Rommi 13

Ayekipe Kükagha lau Aghokulu shini keu

1Yepeka kükagha qholo timi kümtsü no aghokulu shimoayesa, kughengu Alhou no huthuphe tsükeu kumo aye ayekipe kütau ye küha ke. Itodolo ayè pe akeu yepeka ye Alhou no huthuphe tsüke. 2Tighenguno, timi khuu no yepeka hebideni keno tiye Alhou no süküsü shipüa keu hebide anike, eno khuno no tishini keno pano likhi pano shou küghakütha süghi nani. 3Kughengu achipishi chekemi ye ayekipemiqo müsà akepu kühae, ikemu khuno no achipi shichemo keno panongu ye müsà kepu ani. No ye ayekipe lo akemi müsàmo no xü nishi cheni keshea? Tishiaye kiu no achipi keno tipau shilo eno no ye akishé ithulu nani. 4Kughengu ayekipe lo akemi ye Alhou qemi ke eno okivipu ghenguno anike. Ikemu nono achipikumo shi aye müsà alo, kughengu ayekipemiqo ye aghime otsülu kepu küká#13:4 Kuchou lo ye azüta tsü ani ipi yèpüani. anike. Panongu ye Alhou qemiqo ke, eno achipishimo kemiqo shou Alhou loghukighide süghi peniye puwu püani ke. 5Tighenguno, aghime ithulu nosa keu kümsà ghengu likhi no kumo püzü alikhi lomije vechewo ghi ayekipe qholo aghokulu shimoayesa ke.

6Hipau ghenguno nongu ye zame tsü cheni ke, kughengu ayekipemiqo ye Alhou qemiqo ke, eno panongu ye ado kümtsü pesü ayekipe ghenguno tsü cheni ke. 7Nono api pù akemi kümtsü lau kiu tsü kepu ani keno tsülo: Zame tsü kepu shi aghí aye, zame tsülo; yepeka lau asüqha jeli tsü moayesa kepu shi aghí aye, tsülo; qhoqhü moayesa kepu shi aghí aye, qhoqhülo; gihu moayesa kepu aghí aye, agigihu tsülo.

Kikimiye no Ayeza Shikupu Tsü Cheni

8Lakhi no lakhi kimiye kilé nikeu piashe nguno alau ye api-ashe lakhimu qhi kevilo. Kughengu timi khuu no kütami kimiye cheni keno pa ye ayeza shikupuluvae. 9Azakütsü ye hipaqo, “No ye shupu kevilo,” “No ye ghiqhi kevilo,” “No ye püka kevilo,” “No ye jumine kevilo,”#13:9 Ipe 20:13‑15,17; Zaki 5:17‑19,21 eno azakütsü kütau khijehi aghimu ti kümtsü ayeza hipau lo süküqhavae: “Olikhi otoi okisüghümi kimiyelo.”#13:9 Achine 19:18 10Khuno no kimiye cheni keno akisüghümi lau alhoküsa kümlà shichemoe. Tighenguno kikimiye ye ayeza shikupulu cheni.

Atsala Hu ye Kupunúvae

11Ningu no itodolo xü akeu tüqhüdo ithi no hi shilo: Nongu ye zü akeu lono idaithughi kepu do hu ighivae, kughengu ninguw xakulu ye püzüu ningu no atüghi lo pülüluve keu nguno alau kupunukhoi kithevae. 12Putho wokhaveni chea; atsala ye ipechea. Tighenguno ningu àküzǘ lo kümlàqo qhikhave no aküvü ghünanu puluveni nolo. 13Atsala küvü lo akemi toi ningu ghushoghili lo kithikiyi shini nolo. Ningu itho-igho eno shomzümoni, kipito mikucho kumo eno ghüpoghüzü shimoni, kichighimo eno anhekushu shimoni nolo. 14Tishini ke züqhulo, Ampeu Jisü Khristo pesü nongu ghünanu shi pepuluvelo, eno kíshi no ashi-ajì ghapiqi tsüní keno tipaqo ghili kümsü akevilo.

ప్రస్తుతం ఎంపిక చేయబడింది:

Rommi 13: STB

హైలైట్

కాపీ

సరిపోల్చండి

షేర్ చేయి