John 5
5
Azükhe lo Shipivi Keu
1Ado hami thiu Jisü no Jewmiʼw tiqhitini lakhi lo sǘ niye Jerusalem lo iqho. 2Ike Jerusalem lo Ambe Khagho phivilo azükhe lakhi ae, tiye Arameami tsau no Bethesda#5:2 Kaku hami lo ye Bethzatha momu Bethsaida ipi cheni. ipi che eno tiye atsükucho pungu no ajò shi homüxa no küzüpe ache. 3Hilehi aphi-au apukhu kinitave kemi kutomo no ihozü ache—tiye anhethi kighichemi, apukhu kinitave kemi, eno aphimpi ithamlave kemiqo. 4Panongu ye azü küghütha khea. Kughengu ado-ado lo Ampeuʼw kungumi lakhi no iqighi püzü azü xukutho cheke. Eno timi khuu no atüghishi azü itha akeu lo iloluni keno kiu-kiu küsǜ lono sǜ aghimu viluve che.#5:4 Kaku hami lo Jn 4:5 kühae. 5Timi lakhi sǜve no ampe shighi tache tilehi ache. 6Kughou Jisü no timi hipau tilehi ihozü akeu ithulu eno pa ye ado kushuwa tilehi vimla no achekeu ithive keno pa vilo ishi iniju, “No ye viluve nishi anima?”
7Aküsüu hu no khochile, “Akijeu, ni ye azü xukutho ke ghuloki lo timi khumu ikuphu sasü azükhe lo iloni kemi kühae. Ino ilo niye pükapütsa ake dolo no kütami no izüu no ilove chenie.”
8Ikelo Jisü no pa vilo pi, “Ithuvelo! Ozüa ikhiqhe no alà chelo.” 9Paikhavi lono timi hu ye vive; pa no pa züa ikhiqheluve no alà chesü wuve.
Shikipivi kümlà hipau shikeu ye Sabbath tsalà lono ke, 10ikehu Jewmi sakiphemiqo no viluve keu vilo ishi pi, “Ishi ye Sabbath tsalà ke; ayeza kiqi lo no ye ozüa pewu müla nanie.”
11Ikemu pa no khochile, “Ishipivi keu timi hu no ivilo ishi pike, ‘Ozüa ikhiqhe no alà chelo.’ ”
12Ike panongu no pa vilo iniju, “Ovilo ozüa ikhiqhe no alà chelo ipikeu timi hipau ye khuu kea?”
13Viluve keu timi hu ye pa shipivi keu ye khuu keno kitilamu müthae, kughengu Jisü ye tilehi aqokitikhi akeu dolo tsüghǜ ilove ke.
14Ado hami thiu Jisü no achineki lo pa ithulu no pa vilo ishi pi, “Julo, no ye viluvae. Axiné shi kevilo tishimo aye alhoküsa hinguno aküsàu oshou ikughi nosake.” 15Timi hu no wuve püzü Jewmi sakiphemiqo vilo pa shipivi tsükeu ye Jisü ke ipi pive.
Anuʼw Kükagha
16Ike Jisü no Sabbath tsalà lono thime hipaqo shikeu ghenguno Jewmi sakiphemiqo no pa kijipüsa thuve. 17Pa süsho ghi Jisü no panongu vilo pi, “I Pù ye ishí tsalà kutólo tamo no pa kümlà shi achenie, eno ni ghí mülà anie.” 18Hipau vehu ghenguno panongu no Jisü pìthíve nike alau pükapütsa auve. Kughengu pa no Sabbath yeza hebide keu likhi kumo püzü pa ye Alhou vilo pa likhi papù ipi ku keu vechewo pa pesü Alhou qhemi lo qhike.
19Jisü no hitoi panongu khochileve: “Ino kuchou tsà nongu vilo pìní, Anu ye pa likhi pa kutoshi ye kiumu shimlae; pa ye pa Pù no mülà keu kiu ithulu keno tilikhi shilu nani, kughengu Apù no kiu shi keno Anu ghí tipau shi cheni. 20Kughengu Apù no Anu kimiye cheni eno pa no mülà keu kümtsü Anu piye cheni. Iyei, eno pa ye hinguno akümlà kijè alau Anu piye nani, tishianguno nongu pelo akümzaqhiyive pe nani ke. 21Kughengu Apù no kithimi xüputhu no aküxü panongu tsükeu toi, Anu ghí pa no tsünishi kemiqo aküxü tsü chenie. 22Tinguno alau, Apù ye khuu shoumu küghathabe chemoe, ikemu küghakütha kümtsü Anu pichevetsüae, 23tishianguno kümtsü no Apù gihu cheke toi Anu gihu peniye ke. Khukhumu Anu gihumo keu ye Apù khuu pa puwu keno pa ghí gihu chemoe.
