Rommi 10
10
1Athiküzümi eno achelimiqo, ino imulo lo minemighei chekeu eno Alhou lau inikhu chekeu ye Israelmiqo pelo xaluve penikeu ke. 2Kughengu panongu no Alhou lau minemighei akeu ino thopi shi tsülu nani, ikemu panongu no minemighei akeu ye kuchou kighithi boqha küha ke. 3Panongu no Alhou chipiumikucho mütha no pano likhi pano ghola lono achipiu shini keu phu ke ghenguno panongu ye Alhou chipiumikucho lau ikhiphe pesü tsümo ke. 4Küpülümi kümtsü pelo achipiumikuchomi shilu penike ghenguno Khristo no ayeza kishekhave tsüke.
5Moses no ayeza vechewo achipiumikucho shilu chekeu ghili hipau yè ke: “Timi khuu no ayeza lo akeu papeluni keno tipau vechewo xülu nani.”#10:5 Achine 18:5 6Ikemu aküpülü vechewo achipiumikucho shilu chekeu lo ishi yèpüani: “Omulo lo ishi pikevilo, ‘Khuu no atsütsǘ lo ikuluni kea?’ ”#10:6 Zaki 30:12 (tiye Khristo aqhou saikighi kepu shi) 7“ikeo ‘Khuu no aqokutho lo iqiluni kea?’ ”#10:7 Zaki 30:13 (tiye akìthí lono Khristo saikughi kepu shi.) 8Ikemu Kuchoyesü ye kiu piani kea? “Atsa hu ye ophivilo anie; tiye okichí eno omulo lo anie.”#10:8 Zaki 30:14 Atsa ye ningu no aküpülü ghili kükütsü tsà shuphe chekeu ke: 9Nono okichí lono, “Jisü ye Ampeu,” ipi shupheve eno Alhou no akìthí lono pa xüputhuve kepi omulo lono pülüluve aye, no ye xaluve nani. 10Kughengu omulo lono pülüluve keu hu no Alhou lau achipikalu pe cheni, eno okichí lono oküpülü shupheve keu hu no xaluve cheni pe ke. 11Kughengu Kuchoyesü no ishi pipüani, “Timi khukhumu pa pülü chekemi ye khilemu kujove pemo nani.”#10:11 Isa 28:16 12Kughengu Jewmi ngò Jewkumomi dolo kiumu kütüqü keu kühae. Ampeu hipau ye kümtsü Mipeu ke eno pa ku kemi kümtsü kupukuno shi kümgha tsü cheni, 13kughengu, “Ampeu jeku kemi kümtsü xaluve nani.”#10:13 Joel 2:32
14Tishiaye panongu ye pa pülümo kelo kíshi no pa kuni kea? Eno panongu ye pa ghili chilumo kelo kíshi no pülüluni kea? Eno khiuala no panongu lau akükütsü tsà pikülhamo kelo panongu ye kíshi no chiluni kea? 15Eno khukhumu puwumo kelo ye kíshi no akükütsü tsà pikülhani kea? Kuchoyesü lo ishi yèpüa keu toi: “Atsakiviu pesü ighi chekemi pukhu ye kiutoi jukivi kela!”#10:15 Isa 52:7
16Ikemu Israelmiqo kümtsü no atsakiviu ikhilu ke kumoe. Kughengu Isaiah no pi, “Ampeu, khuu no ningu kükütsü tsà pülü tsü kea?”#10:16 Isa 53:1 17Tighenguno, aküpülü ye akükütsü tsà chilu keu lono ighi cheni, eno akükütsü tsà ye Khristo ghili pikülha keu vechewo chilu cheni. 18Ikemu ino hi iniju ani: Israelmiqo ye kuchou no akükütsü tsà chilumo keshea? Panongu ye chilu thono:
“Panongu sütsa ye ayeghiqha kümtsü lo wuvae,
panongu tsaqo ye ayeghi shekha kutólo wuvae.”#10:18 Leshe 19:4
19Itaghi ino hi iniju ani: Israelmiqo ye kuchou no vethamlave keshea? Vethalu thono, kughengu Moses ghuloki lo Alhou no ishi pi,
“Khunoqo no shiye kuchou kumo keno ino nongu pelo tipaqo ju pesü anheshu pe nani;
ino vethakulu küha keu shiye lakhi pelo nongu mulo shikighide tsüpe nani.”#10:19 Zaki 32:21
20Eno tipathiu Isaiah no Alhou ghenguno amlo kumtoshi pi,
“Iphumo kemi no iphulu,
ikumo kemi lau ino ilikhi ipephe piye ke.”#10:20 Isa 65:1
21Ikemu Israelmiqo vehu lo Alhou no ishi pi,
“Ni ye atsala kupuju i-u sükho pe
aghokulu kumomi eno hekibidemi kheju acheni.”#10:21 Isa 65:2
ప్రస్తుతం ఎంపిక చేయబడింది:
Rommi 10: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
