John 7
7
Jisü no Puloshoqhi-cheboʼw Tiqhitini lo Wu
1Hipathiu Jisü ye Galilee qhalo wue. Jewmi sakiphemiqo no pa pìthíve niye kuchughu akeu ghenguno pa ye Judea qhalo wuni shimo no ae. 2Ikemu kughou Jewmiqoʼw Puloshoqhi-chebo Tiqhitini tsalà kupunúve keno, 3Jisü thiküzümiqo no pa vilo pi, “Okhopemiqo pelo nono müla keqo ithulu pe kepu shi Galilee qhive no Judea lo wuvelo. 4Mìshí sakiphemi shinishi chekemi lakhi ye khumu tuqhou no mülàitha chemoe. Nono thime hipaqo shi ani ke ghenguno, ayeghiqha pelo no ithipelo.” 5Kughengu pa likhi pa thiküzümiqo kutólo ghí pa shou pülübemo ke.
6Tighenguno Jisü no panongu vilo pi, “Ido ye ighi miphie; nongu ghengu ye kiu-kiu do shi aghimu achipi ke. 7Ayeghiqha ye nongu mithi müla nani, ikemu ino ayeghiqha kümlàqo ye küsakügha kepi ashepe shitsü keu ghenguno ayeghiqha no imithi cheni. 8Nongu ye tiqhitini lo wulo. Ni ye tiqhitini hipau lo iqhoni chemoe, kughengu ido ye tokuchou shimphi ke.” 9Pa ye hi pive püzü Galilee lo ngove.
10Ikemu pa thiküzümiqo no tiqhitini lo wuve kethiu Jisü ghí mìshí zülo pekiphe shimo püzü tuqhou no wu. 11Ike tiqhitini lo Jewmi sakiphemiqo ye Jisü phuju ghi ishi iniju, “Pa ye khile ani kea?”
12Aqokitikhi dolo Jisü ghili asheshi no pisü qhakuchho shi kügha wove. Khami no pi, “Pa ye timi kivimi ke.”
Kütamiqo no khochile, “Kumoe! Pa ye timi pishiqhi chenie.” 13Ikemu Jewmi sakiphemiqo kümsà ghenguno khumu mìshí zülo ye pa ghili pimoe.
Jisü no Tiqhitini-a lo Kütsü
14Tiqhitini pinyi akeu amtamu shimphi lono Jisü ye achineki khala lo iqho no kütsü thuve. 15Tilehi Jewmi sakiphemi akeqo ye akümzave no ishi iniju, “Timi hipau ye kíshi no shikamo keghi ishi ithikutholu kea?”
16Jisü no khochile, “Ino shika akeu ye ilikhi iw kumoe. Hiye ipuwu keu lau no ighike. 17Khukhumu Alhou pulou shini ke kìsheluve kemi ye ikükütsü ye Alhou lau no ighi keo ilikhi itsapi keno phupheluve nani. 18Khukhumu pa likhi pa no piaye tiye pa likhi pa jekipi ghenguno pi anike, ikemu khuu no pa puwu keu jekipi phu cheni keno pa ye kuchou timi ke; pa ye kimikimi kumoe. 19Moses ye ayeza pesü nongu tsüke kumo keshea? Ikemu nongu lakhimu ayeza papemo ke. Nongu ye kushiye ipìthíve niye pükapütsa ani kea?”
20Aqokitikhi no khochile, “No ye tüghaküsa no tsüghape anie. Khuu no opìthíve niye pükapütsa ani kea?”
21Jisü no panongu vilo pi, “Ino akümzapu kümlà lakhi shi ke nongu kümtsü akümzave. 22Moses no aphighüyiko-küghá (kuchou lo ye hiye Moses lau no ighimo, ikemu apù-asǘqo lau no ighike) pesü nongu tsükeu ghenguno nongu ye Sabbath tsalà lono anu kipitimi phighüyiko gha acheni. 23Tishiaye tsalá Moses yeza hexamo nike ghenguno Sabbath tsalà lo anu kipitimi lakhi phighüyiko ghalu cheghí aye, nongu ye kushiye ino Sabbath tsalà lono timi lakhi phimpi kuchopu shipivi tsükeu lo iju amloide ani kea? 24Ashou ithukulu bepe küghatha chekeu tavelo, ikemu tishini ke züqhulo achipishi küghathalo.”
Jisü ye Khuu Kea?
25Tipau tüqhüdo lo Jerusalemiqo khami no ishi iniju thuve, “Timi hipau ye Jewmi sakiphemiqo no pìthíve niye pükapütsa akeu ke kumo keshea? 26Pa ye hi anie eno mìshí zülo atsa pianie, ikeghi panongu ye atsa lakhimu pa vilo piamoe. Ayekipemiqo ye kuchou no pa ye Messiah kepi xathava keshea? 27Kughou Messiah hu ighini keno timi khumu pa ye khilau no ighi keno ithimo nanie, ikemu timi hipau ye khilau no ighi keno ningu ye ithi anie.”