24“Ino kuchou tsà nongu vilo pìní, khukhumu itsà chilu püzü ipuwu keu pülüni keno lhokta küxü ithulu nani eno küghathabemo nani ikemu akìthí vechesü aküxü lo ikuvae. 25Ino kuchou tsà nongu vilo pìní, ado lakhi cheni eno tiye itehi ighivae, ike tiye kithimi no Alhou Nu sütsa chilu nani eno khunoqo no tipau chiluni keno xülu nani. 26Kughengu Apù no pa lolo aküxü akeu toi, pa no Anu ghí alolo aküxü alu penikeu zà tsüvae. 27Eno Apù no küghathalu penike kükagha pa tsüvae kughengu pa ye Timi Nu hu ke.
28“Hipau lo akümza kevilo, kughengu ado lakhi cheni, tiye akumoki lo akemiqo kümtsü no pa sütsa chilu 29no khalau ipeghi nikeu ke. Akümlà kivi shi kemiqo pelo xü penike xüputhuve nani, eno küsakügha kümlà shi kemiqo shou küghathabe nike xüputhuve nani. 30Ilikhi ivechewo ni ye kiumu shimlae; Ni ye ino chilu keu likhi küghathabe cheni, eno iw küghakütha ye achipi ke, kughengu ni ye ilikhi ipulou kumo püzü ipuwu keu pulou shini keu phu chenie.
Jisü Shepeqo
31“Tsalá ino ilikhi ishepe shi aye, ishepe ye kuchou kumoe. 32Kütami lakhi isaphu ghi ishepe shitsü chekeu ani, eno pa no ishepe shitsü keu ye kuchou kepi ino ithi anie.
33“Nongu no John lau aghinimi puwue eno pa no kuchou shepe shive tsüae. 34Ni ye timi shepe ikhilu akeu ghenguno kumoe; ikemu nongu pelo xaluve penike ghenguno pi anie. 35John ye akulu lakhi no iqü püzü aküvü tsükeu ke, eno nongu no pa küvü lo aloinolu nike ghenguno ado hami kìshelu ke.
36“Ni ye John nguno ashepe akijeu anie. Kughengu ino itehi mülà akeqo ye Apù no ipelo shiqhive penike akümlà tsü keqo ke eno tino Apù no ipuwu kepi ashepe shitsü ani. 37Eno Apù khuu ipuwu keno pa likhi pa no ivehu lo ashepe shitsü ke. Nongu ye khilemu pa sütsa chimla aphi momu pa ju ghola ithumla aphi, 38momu pa tsà nongu lolo ngo chemoe, kughengu nongu no pa no puwu keu shou pülübemo ke. 39Nongu no azükini shi Kuchoyesüqo phi cheni kughengu nongu no tilehi no lhokta küxü ani pi kümsü cheni ke. Kuchoyesü hipaqo no ishepe shitsü ani, 40tishiaghimu nongu no ilau ighi püzü aküxü aluve nikeu milive ke.
41“Ni ye timiqo lau no shekiqhe ikhilu chemoe, 42ikemu ino nongu ithi ani. Nongu mulo lo Alhou kikimiye küha keu ino ithi anie. 43Ni ye I Pù je lono ighi ani, ikemu nongu no ni ikhilumo ke; tsalá khuala no pa likhi pa je lono ighi aye, nongu ye pa ikhilu nanie. 44Nongu ye lakhi no lakhi lau sheqhe keu ikhilu cheni ikemu shekiqhe Alhou lau likhi no ighi chekeu ye phumo ke kíshi no pülüluni kea?
45“Ikemu ni ye Apù zülo nongu nguku nani kepi kümsü kevilo. Nongu nguku nikeu ye Moses ke, nonguw lajupuqo ye pa shou bepe anie. 46Nongu no Moses pülü cheghí aye, nongu ye ipülüni cheke, kughengu pa no ighili yè ke. 47Ikemu nongu ye pa no yè keu papú pülümo ke kíshi püzü ino pikeu pülüluni kea?”
ప్రస్తుతం ఎంపిక చేయబడింది:
John 5: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
