi ashi chumo momu aji yemo momu kütau kiu-kiumu shimo keu pavie.

22Ike hipaqo vehu lo nono kiu pülü cheni keno tiye Alhou nokujo dolo qhilo. Timi khuu no pa pulou shikeu vechewo pa likhi pa kiléqhivemoni keno pa ye akümghapue. 23Ikemu timi khuno no künacho pülaghi chuni keno panongu ye pimivae, kughengu panongu no chu akeu ye aküpülü shou bemo ke; eno kiu-kiumu aküpülü shou bemo keu ye axiné ke.

ప్రస్తుతం ఎంపిక చేయబడింది:

Rommi 14: STB

హైలైట్

కాపీ

సరిపోల్చండి

షేర్ చేయి