28Jisü ye hi kutólo achineki khalau kütsü ae, ike pa no ighamuku pi, “Iyei! Nongu ye ni ithi anie, eno nongu ye ino khilau no ighi keno ithi anie. Ni ye ilikhi iw kükagha lono hilehi ighiamoe, ikemu khuu ipuwu keno pa ye kuchou ke. Nongu ye pa müthae, 29ikemu ni ye pa ithi ani kughengu ni ye pa lau no ighi eno pa no ipuwu ke.”
30Tishi akelo panongu no Jisü kügha niye shi, ikemu pa do ighimo no ake ghenguno timi lakhimu pa shou a-u bupukumoe. 31Tishimu, aqokitikhi dolo timi kutomo no pa pülüluve. Panongu no pi, “Kughou Messiah ighini keno, pa ye timi hipau nguno akichiù amichipu kümlàqo shi nani keshea?”
32Aqokitikhi no chhu-chhu shi Jisü ghili küptsa akeu Phariseemiqo no chiluve. Ikelo achinetomi eno Phariseemiqo no Jisü küghape niye achineki khemiqo puwuve.
33Jisü no pi, “Ni ye ado ikhonhei nongu gholo anani, eno tisheno ni ye ipuwu keu lau wuve nani. 34Nongu no iphu nani, ikemu nongu ye iphu müla nani; eno ino khile anani keno nongu ye ighi müla nani.”
35Jewmiqo dolo lakhi no lakhi vilo ishi pi, “Timi hipau ye ningu no phu müla keu-a khila wuve niye kümsü ani kea? Pa ye niw timi Greekmiqo gholo apanaghave kemiqo lau wu no xü püzü Greekmiqo kütsü niye shi ani keshea? 36Kughou pa no, ‘Nongu no iphu nani ikemu nongu ye iphu müla nani,’ eno ‘Ino khile anani keno nongu ye ighi müla nani,’ ipi keno tiye kiu kiqi kea?”
37Tiqhitini pinedo ashekhau eno ajekipi tsalà lo, Jisü no puthugho no ighamuku pi, “Khukhumu tüghüthi kemi ye ilau ighino yelulo. 38Kuchoyesü no pikeu toi, khuno no ipülüni keno pano lolo no aküxüpu zü ghoki qoipeghi nani.” 39Pa no hipau pikeu kiqi ye kutou pa pülü kemiqo no Aghungú ithulu niye shi akeu tsà ke. Jisü ye ajuküvü lono xüputhu keu shimo no ake ghenguno tipau do kutólo ye pa pülü kemiqo lau Aghungú tsümo no ae.
40Pa tsaqo chilu no timi khami no ishi pi, “Kuchou no timi hipau ye Tungkupu hu ke.”
41Kütamiqo no pi, “Pa ye Messiah hu ke.”
Tishimu timi kütamiqo no ishi iniju, “Kíshi no Messiah ye Galilee lono ighini kea?” 42Kuchoyesü lo Messiah ye David no achekeu mishiphu Bethlehem lo David tikughuko lono ighi nani ipi püani ke kumo keshea? 43Tishikehu Jisü ghenguno timiqo dolo kijethave. 44Khami no Jisü kügha niye shi, ikemu khumu pa shou a-u bemoe.
Jewmi Sakiphemiqo Pülükümla
45Ashekha lo achineki khemiqo ye achinetomi eno Phariseemiqo lau idewove. Achinetomi eno Phariseemiqo no akhemiqo vilo ishi iniju, “Nongu ye kushiye pa süghimo kea?”
46Akhemiqo no khochile, “Timi hipau no pikeu tsà ghola toi keu ye khunomu pipüamoe.”
47Phariseemiqo no müghachhoi khochile, “Tiye nongu ghí pa no pishiqhivea piani keo? 48Ayekipemi momu Phariseemiqo khiuala ye pa shou pülübevea keshea? 49Moe! Ikemu hi ayeza kiumu mütha kemi mutomushu lojiqo no pa shou pülübe ke—panongu shou Alhou ngusü anie.”
50Nicodemus, khuu püzüu Jisü lau wu eno khuu panonguw kihiküsümi lakhi keno, pa no iniju, 51“Ni yeza lo timi lakhi no kiu shi acheni keno phupheni ke ghenguno atüghishi pa tsà iniju paghimo no pa pipüsa cheni keshea?”
52Panongu no khochile, “No ghí Galileemi keshea? Hilehi jusü julo, eno tungkupu lakhi ye Galilee lono ipeghi chemo kepi nono phulu nani.”
53 Tishive no panongu kümtsü aki lo wove,
ప్రస్తుతం ఎంపిక చేయబడింది:
John 7: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
